བསྐྱར་འཁྲབ་བྱེད་བཞིན་པའི་འཚོ་བ།

བསྐྱར་འཁྲབ་བྱེད་བཞིན་པའི་འཚོ་བ།
         རྨེ་རུ་ཕག་མོ་ཚེ་བརྟན། (ཉི་ཧོང་།)

༡

        ཉི་མ་སྔར་བཞིན་ངས་ལྷོ་ཕྱོགས་སུ་འབོད་པར་ལོབས་པའི་རི་བོ་དེའི་འོབས་ནས་འཕགས་ཤིང་། སླར་ཡང་ངས་བྱང་ཕྱོགས་སུ་འབོད་པར་གོམས་པའི་རི་བོ་དེའི་རྒྱབ་ཏུ་ཡལ་འགྲོ  འདི་ནི་ཕ་ཡུལ་དང་བསྡུར་ན་ཆེས་ཁྱད་ཆེ་བའི་བར་ཐག་དེ་རེད་ལ། ཏུང་ཅིན་གྲོང་གི་གཞན་ལ་མེད་པའི་གནམ་གཤིས་ཀྱི་ཁྱད་ཆོས་ཤིག་ཀྱང་རེད།

༢

        འཇེམ་འཁོར་མང་བོའི་འུར་ཟིང་གི་འདུ་འཛི་ཀློང་ན། ཉི་ཧོང་གི་མིའི་གདོང་ན་བྲལ་འཚུབ་ཀྱི་མཚོ་མོ་ཞིག་ལྟེམས་སེ་འདུག་ལ། ལྕགས་རྟ་མང་པོའི་འདུར་བརྒྱུག་གི་བྲེལ་མྱུར་བར་ན། ཁོང་ཚོས་འཚོ་བར་བཟུང་བའི་རེ་འབོད་ཀྱི་དུང་སྒྲ་སྙན།

༣

        སྐབས་ལ་རེར། མཐོན་མཐིང་གི་མདོག་བཀྲ་བའི་ཕུག་རོན་དེ་དག་མི་ཚོགས་ཀྱི་གསེབ་ནས་འགུལ་ཞིང་། འཛེར་སྒྲ་ལ་དུངས་པའི་ཕོ་རོག་དེ་དག་འདུ་འཛི་ལ་མོས་པའི་རླངས་འཁོར་དག་གི་སྐེད་པར་བྱོན་དུས། ཡུལ་འདི་ནི་འཆམ་མཐུན་གྱི་རོལ་མོ་སྒྲོག་ས་ཤིག་ཏུ་འདོད་ལ། ཞི་བདེ་ཡི་དང་ཤགས་དཀྲོལ་ས་ཤིག་ཏུའང་འཁུམས།

༤

        མཚམས་ལན་རེར། མི་ཁྲི་སྐོར་མང་བོའི་ཚེ་སྲོག་གི་རིན་ཐང་གློག་འཁོར་བརྒྱུགས་སའི་འགག་ལམ་ནས་རྫོགས་ཤིང་། དལ་འབྱོར་གྱི་ལུས་རྟེན་ཐོབ་པའི་གང་ཟག་སྟོང་ཕྲག་མང་བོས་འཆི་བདག་རང་གིས་འཚོལ་བའི་སྣང་ཚུལ་འདི་དག་མཐོང་ཚེ། གནས་འདི་ནི་བར་བདོ་ལས་འཇིགས་ཆེ་བར་བསམ་ལ། དམྱལ་ཟངས་ལས་ཤོམས་ཆེ་བར་འདོད།

༥

        ད་ནངས། ང་སྔོན་དང་འདྲ་བར་ལྕགས་རྟར་ཞོན་ནས་སློབ་གྲྭའི་ཕྱོགས་སུ་བསྙེགས་ཤིང་། ལམ་བར་དུ་སྔར་བཞིན་འཕྲིན་བསྐྱེལ་བ་དང་། ལས་ཚོགས་སུ་འགྲོ་མཁན་སོགས་སུ་འཕྲད་ཅིང་། དེ་དག་གི་གོམ་སྒྲས་ཏུང་ཅིན་གྲོང་གི་ཞོགས་པར་འུར་ཟིང་གི་ཉམས་ཤིག་བསྣན་འདུག