ཅོང་ཆུའི་གྲོལ་སྡེའི་ཚིགས་བཅད་སྙན་ངག་གསུམ།

ཅོང་ཆུའི་གྲོལ་སྡེ།

དཔྱིད་ཉི་མ་ལོ་ལས་རིང་ངོ་ཟེར།།
མཚན་ཐུན་གསུམ་རྨི་ལམ་ཐུང་ངོ་ཟེར།།
དཔྱིད་རིང་བ་འདྲ་སྟེ་ཐུང་བ་འདྲ།།
ཞིང་འདེབས་བཞིན་འབུས་བཞིན་རྫོགས་སོང་ངོ་།།

དབྱར་ཙད་ཆེན་སྐོར་གསུམ་རིང་ངོ་ཟེར།།
སྤང་མེ་ཏོག་བཞད་ཡུན་ཐུང་ངོ་ཟེར།།
དབྱར་རིང་བ་འདྲ་སྟེ་ཐུང་བ་འདྲ།།
གནམ་འབབ་བཞིན་ཐང་བཞིན་རྫོགས་སོང་ངོ།།

སྟོན་མགོ་མའི་"ཆར་ཞོད་རིང་ངོ་ཟེར།།
སྡོང་ལོ་མ་འཐོར་དུས་ཐུང་ངོ་ཟེར།།
སྟོན་རིང་བ་འདྲ་སྟེ་ཐུང་བ་འདྲ།།
རླུང་ལྡང་བཞིན་འཇགས་བཞིན་རྫོགས་སོང་ངོ།།

དགུན་ཟླ་གསུམ་འཁྱགས་པའི་རིང་ངོ་ཟེར།།
ལོ་གསར་རྙིང་ཉེ་བའི་ཐུང་ངོ་ཟེར།།
དགུན་རིང་བ་འདྲ་སྟེ་ཐུང་བ་འདྲ།
ཁངས་ཆགས་བཞིན་ཞི་བཞིན་རྫོགས་སོང་ངོ་།།

ཉིན་སུམ་བརྒྱ་དྲུག་ཅུ་རིང་ངོ་ཟེར།།
ཟླ་བཅུ་གཉིས་འཁོར་བ་ཐུང་ངོ་ཟེར།།
ལོ་རིང་བ་འདྲ་སྟེ་ཐུང་བ་འདྲ།།
གྲངས་བགྲང་བཞིན་བགྲང་བཞིན་རྫོགས་སོང་ངོ་།།
                               
མཆན། "ཆར་ཞོད།"རྒྱུན་བབ་ལ་གོ།
                                                           2019.1.26ཕ་ཡུལ།

དགོན་ནང་ནས་བཞེངས་བའི་མགུར།
                                
སྐྱ་སང་ངེ་སྐྱ་རེངས་དང་པོ་བཀྱགས།།
ལྷ་དཀོན་མཆོག་མཆོད་པས་འཁར་རྔ་བརྡུངས།།
འོད་ཆེམ་མེ་སྐར་ཆེན་མཁའ་ལ་ཤར།།
མགོན་བསྟན་སྲུང་འདྲེན་པས་འཁར་རྔ་བརྡུངས།།
སེར་ལམ་མེ་ཉི་འོད་རི་རྩེར་ཕོག།
སྐྱབས་འདུས་མང་འདུ་བས་འཁར་རྔ་བརྡུངས།།
དུང་གསལ་ལེ་བཀྲ་ཤིས་དྲུག་འགྱོག་བཏང་།།
འབུ་བུང་བ་ཚང་ལ་འདུ་བཞིན་འཚོགས།།
དབུ་ལོ་ཡག་སྙེ་མ་ཁྲིགས་སེ་བསྒྲིགས།
ལོ་རྒན་གཞོན་བསླབ་རིམ་མ་ནོར་བཞུགས།།
གསུང་ལྡིར་རེ་ཞལ་འདོན་དབུ་སྐུལ་བསླངས།།
མཚོ་ཆེན་པོར་ཡེར་མོ་བརྒྱུགས་བཞིན་གསུངས།།
སྐུ་བརྗིད་ལེ་དགེ་སྐུལ་ཇ་གནང་ཞུས།།
ཐུགས་དམ་པོས་སྐྱབས་འཇུག་ལྷ་ལ་ཞུས།།
འཇམ་ཅག་གེ་བཟའ་བཏུང་ཟས་ལ་སྤྱོད།།
དཀོར་ཚུལ་བཞིན་སྦྱོང་བའི་དོན་ལ་འབད།།
ཆབ་བསིལ་ལེ་དགེ་འདུན་ཞལ་ལ་ཕུལ།།
གྲི་ནས་ཤུབས་བཏོན་ལྟར་མར་ལ་གྲོལ།།
དམར་སྨུག་གེ་འདུ་ཁང་ཁྱམས་ལ་འཚོགས།།
ཕྲུག་ཟླ་གམ་ཐང་ལ་བཏང་བཞིན་བཞུགས།།
གསུང་ལྷིང་ངེ་དྷཱི་སྐད་ངག་ནས་བཀྲོལ།།
ཕྱག་སྟངས་སྟབས་བར་ནས་ལུང་རིགས་བརྡོལ།།
ཐུགས་འཇམ་མེ་བརྒལ་བརྟག་ལས་ལ་བརྩོན།།
གཞུང་རྒྱ་བོད་གསུང་རབ་གཏན་ལ་ཕབ།།
ཉམས་དོད་ལེ་རས་གཟན་སྐེད་ལ་བཅིངས།།
ཚ་འཁོར་གསུམ་མེ་ཏོག་ཆར་བ་ཕབ།།
གཤིས་དུལ་ལེ་གཤེས་གཉེན་ཚུལ་བཞིན་བསྟེན།།
ཆོས་ལུང་ཁྲིད་བུམ་པ་གང་བྱོས་བྱེད།།
བློ་སྒྲིམ་མེ་ཚིག་དོན་ཚུལ་བསམ།།
སྒོམ་ཉམས་ལེན་རང་རྒྱུད་སྦྱོར་ལ་འབད།།
གོམ་དལ་ལེ་གྲྭ་ཤག་ནང་ལ་ཕེབས།།
ཕྱག་མཆོད་པའི་དགེ་སྦྱོར་ཆགས་མེད་མཛད།།
སྐུ་བུན་ནེ་ནམ་གུང་ཕར་ལ་བསྐྱལ།།
གཞུང་དཀའ་གནད་རྩེ་གཅིག་བློ་ཡིས་དཔྱད།།
ཐུགས་ཁྲོང་ངེ་ཐོ་རེངས་ཚུར་ལ་བསུ།།
འཛིན་སྐྱོར་སྦྱངས་ལོ་ཟླས་ཁྲོད་ལ་གཤེགས།།
                                                   ༢༠༡༩.༤.༡༩རྫ་ཆུ་ཁ།

མཉམ་མགུར།

ཚེ་འདིར་མི་འབྲལ་ཡིད་ཆེས་བླ་མར་གཏད་ན།།
ཕྱི་མར་མི་འགྱུར་སྨོན་ལམ་དབང་ལ་བཅོལ་ན།།
དབང་སྐུར་མན་ངག་གནང་བའི་བླ་མའི་དྲུང་དུ།།
ལྷ་བུམ་ལུས་བུམ་བྱེད་པའི་ལས་འཕྲོ་ཨེ་ཡོད།།

གསོན་ན་ཁྱིམ་གཅིག་རྣལ་འབྱོར་སྙན་ལ་ཞུས་ན།།
ཤི་ན་དུར་གཅིག་ཁ་ཆད་མགུར་ལ་བཞེངས་ན།།
རྣམ་ཤེས་མགུར་དུ་འདྲེན་པའི་རྣལ་འབྱོར་མདུན་དུ།།
རྐང་གླིང་ཐོད་ཕོར་བྱེད་པའི་སྨོན་ལམ་ཨེ་ཡོད།།

ཚེ་རབས་ཕྲེང་བའི་བར་ཆད་ལྷ་ལ་ཞུས་ན།།
སྔོན་བསགས་ལས་ཀྱི་བྱས་ཉེས་ཆོས་ཀྱིས་སེལ་ན།།
དམ་ཆོས་ཚེ་ལ་གསུང་བའི་དགེ་སློང་ཕྱག་གི།།
རྡོ་རྗེ་དྲིལ་བུ་བྱེད་པའི་བསོད་ནམས་ཨེ་ཡོད།།

ཐར་བར་དད་པས་ཐལ་མོ་ཟུང་གཅིག་སྦྱར་ན།།
དམྱལ་བར་འཇིགས་པས་ངེས་ཤེས་ཆ་གཅིག་འདྲོངས་ན།།
ལྷ་ཁང་གཅིག་ལ་བཞེངས་བའི་ལྡེབས་རིས་ངོས་ཀྱི།།
ལྷ་དང་ལྷ་མོ་བྱེད་པའི་ལས་དབང་ཨེ་ཡོད།།

མདུན་མའི་རྨི་ལམ་མཚོ་མོ་དབྱར་ལ་བསྐྱིལ་ན།།
རེ་བའི་གོད་ཆགས་དར་ཁ་དགུན་གྱིས་བསྒྲིགས་ན།།
མཚོ་མཐའ་ལྷན་དུ་སྐོར་བའི་ངང་བ་ཆ་ཡི།།
ལུས་ཀྱི་གཤོག་ཟུང་གཡར་བའི་རང་དབང་ཨེ་ཡོད།།

དམ་ཚིག་གཙང་མའི་བདུད་རྩི་གཅིག་ཏུ་བསྙལ་ན།།
ཡིད་ཆེས་འཛུབ་མོའི་མཆོད་ཁ་མཉམ་དུ་འཕངས་ན།།
ཆང་མ་ཡེ་ཤེས་མཁའ་འགྲོའི་ཆང་ཕོར་ཐོག་གི།།
རྨ་འབྲུག་ཁ་སྤྲོད་བྱེད་པའི་རྟེན་འབྲེལ་ཨེ་ཡོད།།

ཡིད་ཀྱི་སྙིང་གཏམ་རི་མོ་ཡི་གེར་བྲིས་ན།།
ངག་གི་སྲིད་པའི་མཛའ་གཞས་དབྱངས་སུ་གྱེར་ན།།
རིག་འཛིན་ཚངས་དབྱངས་རྒྱ་མཚོའི་མགུར་གླུའི་ནང་གི།།
དབྱངས་དང་གསལ་བྱེད་བྱེད་པའི་རྨི་ལམ་ཨེ་ཡོད།།

སྡང་བའི་དགྲ་ལ་གོ་མཚོན་གཡུལ་ལ་འཛོམས་ན།།
བྱམས་པའི་མི་ངང་བ་མཚོ་ལ་མཐུན་ན།།
གླིང་དཀར་སྟོད་ཀྱི་གེ་སར་འབྲུག་མོའི་སྒྲུང་གི།།
གཏམ་རྒྱུད་ཕྱི་མ་འབྲི་བའི་ལོ་ཟླ་ཨེ་ཡོད།།

ཡིད་གཅུགས་མཛའ་བ་ཤིང་དང་ཡལ་གར་གྲུབ་ན།།
ན་ཚོད་གཞོན་པའི་ལོ་འདབ་མཉམ་ཏུ་རྒྱས་ན།།
གཞིས་ཁྱིམ་གཅིག་གིས་ཕུབ་པའི་མགོ་ཁང་གྲུ་བཞིར།།
ཀ་བ་གདུང་མ་བྱེད་པའི་གོ་སྐབས་ཨེ་ཡོད།།

མི་ཚེའི་སྟོན་མཇུག་བ་མོ་མ་སླེབ་བསྡད་ན།།
མི་ཁའི་རླུང་དང་བསེར་བུ་མ་ལྡང་བསྡད་ན།།
སྐྱེད་ཚལ་ལྷུག་པོར་གྲོལ་བའི་ལྡུམ་ར་གཅིག་ནས།།
གཡུ་སྦྲང་མེ་ཏོག་བྱེད་པའི་སྐལ་བ་ཨེ་ཡོད།།