རྡོ་རྗེ་དོན་གྲུབ་ཀྱི་རང་མོས་སྙན་ངག་ཁག་གཉིས་བདམས་བཀོད།

ཚེ་གྲོགས།
གཞས་ཚིག

སེམས་འཕྲིན་སྙིང་གཏམ་དྲོན་མོ། །
ཚུར་བསྐྱལ་རླུང་ལ་བསྐུར་དུས། །
ཁྱེད་ཀྱི་ཞལ་རས་དུང་ཟླ། །
ནམ་ཡང་བརྗེད་ཐབས་མི་འདུག །
ལོ་ཟླའི་འཁོར་བསྐྱོད་བར་ནས། །
ཕན་སྐྱོང་ལན་མང་མཛད་པས། །
ཚེ་གྲོགས་འདི་ཕྱིའི་བར་དུ། །
གཞིས་བྱེས་འཛོམས་པའི་སྨོན་ལམ། །
གཡང་ཆགས་གངས་ཅན་ལྗོངས་ནས། །
མཛའ་མཐུན་གཡུ་མོ་ཟེར་བ། །
ཚེ་རབས་འདི་ཡི་གཏན་གྲོགས། །
དུས་གསུམ་བརྟན་པའི་སྨོན་འདུན། །

ཙོང་ཁ་བདེ་ཁམས།

ཙོང་ཁ་བདེ་ཁམས
སྔོན་བྱོན་གྱི་སྐྱེས་ཆེན་ཚོས
ཁྱེད་ཉིད་ཀྱི་སྙན་པ་རྒྱལ་ཁམས་ཀྱི་གཏོས་སུ་དྲངས་མྱོང
མཚར་སྡུག་དང་ཡུལ་ཁོབས་ཀྱིས་བཞེས་པའི་ལོ་རྒྱུས་ཀྱི་རྟོགས་པ
གཟི་ཉམས་ཀྱིས་ཞུགས་པའི་བཀོད་རིས
བསྟན་པ་རྒྱས་མཛད་ཀྱི་རླབས་བཀོད
མཁས་བཙུན་བཟང་གསུམ་གྱི་ཕྱག་བསྟན་དང་ཞབས་ཀྱིས་བཅགས་ས

ཙོང་ཁ་བདེ་ཁམས
དེབ་ཕྲེང་གླེགས་བམ་ཁྲོད་ན
གཟི་སྤོབས་ཆེ་ཞིང་གྲགས་པ་འབར
རྒྱལ་རྒྱུད་འཁོར་གྱི་མཛད་པ་བསྐྱངས་ས

ཙོང་ཁ་བདེ་ཁམས
དེ་དུས ཁྱེད་ཉིད་ཀྱི་གྲགས་པ་ཧི་མ་ལའི་བྱང་རྒྱུད་ཀྱི་སྤྲིན་པའི་ཀློང་དུ་འཁྱུག་མྱོང་ལ
ཙོང་ལ་རིང་མོའི་ཁུགས་སོ་ན་རྒྱུ་བའི་ཙོང་ཆུ་དྭངས་མོས
ས་དོག་མོའི་ཆུ་ལག སྨིན་གྲོང་ཁ་བའི་ལྗོངས ས་འཛིན་གྱི་ཐིག་ལེ
དབུས་མཐའི་བཀོད་རིས་བཅས་བཅུམ་ཡང་མྱོང
ཁ་སང ཨ་ཐང་ཆད་པའི་ཙོང་ཆུ་བཞུར་དལ་ཉམས་ཤིང་རླབས་སྒྲ་ཆུང
མི་ཚོགས་དང་གྲོང་ཁྱེར་གྱི་འཛེར་སྒྲས་རླབས་ཤུགས་བཅོམ་སོང
ད་དུང ཡུལ་བཀོད་ཀྱི་མཛེས་རིས་ཀྱང་བསྒྱུར་ཟིན་བདའ
སྐྱ་ཐིང་ཐིང་གི་ས་རིས་ལ་བཀྲག་མདངས་ཀྱི་མཚོན་རིས་ཕབ་བྱུང
དེ་རིང སྙན་པ་རྒོད་ཅིང་ཉམས་པ་རླིང་མོད་ཀྱི
འགོས་ནད་ཕོག་པའི་འབུ་ཕྲ་བཞིན་བར་དོའི་ཁམས་སུ་མྱུལ
བ་ཚྭ་ཅན་གྱི་ས་རིལ་བཞིན
མི་ཚོགས་ཀྱི་རྐང་བར་ནས་ས་བཅག་རྡོ་བཅག་ཐེབས་སོང
ལྷ་སའི་བར་སྐོར་དུ་ལུས་པའི་སྤྲང་པོ་བཞིན
མཇལ་སྐོར་ཕྱག་དད་པ་རྣམས་ལ་འཐམ་ཞིང་ངུ་འབོད་བྱེད
གཙང་ངོགས་ཀྱི་གྲམ་པའི་ཁྲོད་དུ་ལུས་པའི་གད་སྙིགས་བཞིན་གཙང་ཆུས་ཕ་མཐར་བསྐྱེད
ཁབ་ལེན་རྡོ་ཡི་འདྲེན་ཤུགས་ཇི་བཞིན་གྲོང་ཁྱེར་གྱི་ལྕགས་སྙིགས་དང་འབྱར་ཞིང
གཅེས་འཛིན་གྱིས་དབུལ་པས་གཡའ་དང་དྲི་མས་བསྣོགས
སང་ཉིན ཉི་ཟླའི་འཆར་ནུབ་དང་ལྷན་དུ་སྤྲིན་པའི་གསེབ་ཏུ་གཡའ་པར་ངེས

སྤྱི་ལོ2015ལོའི་ཟླ5བའི་ཚེས14ཉིན་གནའ་མཁར་ཟི་ལིང་གྲོང་ནས་བྲིས།