བརྩེ་དུང་མེད་པའི་སྙན་ངག་ཅིག་ཇི་ལྟར་བྲི།

ས་གཞི་སེར་མདོག་གིས་བཀླུབ་འགྲོ་བའི་དེ་རིང་

བྱིའུ་རང་མལ་དུ་ལོག་འགྲོ་བའི་དེ་རིང་

མེ་ཏོག་དང་གཡུ་སྦྲང་གི་སྨྲེང་གླུ་སྒོམ་ཞོར

ངང་བ་དང་མཚོ་མོ་ཡི་སྐྱོ་ངལ་དྲན་དུས

བརྩེ་དུང་མེད་པའི་སྙན་ངག་ཅིག

ངས་ཇི་ལྟར་བྲི

ལོ་རྒྱུས་སེར་ཁ་ཡིས་ཟ་འགྲོ་བའི་དེ་རིང་

མི་རིགས་མཁའ་དབུགས་བཞིན་འཐོར་འགྲོ་བའི་དེ་རིང་

མེས་པོ་ཚོའི་ཁ་སང་གི་ཟུངས་ཁྲག་སྒོམ་ཞོར

དུས་རབས་འདིའི་དེ་རིང་གི་མནར་བཅོས་དྲན་དུས

བརྩེ་དུང་མེད་པའི་སྙན་ངག་ཅིག

ངས་ཇི་ལྟར་བྲི

ཉི་མ་བཙན་དབང་གིས་བཞུད་འགྲོ་བའི་དེ་རིང་

ལྷ་ས་ས་སྲོད་ཀྱིས་རྒས་འགྲོ་བའི་དེ་རིང་

ཤོག་སྨྱུག་དང་ལྰ་སྒྲོན་གྱི་ཁུ་སིམ་སྒོམ་ཞོར

སྙན་ངག་དང་མཚན་མོ་ཡི་གསང་བ་དྲན་དུས

བརྩེ་དུང་མེད་པའི་སྙན་ངག་ཅིག

ངས་ཇི་ལྟར་བྲི