བྱིས་པའི་དུས་ཆེན་ལ་ཕུལ་བའི་མཉམ་བྲིས་སྙན་ངག་ཁག་བཞི།

                                 ཉི་ཟླའི་པང་གི་སྐར་ཚོམ།
                                      རས་གཟན་དམར་པོ།
ལང་ཚོ་གསར་བའི་དབུ་ཁྱུད་ཡག་མེ་ཏོག་འདྲ་ལ་ལོ་འདབ་འདྲ།།
སྐྱེས་ཡག་ལུས་ཀྱི་བཀོད་པ་མཛེས་བྲིས་ཐང་འདྲ་ལ་སྤྲིན་སྐར་འདྲ།།
ན་ཚོད་རན་པའི་གཞོན་གསར་ཚོ་ང་ཡི་མེས་པོའི་རེ་འབྲས་ཏེ།།
ཕ་ཡུལ་ཐུ་བྷོད་གཞིས་ཁྱིམ་གྱི་ཉི་ཟླ་གཉིས་ཀའི་ཐུགས་སྲས་ཡིན།།

ཀ་ཁ་འཚོལ་བའི་གོམ་སྟབས་མཛེས་རྨིག་བཞི་ཐོ་རུའི་འདེགས་འཇོག་འཁྲུངས།།
ཡིག་ཆུང་འབྲི་བའི་འཁྱུག་རྩལ་ཡག་ལྷུ་དྲུག་སྙུག་མའི་གཡོ་ལྡེམ་དོད།།
ལོ་ན་ཆུང་བའི་བྱིས་པ་ཚོ་ང་ཡི་འདས་མ་ད་གསུམ་སྟེ།།
རེ་བ་སྟོང་གི་ཕར་ནང་ན་ཉི་གཞོན་གསར་བ་བསུ་བར་རེ།།

བྱིས་བློ་གཙང་མའི་ནམ་མཁའ་མཛེས་ཟླ་བ་འདྲ་ལ་ཉི་འོད་འདྲ།།
ངག་ཐུན་མཉེན་མོའི་འབོད་པ་ཡག་ཁུ་ཡུག་འདྲ་ལ་འཇོལ་མོ་འདྲ།།
སྐར་ཚོམ་འདྲ་བའི་གཞོན་རབས་ཚོ་གངས་རིའི་མིག་ཆུ་དྭངས་མོ་སྟེ།།
ཤམ་བྷ་ལ་ཡི་ཞིང་ཁམས་ཀྱི་རྣམ་ཤེས་གསར་བའི་དཔུང་སྡེ་ཡིན།།

དབྱངས་གསལ་གྱེར་བའི་ང་རོ་སྙན་ཡིད་ལ་སིམ་ཞིང་རྣ་བར་འཇེབས།།
རྩེད་རྡོ་སྒྲིག་པའི་ཇུས་འགོད་ཡག་ཁྱིམ་གཞིས་བསྐྲུན་པའི་བཟོ་ལྟ་ཚེས།།
རྨི་ལམ་མང་བའི་བྱིས་པ་ཚོ་སྣོད་བཅུད་གཉིས་ཀའི་བདག་པོ་སྟེ།།
འབྱུར་འགྱུར་གངས་ལྗོངས་ལུང་པ་རུ་རང་དབང་རྟ་མཆོག་བསུས་ལ་ཤོག།

2015.6.1

                                 ཉི་ཟླའི་པང་གི་སྐར་ཚོམ།
                                      མགོ་ལོག་ཆུ་ཐིགས།
རིགས་ལ་བཏབ་པའི་འོད་ཀྱི་སྐར་ཚོམ།།
མེས་པོའི་ངག་གི་གསེར་ཡིག་ཡིན་པས།།
ཐར་ཆགས་ཡིན་པའི་དེབ་ཐེར་ཁག་ཏུ།།
རྡོ་རིང་འདྲ་ལ་བཙན་རྫོང་འདྲ་ཨང་།།

ཕོ་བྲང་ནང་གི་སྐུད་པ་ལྗང་གུ།།
འབྱུང་འགྱུར་འཚོལ་བའི་བྱིས་པ་ཡིན་ན།།
འཇའ་ཡིས་བྲིས་པའི་ཁ་ཡིག་དེ་ལ།།
ལུང་བསྟན་རྒྱག་མཁན་ཁྱོད་ཚོ་ཡིན་འགྲོ།།

མགུར་དབྱངས་ཤིག་གི་ཕག་ན་གབ་པའི།།
ཐབས་ཤེས་རྒུམ་པའི་བྱེའུའི་ལྷ་ཚོགས།།
གནམ་གྱི་ཉི་ཟླ་ས་རུ་བླངས་ནས།།
འོད་ཀྱི་མེ་ལོང་ཁྱོད་ལ་སྟེར་ཆོག།

རེ་བའི་སྒམ་ལས་གཏེར་དུ་བཏོན་ཏེ།།
བརྩེ་བའི་འོབས་ལ་མགྲོན་དུ་བོས་ཡོད།།
དེ་རིང་གནམ་སའི་འདྲེས་འཚམས་དེ་ནས།།
ང་ཡི་ངག་སྒོ་ཡོངས་སུ་ཕྱེས་ཡོད།།

2015.5.31

                                 ཉི་ཟླའི་པང་གི་སྐར་ཚོམ།
                                         བུ་ཆུང་ཡག་དཀར་ལ་བྲིས་པའི་དྲུག་གཅིག་དུས་ཆེན།
                                     བྱང་དུར་མེ།

མེ་ཏོག་བཙའ་རོ་མ་འགའ་བཞད་རྗེས
ལྕང་སྡོང་གི་ཤུན་པ་ནག་རོ་དག་བརྗེས
ཟླ་དྲུག་པའི་ཚེས་མགོར
སྒེའུ་ཁུང་གི་ཕྱི་རོལ་ནས་བྱ་རྣམས་གྲག

ཁྱོད་ཆུང་དུས
ཞོགས་ཁའི་ཉི་འོད་དང་འགྲོགས་ཡོད
སྐར་ཚོམ་སྣ་ཚོགས་ལས་བབས་པ་བཞིན
ཞི་ལྷོད་དྭངས་གཙང་གི་མྱི་གཤིས་ཤིག་ཡོད
ཕུགས་བསམ་དཀར་པོ་ཞིག་བསྒོམས་ཡོད

དེ་དུས། ཁྱོད་ཀྱང་ཆུང་ཆུང་ཡིན
ཆུང་དུས། སྨུག་སྤྲིན་དང་ཁ་བ་མེད
རྨི་ལམ་དཀར་པོ་ཁོ་ན་ཡིན
སུན་སྣང་དང་ན་བུན་མེད
མེ་ལོང་ནས་བལྟས་ན་དྭངས་གསལ་ཡིན
མ་ལོ

2015/6/1

                                 ཉི་ཟླའི་པང་གི་སྐར་ཚོམ།
                                          བེ་དུང་།
ཕ་མའི་ཤ་རུས་ནས་འཕུར་བའི་ཁུ་ཁྲག་གི་གཤོག་པ་དཀར་པོ
གཤོག་པ་འདིས་ནམ་མཁའ་ཚལ་བར་གཤགས་ནས་འཕུར་དགོས
དེ་ནས    ཐལ་རྡུལ་གྱི་ནམ་མཁའ་འདི་ཁྱེད་ཁོ་ནར་དབང

ཁ་བའི་མུན་འོབས་སུ་འཕྲོས་པའི་ཉི་ཟླའི་པང་གི་སྐར་ཚོམ
སྐར་ཚོམ་དེ་ཕ་མའི་མིག་ཟུང་ལས་འོད་ཀྱིས་འཐོར་བྱུང
འོད་ཀྱི་གཤོག་པ་དེའང་ཁྱེད་ཚོ་རེད་བཞག

རེ་བ་ཁུར་བའི་ཁོད་ཡངས་པའི་རྩྭ་ཐང་གི་ལྗང་མྱུག་རློན་པ
ཟིལ་བ་རེ་རེས་དབྱངས་གསལ་གྱེར་ཞིང
འདབ་མ་རེ་རེས་རྗེས་རབས་པའི་བདེ་སྡུག་གླེང་བའི
ཤེས་རིག་གི་སྨྲ་ལྕེ་གསོན་པོ་དེ་ཁྱེད་ཅག་ག་ལ་མིན

ཉི་ཟླའི་པང་གི་སྐར་ཚོམ
གངས་ལྗོངས་ཀྱི་མིག་འབྲས་ཡག་ཤོས་ཡིན
ཡི་གེའི་རོ་མངར་ཀྱིས་གསོས་པའི་རྣམ་ཤེས་ཀྱི་ཁྱུ་ཚོགས་ལགས