སྒྲུབ་བརྩོན་བསྟན་དར་གྱི་བརྩམས་ཆོས《འཇིགས་རུང་གི་ཧམ་སེམས》

　　འཇིགས་རུང་གི་ཧམ་སེམས།  འཛམ་གླིང་གི་ཤར་ནུབ་སྣེ་གཅིག་ཏུ་སྦྲེལ་ཞིང་། ལྷོ་བྱང་གི་ལས་དབང་མཉམ་གཅིག་ཏུ་བསྲེས་ཏེ། སེམས་མེད་ཀྱི་བེམ་པོ་བྲན་གཡོག་ཏུ་བཀོལ་ནས། གཤོག་མེད་ཀྱི་མི་བོ་ནམ་མཁའ་ལ་ཕུར་བ། ད་དུང་། རང་བྱུང་གི་ས་ཁམས་རང་དབང་དུ་བསྡུད་ཅིང་། གོ་ལ་གཞན་ལ་ལྗོངས་རྒྱུ་རུ་འགྲོ་བའི་ མིའི་རིགས། རང་སྣང་གི་མགོ་བོ་འཛམ་གླིང་ན་མཐོ་ཞིང་། དཔྱོད་ཤེས་ཀྱི་མདའ་མོ་ནམ་མཁའ་ལ་ འཕེན་པའི་མིའི་རིགས། ད་ལྟ་སུ་ཞིག་གི་གཞན་དབང་དུ་བསྡུད་ནས། གང་ཞིག་གི་མནར་གཅོད་ལ་ མྱོང་གིན་ཡོད། ང་ཚོའི་སྙིང་སྟོབས་ཀྱི་མེ་ལྕེ་མོག་པོ་རུ་གཏོང་མཁན་དེ་སུ་ཡིན། ཟླ་མེད་ཚན་རྩལ་ གྱི་མགོ་བོ་ལྗིད་ཀྱིས་མནོན་མཁན་དེ་སུ་ཡིན། ཀྱེ་མ། བདུད་སྲིན་ཨེ་ཛེ། ཁྱོད་ཀྱིས་ད་དུང་མིའི་ རིགས་ལ་མནར་གཅོད་ཇི་ཙམ་ཞིག་གཏོང་སྲིད། བདེ་སྐྱིད་ཀྱི་འཚོ་བ་ཇི་ཙམ་ཞིག་འཇོམ་འདོད། རིན་ཆེན་གྱི་ཚེ་སྲོག་ཇི་ཙམ་ཞིག་འཕྲོག་འདོད། གཡང་ཞག་གི་ཕ་ཁྱིམ་ཇི་ཙམ་ཞིག་གཏོར་འདོད། ངོ་མ། བྱམས་པ་དང་སྙིང་རྗེས་དབུལ་བའི་སྲིན་པོ་ཁྱོད། ལས་འབྲས་ཀྱི་བློ་མིག་ལོང་བའི་བདུད་ ནག་ཁྱོད། ཁྱོད་ཀྱི་མིག་ཟུང་ལ་བུ་ཁ་ཡོད་ན་ད་ལྟོས་དང་། ཉམས་ཐག་པའི་འགྲོ་བ་མིའི་རིགས། ཁ་སང་ཁྱོད་ཀྱི་ནད་འབུ་ཡིས་བཟུང་བ་ནས། ལུས་སྟོབས་ཀྱི་ཟུངས་ཤུགས་ཟད་ཅིང་། སེམས་ཁམས་ལ་བཟོད་བརླག་མེད་པའི་ཕོག་ཐུག་ནམ་མཁར་མི་གཤོང་བ་ཞིག་བཏང་། ད་ཆ་མི་གྲལ་ནས་ཕུད་ལ་ཉེ་བའི་ནད་པ་བྱེ་བ་མང་པོའི་འཚོ་བ་ལ་ཉི་འོད་མེད་ཅིང་། ཕུག་བསམ་ལ་མིག་རྒྱངས་མེད།  ནད་པ་མང་པོ་འཚོ་གནས་ལ་རེ་ཐག་ཆད། མི་ཡུལ་ལ་ཞེན་པ་ལོག ད་དུང་ལས་ཀྱི་རྣམ་སྨིན་མ་རྫོགས་པ་དེ་ཚོ། གཞན་གྱི་འཕྱ་དམོད་དང་མཐོང་ཆུང་གི་ཁྲོད་དུ། ཐ་ན་འཆི་ལ་ཉེ་ཡང་འཚོ་བས་སྤྲད་པའི་ཕམ་ཁ་སྐྱུར་མོ་དེ་ཇི་འདྲའི་ལྕི་ཨང་།  ལས་མ་དག་པའི་ནད་པ་འདི་ཚོ། རེ་བ་ཉི་ཚེ་བ་ཞིག་གི་ཆེད་དུ་སྨན་རྒྱུན་ཟས་ལྟར་ཟ་ཞིང་། ཉིན་མཚན་འཁོར་མོར་ནད་ངན་དེའི་རྡུང་བརྡེག་ལུས་སེམས་ཀྱིས་མྱོང་དགོས་པ་ཅི་འདྲའི་སྙིང་རྗེ་ཨང་།   ཕ་མ་དང་བུ་ཕྲུག ཉེ་འབྲེལ་དང་སྤུན་མཆེད་དུ་མ་ཚོམ་བུ་ཚོམ་བུར་གཤིན་རྗེའི་གྲོང་སྒོ་རུ་འཁྲིད་ སྐབས། ད་ལྟ་ཤུལ་ན་ལུས་པ་བདག་མེད་ཀྱི་ཁང་སྟོང་དང་། རྣམ་ཤེས་ཀྱིས་བོར་སོང་བའི་བེམ་རོ་ འདི་ཚོ་ལས་མིན་འདུག བདུད་ནག་ཨེ་ཛེ། ཁྱོད་ཡོང་བ་སྔ་དྲག་པས་ཡིན་ནམ། ཡང་ན་ཁྱོད་འཇོམས་མཁན་གྱི་ལྷ་རྗེ་དེ་བྱོན་ཕྱིས་པ་ཡིན། གང་ལྟར་སྔ་ཕྱི་གོ་ལྡོག་པའི་དུས་ཚིག་འདིར། མི་ཡུལ་ནི་དོན་དམ་པའི་དམྱལ་ཁམས་ཁོ་ན་རེད།