འཛི

                                  མཚན་མོའི་ལེའུ།
དབྱངས་ཀྱི་ལྷོད་བག་གསེང་དུ་དལ་གྱིས་གཉིད།།
འབྲུ་ཡི་སྐྱོ་སྡུག་བར་ནས་གློ་རྡེག་སད།།
ཚོར་བའི་མཐུད་འཕྲོ་ཆད་པའི་སྔ་རྗེས་སུ།།
ཁང་མིག་འདི་རུ་སྟོང་བའི་མུན་པ་མཆེད།།

ཁྱོད་ཉིད་རྒྱང་རིང་ཞིག་ཏུ་ཇི་ལྟར་ལུས།།
ཡང་ན་དོ་ནུབ་འདི་རུ་ཇི་ལྟར་འོང་།།
སླར་ཡང་རྒྱང་ནས་རྒྱང་དུ་ཅི་ལ་ཡིབ།།
བདག་ལ་ཚོར་བའི་གློ་ལུ་ཡང་ཡང་འོང་།།

ཕྱི་ནས་ཁྱི་སྐད་རེ་གཉིས་གྲགས་ནས་འོང་།།
ནང་དུ་སྨག་རིམ་འཐུག་ནས་འཐུག་ཏུ་ཕྱིན།།
ལྐོག་ངུ་བརྒྱབ་པའི་ཡིག་ཆུང་དེ་དག་གིས།།
འོད་ངོགས་ཙམ་དུ་འཆི་བའི་བདེ་དྲོད་འཚོལ།།

དོ་ནུབ་ཁོ་བོར་མིང་ཙམ་མི་འདུག་སྟེ།།
སྒེའུ་ཁུང་འགྲམ་དུ་རླུང་བུས་ཁྱེར་གྲབས་བྱེད།།
མིང་གཟུགས་མེད་པའི་སྐད་ཆ་ཐན་ཐུན་དེས།།
བདག་གི་ཁྱིམ་དུ་སིམ་འཛུལ་ཡང་ཡང་བྱེད།།

མཁུར་གོང་བརྒྱུད་ནས་དལ་གྱིས་མར་མར་འགྲུལ།།
སྙིང་དང་མཆིན་པའི་མཚམས་སུ་བརླན་གྱིས་བབས།།
བྱང་ཐང་སྨུག་པ་རྒྱུ་བའི་ངང་ཚུལ་ཏེ།།
ཚོར་བའི་གཏིང་ན་སྟོང་བའི་ཁམས་ཆེན་གྲུབ།།

འདི་རུ་ཁྱོད་རང་གཏན་ནས་སླེབ་མྱོང་མེད།།
རྒྱུན་དུ་ང་རང་གཅིག་པུ་འདུག་དགོས་ཡོད།།
གཅིག་པུར་རང་ལ་མོལ་བའི་རྨི་བཤད་དག།
རྨི་ལམ་ནང་གི་སྐར་མ་ལེན་འཕྲོ་ཡིན།།

སླར་ཡང་སྟོང་བའི་སྣེ་ལ་སྟོང་བ་མཐུད།།
དགུན་གྱི་མཚན་ལམ་འདི་ཉིད་ཅི་འདྲའི་རིང་།།
དབྱིབས་གཟུགས་མེད་པའི་རབ་རིབ་སབ་སིབ་དག།
ཚོར་བ་རྐྱང་བས་ཡང་ཡང་གསེད་གྲོལ་བྱས།།

2014/10/ 24མཚན་མོར་ཚོར་བ་མ་ནོན་པར་ངུ་བཞིན་དུ་བྲིས།

                                  འོག་འགྱུ་ལྗང་ཁུ།
སྤྲིན་དང་སྨུག་པ་འདི་དག་སུ་ཡིས་བྱས།།
ཉི་ཤར་ཉི་ནུབ་ཟེར་བ་ཇི་ལྟར་འོང་།།
ལམ་ཕྲན་ཀྱག་ཀྱོག་དེ་དག་ཅི་ལ་གྲུབ།།
ངེས་པར་གསོན་འདུག་དགོས་པ་ཅི་ཡིས་བྱས།།

ཁོ་མོས་ལན་བུ་ཤུད་ནས་ལྐོག་ངུ་བྱེད།།
ཁོ་པས་ངོ་གདོང་སྐམས་ནས་འཁངས་ར་བྱེད།།
ཡིན་ཡང་མུ་རུ་འཚོ་བ་ཅི་ཡིན་ནམ།།
ལྷག་ཏུ་འགྲུལ་བཞུད་དགོས་པ་ཅི་ཡིན་ནམ།།

ལམ་ནི་འཕྱོན་མའི་ཞལ་གྱི་འཛུམ་མདངས་བཞིན།།
ཡལ་ག་མང་བོ་ཕྱོགས་བཞི་གང་སར་བསྲིངས།།
རྐང་གི་ལྷམ་ཆུང་ཐེད་ནས་སར་ཟགས་ཀྱང་།།
ཁྱོད་ཀྱིས་འདོད་པའི་གནས་དེར་སླེབ་བམ་ཅི།།

མདུན་བསྐྱོད་གོམ་སྒྲ་རེ་རེར་འཕངས་སེམས་སྐྱེས།།
ཁོ་ཚོའི་སྐྱོ་སྡུག་རེ་རེར་འཁངས་ར་ཤོར།།
ང་ནི་སྨྱོ་ཆུ་འཐུང་བའི་སྨྱོན་པ་སྟེ།།
ཀུན་གྱིས་འདོར་བའི་གད་སྙིགས་ནང་དུ་འཚོ།།

རིམ་བཞིན་གཉོམ་ལག་རྒྱས་པ་ནོར་འཁྲུལ་ཞིག།
བདག་གཞན་གཉིས་སུ་ཤེས་པ་ནོར་འཁྲུལ་ཞིག།
སྔར་བཞིན་མཚར་འདྲི་མང་བའི་བྱིས་དུས་བཞིན།།
ཉི་མ་འཁྱོལ་ཐབས་ཙམ་གྱིས་ཅིས་མ་ཆོག།

མི་ཚེ་ཐུང་ཐུང་འགྲིག་རྡེའུ་དཀར་ནག་བཞིན།།
གཞན་གྱི་མཐེབ་མོའི་རྗེས་སུ་འགྲོ་ལྡོག་བྱེད།།
འདི་ལ་བསམ་ནས་ཆང་ཁང་ནག་པོ་རུ།།
མྱི་སྡོམ་འགའ་རེ་ཆེད་དུ་བསྐྱེད་བསྲིང་འདོད།།

ཁྱེད་ཚོ་ང་རང་དང་ལེན་བྱེད་པར་སྐྲག།
ང་ཡང་ཁྱེད་ཚོར་འགྲོག་པར་ཧ་ཅང་སྐྲག
དེ་བས་དུད་སྣེ་གཅིག་གི་མགོ་རྐང་བར།།
འོག་རླུང་འདི་ལ་ཐེངས་གཅིག་བསྣམ་པར་མཛོད།།

2014/11/3ལ།

                                  ཁྱོད་ཀྱི་རབ་རིབ།
ང་རང་ས་སྲོད་ཅིག་ལ་འདི་རུ་འོང་།།
ད་དུང་ཐག་རིང་ཞིག་ཏུ་འགྲོ་དགོས་སྙམ།།
ཁྱོད་ཀྱང་རྒྱང་རིང་གླེང་གིན་འདི་རུ་ལྷག།
ལས་བྱ་མུ་མེད་ཅན་ཞིག་འབྲི་དགོས་ཡོད།།

ཚིག་གི་འདེགས་འཇོག་བར་ནས་ང་ལ་བལྟས།།
མེ་ཏོག་སོ་མ་འདྲ་ཞིག་ཁྱོད་ཀྱིས་རྙེད།།
ཆར་བ་མཚེའུ་ནང་སིམ་པ་ཅི་འོ་ཞེས།།
ཆོས་ཉིད་འཕྲ་ས་དག་ལ་མགོ་ཡང་འཁོར།།

ཚོར་བའི་ཟབ་ས་ཞིག་ནས་ཁྱོད་རང་བཙལ།།
མཛེས་པའི་སྙིང་རྗེ་འདྲ་ཞིག་ཁོ་བོས་རྙེད།།
མཚན་ལམ་རེ་ལ་གཅེས་ཞེས་བསྐྱར་ཟློས་བྱས།
ཁྱོད་ཀྱི་རབ་རིབ་དག་ཏུ་ཡང་ཡང་ཉུག།

མདང་ནུབ་གཉིད་མ་སད་ལ་བཟློ་བ་ཡི།།
ཚིག་འབྲུའི་བར་གསེང་དག་ཏུ་དེ་རིང་འཁྱམ།།
ར་སྐོར་ཅི་དང་གང་ལ་ཤོང་མིན་པའི།།
སེམས་འདི་ཁྱོད་ཀྱིས་ཇི་ལྟར་ཟིན་པ་ལགས།།

དུས་ཚོད་སྐར་ཆ་དག་ཏུ་འཚུབ་བུ་ལྡང་།།
སེམས་ཀྱི་དབེན་ས་ཞིག་ཏུ་གནས་ཚང་བཅས།།
ཁྱོད་དང་འདྲ་བའི་ཁྱོད་རང་བརྒྱ་ཕྲག་འོང་།།
སྙིང་གི་ལྷུ་ལག་དག་ལ་ཐུབ་ཚོད་བྱས།།

ལས་ལ་རང་དབང་མི་འདུག་མ་བརྗོད་དང་།།
སེམས་པུ་རྒྱང་རིང་ཁོ་ནར་མ་ཕྱོགས་དང་།།
ཟིལ་ཐིགས་འདབ་ལོ་ཁུད་ནས་འགྲིལ་བ་བཞིན།།
མཚོ་ནང་མེ་ཏོག་སྐྱེས་པ་ཇི་ལྟར་བྱེད།།

ཚུར་བཤད་སྐད་ཆའི་འབྲུ་དག་མོག་ཅིང་མོག།
དབྱངས་ཀྱི་འཕར་ལྡིང་དག་ལ་ཚོར་བ་འཕེལ།།
དུས་ཚོད་སྐར་ཆ་དེ་དག་ཇི་ལྟར་བཞུར།།
མཚན་སྨད་འདི་ལ་རང་ཉིད་གཅིག་པུ་སད།།

སྟན་ཐོག་ཁ་སྦུབ་ཉལ་ཏེ་སྙན་ངག་བྲིས།།
ཐ་སྙད་སྙིང་རྗེ་འགའ་ཞིག་གཅིག་སྡུད་བྱས།།
སྔར་བཞིན་ཡོལ་བའི་རྒྱབ་ན་རབ་རིབ་ཅིག།
ཟིན་དེབ་ངོས་སུ་རང་དང་གཞན་ཞིག་བབས།།

རང་བཞིན་ལྕེ་ཡིས་ཤེས་བྱའི་ཉིད་ཀྱང་ཁྲོལ།།
འོན་ཏེ་དེ་ཡི་དུས་ན་ཏ་མ་ཏིག།
མིག་གིས་བདག་ལ་འཆད་རོགས་འདྲ་ཞིག་བྱས།།
ལག་པས་ལག་པ་འཕུར་བཞིན་སེམས་ངོས་བསྟན།།

ད་ནི་ཁྱོད་ཀྱང་བདག་གིས་རྙེད་ཙམ་བྱུང་།།
ལམ་གྱི་ཀྱག་ཀྱོག་དག་ལ་གཞའ་མི་འཚལ།།
ལུས་འདིས་གཉིད་ཐུན་ཙམ་ཞིག་འཁྱོངས་མིན་ཡང་།།
སེམས་འདིས་ཞིང་གཞན་དག་ཀྱང་དྲན་འགོ་བརྩམས།།

2013.12.3ལ།