ལྷ་སའི་མཚན་མོའི་འཚོ་བ།

བྲེལ་ཤ་ལངས་པའི་རྣ་གཤོག་དེས
གྲུང་ཤ་དོད་པོའི་ཟབ་ཉན་བྱེད་དུས
རོལ་དབྱངས་ཀྱི་ལྡིར་སྒྲ་རྩུབ་པོས
སྐྱིད་ཆུ་སྔོན་མོའི་རླབས་སྒྲ་ཐོས་དཀའ་བ་ནི
ལྷ་སའི་མཚན་མོའི་འཚོ་བ་འཁྲུག་དྲགས་པས་ཡིན་རྒྱུ་རེད
 
ལྷ་སའི་མཚན་མོའི་འཚོ་བ
ཟླ་འོད་འཚེར་འཚེར་འོག་གི་ལྷ་སའི་མཚན་མོ
གཙོག་པ་རྐྱང་རྐྱང་ཁྲོད་ཀྱི་མཚན་མོའི་འཚོ་བ
བརྣབ་སེམས་དང་གནོད་སེམས་གྱོན་ནས
གྲོང་ཁྱེར་འདིའི་འུག་པ་ཚོས
ག་དུས་ནས་བསྐྱངས་ཤིང    ཇི་ཙམ་བར་སྐྱོང་ངམ
 
སྤྲོ་སྣང་མ་ཡིན་པའི་སྤྲོ་སྣང་གི་ལྷ་སའི་མཚན་མོ
སྤྲོ་སྐྱིད་གླིང་གི་ཅོག་ཙེའི་སྟེང་ན
སུ་ཞིག་གི་རྔུལ་ཆུ་འཁྱིལ་ཡོད
གློག་ཞུ་དམར་ལམ་མེའི་ཨར་ཁང་དབུས་སུ
གང་ཞིག་གི་བདེན་པ་བརླགས་སོང
 
 
གླ་བྱེད་རླངས་འཁོར་གྱི་ཁ་ཕྱོགས་ག་ཚོད
ཞང་ཁང་ལྟ་བུའི་མགྲོན་ཁང་ལ་ཕྱོགས་པ་ནས
ནག་ཉེས་མེད་པའི་བུ་ཕྲུག་ག་ཚོད་ཕ་མ་ཁ་བྲལ་དུ་ལུས
ལྷ་སའི་མཚན་མོ   མཚན་མོའི་སྐྱོ་གར
 
གཙུག་ལག་ཁང་གི་གསེར་ཏོག་ལ
དམར་དམར་གློག་སྒྲོན་གྱི་འོད་མདངས་འཕྲོ་བཞིན
པོ་ཏ་ལའི་གྱང་མདོག་ཆེས་དཀར་དུ་གཏོང་དུས
ལྷ་སའི་མཚན་མོར་ཇོ་བོ^①གཉིད་ཟིན་པས
མཚན་མོའི་འཚོ་བ་འདོད་རྔམས་ཀྱིས་འཚོས་ཡོད
 
ཀྱེ་མ་ང་ཡི་ལྷ་སའི་མཚན་མོ
ཀྱེ་ཧུད་ང་ཡི་མཚན་མོའི་འཚོ་བ
སྐར་ཚོགས་ཀྱང་གྲང་འདར་ཤོར་ཅིང
ཉམ་ཆུང་གིས་ཞུ་གཏུགས་དགོས་པ
གླེང་མི་ཚར་བའི་སེམས་ཀྱི་ན་ཟུག
བྲིས་མི་ཚར་བའི་འཚོ་བའི་མེ་ལོང
ལྷ་སའི་མཚན་མོའི་འཚོ་བ་ཨྰ
སྦི་རག་སྐྱུར་མོའི་ངར་ཁ་ན   རྦད་དེ་བཟི་འདུག

མཆན།
①ཇོ་བོ།  གཙུག་ལག་ཁང་གི་ཇོ་བོ་ཡིད་བཞིན་ནོར་བུ།