ཕ་མའི་བཀའ་དྲིན་དྲན་སྲོལ་ཞིག

ཕ་མའི་བཀའ་དྲིན་དྲན་སྲོལ་ཞིག

                                                   བདག་གི་མི་ཚེ་འདི་ལ་དད་པའི་ལྷ། །
                                                   ལྷ་མོ་གཡུ་ཡི་མདངས་ཀྱི་དཔལ་འཛིན་མ། །
                                                   མ་གཅིག་རྗེ་བཙུན་འཕགས་མ་སྒྲོལ་མ་དེ། །
                                                   དེ་རིང་བུ་ངའི་སྤྱི་བོའི་རྒྱན་དུ་བྱོན། །

                                                   ཕ་དང་མ་ཡི་དྲིན་ལན་མི་བསམས་པ། །
                                                   དུས་ཀྱི་མ་གཤམ་འདི་རུ་ཇེ་མང་རེད། །
                                                   ཕ་མ་མེད་ན་རང་ཉིད་གང་ན་ཡོད། །
                                                   དེ་བས་ཕ་མའི་དྲིན་ལན་དྲན་པར་མཛོད། །

                                                   དང་བོར་ཁོག་ཏུ་ཁུར་བའི་སྡུག་བསྔལ་སོམས། །
                                                   བར་དུ་གཅིན་སྐྱག་ཉར་བའི་དཀའ་བ་སོམས། །
                                                   ཐ་མར་ལྟོ་གོས་བྱིན་པའི་བརྩེ་བ་སོམས། །
                                                   འདི་དག་བསམས་ན་ཕ་མ་སེམས་ལ་འཁོར། །

                                                   རང་རང་ཕ་མར་གྱུར་བའི་དཀའ་སྡུག་ལྟར། །
                                                   རང་གི་ཕ་དང་མ་ཡང་དེ་འདྲ་ཡིན། །
                                                   རང་གིས་ཕ་མར་གཅེས་པ་དེ་བཞིན་དུ། །
                                                   རང་གིས་བུ་ཡིས་རང་ལ་གཅེས་པར་འགྱུར། །

                                                   རང་གིས་ཕ་མ་དོར་ན་དེ་བཞིན་དུ། །
                                                   རང་གི་བུ་ཡིས་རང་ཉིད་དོར་བར་འགྱུར། །
                                                   དེ་དུས་འགྱོད་པ་སྐྱེས་ན་སྡུག་གྱོང་ཡིན། །
                                                   དེ་བས་ད་ནས་ཕ་མར་ཞབས་ཏོག་སྒྲུབས། །

                                                   ཕ་མ་གོང་དུ་བཀུར་བའི་བུ་ཕྲུག་ལ། །
                                                   སྤྱི་ཚོགས་སྟེང་ན་ཁས་ལེན་རྒྱབ་སྐྱོར་ཡོད། །
                                                   ཕ་མར་གཅེས་སུ་མི་འཛིན་བུ་ཕྲུག་ལ། །
                                                   མང་ཚོགས་ཁ་ན་སྡིགས་དམོད་རླུང་ལྟར་འཚུབ། །

                                                   ལེགས་དང་མི་ལེགས་དོན་ལ་དཔྱད་པ་ཐོངས། །
                                                   བཟང་དང་མི་བཟང་བྱ་བར་དབྱེ་བ་མཛོད། །
                                                   རྐང་གཉིས་མི་རུ་སྐྱེས་པའི་རྩ་བ་ཉིད། ། 
                                                   ཕ་དང་མ་ལ་ཐུག་པ་ཤེས་པར་གྱིས། །

                                                   དེ་ལྟར་བརྩེ་བ་སྟོང་གི་མཛོད་འཛིན་པ། །
                                                   ཕ་དང་མ་ཡི་དྲིན་ལན་བསམ་མི་ཁྱབ། །
                                                   དྲིན་གྱི་ཆ་ཤས་ཙམ་ཡང་འཇལ་འདོད་པའི། །
                                                   བུ་དང་བུ་མོས་འཇིག་རྟེན་གང་བར་ཤོག །

                                                   ཕ་མའི་ལུས་ལ་གོས་ཀྱི་རྒྱན་ཐོབ་ཤོག །
                                                   ཕ་མའི་རྣ་ལ་གཏམ་སྙན་ཐོས་པར་ཤོག །
                                                   ཕ་མའི་ཡིད་ལ་འདོད་པ་ལྷུན་འགྲུབ་ཤོག །
                                                   ཕ་མ་འཇིག་རྟེན་ཀུན་ཏུ་བདེ་བར་ཤོག །