འདི་ནའང་དྲག་ཏུ་ལྡིང་བཞིན་པའི་སྙིང་གསོན་པོ་ཞིག་འདུག

དཔལ་རྡུལ་གྱི་མཛད་རྗེས་ནི།
མ་ཧ་ཙི་ནའི་ཁམས།
གཞན་ཡང་།
བལ་པོ་དང་།
ཁ་ཆེ།
འབྲས་ལྗོངས་དང་།
འབྲུག་ཡུལ་སོགས་ན་ཡང་།
སྤྲིན་གྱི་སྒྲ་དབྱངས་དང་།
པི་ཝང་སྒྲ་དབྱངས།
དྲི་ཟའི་གླུ་དབྱངས།
དབྱངས་ཅན་གླུ་དབྱངས་ཇི་བཞིན་སྒྲོག་པ་ཁྱེད་ཀྱིས་ཨེ་ཚོར།
ཡིན་ན་ཡང་།
བསམ་བློ་གསར་པ་ཞིག་དང་།
ལྟ་བ་གསར་པ་ཞིག
འདོད་ཚུལ་གསར་པ་ཞིག
ལུགས་སྲོལ་གསར་པ་ཞིག
སྤྱི་ཚོགས་རིང་ལུགས་ཀྱི་གངས་ལྗོངས་དུ་གདན་འདྲེན་རྒྱུ་ནི།
བསེ་རུའི་རྭ།
རུས་སྦལ་གྱི་སྤུ།
མཁའ་ཡི་པད་མོ།
ས་ཡི་མཇའ་ཚོན་བཞིན་དུ་དཀའ་བ་འདི་ཁྱེད་ཀྱི་ཨེ་ཤེས།
རེད་ཨ།
སྙིང་ཞེན་གྱི་མཁའ་དབྱིངས་འདིར།
བག་ཆགས་ཀྱི་ཆུ་འཛིན་ལང་ལོང་གཡོ་བ་དང་།
བག་ཁུམས་ཀྱི་གློག་ཞགས་ཤིག་ཤིག་དུ་འཁྱུག་པ་ལྟར་སྣང་ཡང་།
སྔོན་ཐོན་གྱི་སྦྲང་ཆར་ཟིམ་ཟིམ་དུ་འཇོ་བའི་སྐལ་བ་ནི་ཕྲ་ཙམ་གདའ།
ཡིན་ན་ཡང་།
མི་རིགས་ཀྱི་རེ་བའི་རླངས་པ་ནི་མཁའ་ལ་འཕྱུར་ངེས་ཡིན་པ་དང་།
གངས་ལྗོངས་ཀྱི་ལ་རྒྱའི་སྤྲིན་སྔོན་ཡང་ལྷོ་ནས་ལྡིང་ངེས་ཡིནལ།
ཡུལ་གྱར་བ་དང་གནས་སྡོད་་པའི་གཞིས་བྱས་ཀྱང་ལྷང་ལ་འབུད་ངེས་རེད།
བློ་མ་ཕམ།
གསར་སྐྱེས་ཀྱི་གཞོན་ནུ།
རྒྱལ་ཁམས་ཀྱི་ཁ་ན་ཡེ་ཤེས་ཀྱི་སྤྱན་ཡོད་པ་བདེན་དུ་ཆུག་ཀྱང་།
ཞལ་ལྕེ་དགའ་གསུམ་དང་དར་གསུམ་ཡོད་པས།
ཁྱེད་ཀྱི་བློ་ཅི་ལ་ཕམ།
སེམས་མ་སྡུག
ཀྱེ་ཀྱེ། གྲོགས་པོ་ལགས།
གངས་ཅན་གྱི་གཞོན་ནུ།
གསར་གཏོད་ཀྱི་སྙིང་སྟོབས་མེད་ན།
དྲང་བདེན་ཟེར་བ་ཡང་མེད་ལ།
རྒྱུ་འབྲས་ཟེར་བ་ཡང་སྐྱག་རྫུན་རེད།
འོན་ཀྱང་།
ངའི་མིག་ལམ་དུ་སྣང་བ་ནི།
བདེ་སྐྱིད་ཀྱི་བདུད་རྩི་ཡིན་པ་དང་།
ངའི་རྣ་ལམ་དུ་ད་ལྟའང་འགེངས་པ་ནི།
མ་འོངས་པའི་འཚོ་བ་ཡིན།
འདི་ནི།
ངའི་སེམས་ན་དྲག་ཏུ་མཆོང་ལྡིང་བྱེད་པའི་སྙིང་གསོན་པོ་ཞིག་ཡིན་ལ།
འདི་ནི།
ཕལ་ཆེར་ཁྱེད་རང་ཚོའི་སེམས་ན།
དྲག་ཏུ་མཆོང་ལྡིང་བྱེད་བཞིན་པའི།
སྙིང་གསོན་ཞིག་ཡིན་ཀྱང་སྲིད།

སྤྱི་ལོ1985ལོའི་ཟླ7པའི་ཚེས21ལ།