མགོ་ལོག་ཆུ་ཐིགས་ཀྱི་སྲོལ་རྒྱུན་སྙན་ངག་ཁག་བཞི།

                རླུང་དང་མི།
                               མགོ་ལོག་ཆུ་ཐིགས།

སྡོང་ལོའི་གསེབ་ཀྱི་རླུང་བུ་འཇམ་པོས།།
ང་རང་འདི་ནས་གང་ལ་སྤུར་འགྲོ།།
ལམ་སྒྲོན་འོག་གི་ཆར་བ་དེ་ཚོ།།
ལས་དབང་བཀྲུ་བའི་ཕོ་ཉ་ཡིན་ནམ།།
སྐྱ་མོའི་ལམ་གྱི་ལང་ཚོ་ཡིན་སྲིད།།
མཐོང་སྣང་ཁྲོད་ཀྱི་སྨུག་པའི་རི་བོ།།
ཉི་ཟེར་ནང་གི་གཞིས་ཁྱིམ་ཡིན་ན།།
ལོ་མའི་སྟེང་གི་འདས་མ་ད་གསུམ།།
ས་སྲོད་འདི་ཡི་མིག་ཆུ་ཡིན་པས།།
རང་ཉིད་བཀྲུ་བའི་རྫིང་བུ་ཡིན་འགྲོ།།
                         2015.10.16 ཁྲིན་ཏུའུ་ནས།

                གྲིབ་མ།
              
མི་ནི་གྲིབ་མའི་ངོ་བོར་ཐིམས།།
གྲིབ་མའི་ཁམས་སུ་གནས་ཚང་བཅས།།
འཁོར་བའི་རང་བཞིན་རི་མོར་བྲིས།།
བྲིས་པའི་འཇིག་རྟེན་གཙང་མ་ལ།།
རང་གི་ལྷ་ཚོགས་གདན་དྲངས་ནས།།
རོལ་མོའི་ནང་གི་མཆོད་རྫས་ཚོགས།།
སྣང་བའི་དབྱངས་སུ་བཀུག་པ་ན།།
གཞན་དག་ཚོགས་ཀྱང་བྲེལ་བྲེལ་བྱེད།།
"བདག་གི"་འཁོར་བའི་གཙང་བོ་ལ།།
མུན་པའི་རྣམ་ཤེས་"རང་འཁོར"་རྒྱག།
                 2015.10.18 ཁྲིན་ཏུའུ་ནས།

          མུན་པའི་གཞས།
              
ཁྱོད་རང་འདི་ནས་སོང་བས་མོད་ལ།།
ང་ཡི་ཅི་ཞིག་ནུབ་པར་བྱས་སོང་།།
ང་ལ་དབང་བའི་མུན་པའི་གཞས་ཤག།
གདུང་བའི་ཁྲོད་ཀྱི་དབྱངས་རྟ་ཡིན་ན།།
ཁྱོད་ཀྱིས་དེ་ལ་དབྱངས་ཤིག་བརྩམ་སྟེ།།
བརྩེ་བའི་འཇིག་རྟེན་གར་ལ་རོལ་ཤོག།
ང་ཡི་སྐྱ་རེངས་མྱུར་མོར་སུས་ཤོག།
མི་ཚོགས་བཞུར་སའི་ལམ་མདོ་དེ་ནས།།
འཁོར་བའི་ངོ་བོ་ཁྲུས་ལ་ཞུགས་སོང་།།
སྨུག་སྤྲིན་ནང་གི་འོད་ཟེར་ལྗང་ཁུ།།
ངེད་གཉིས་ལས་ཀྱི་མདུད་པ་ཡིན་ན།།
རྨས་རྐྱོན་ཕོག་པའི་ཟླ་བའི་རྗེས་ཤུལ།།
སུ་ཡི་མི་ཚེའི་རི་མོ་ཡིན་སྲིད།།
མེ་ལོང་ནང་གི་འབྱུང་འགྱུར་"མོག་པོར"།།
ཉི་མའི་འོད་ཀྱིས་"གསལ་བ"་མི་དགོས།།
                           2015.10. 20 ཁྲིན་ཏུའུ་ནས།

                  གྲོང་ཁྱེར།
                        
བཅུད་ཀྱི་རྣམ་འགྱུར་གཞི་ནས་འགྱུར་ཏེ།།
འཇིག་རྟེན་མང་ཤོས་ཆུ་ལ་ཤར་ནས།།
བདག་གི་སྣང་བ་ཉི་མས་རྒུམ་སོང་།།
ཤོག་བུའི་སྟེང་གི་ལས་དབང་གཉོམ་པོ།།
ནུབ་ཁའི་གཟུགས་རིས་ཡིན་ཡིན་འདྲ་བས།།
སྐར་འོད་འཐོར་སའི་ཆུ་བོ་སྔོན་པོ།།
རེ་བའི་སྟོན་ལོ་འཐོར་ས་ཡིན་འགྲོ།།
མི་ཚོགས་ཁངས་ལ་འདྲེས་མཚམས་དེ་ནས།།
དུས་གསུམ་ཡོད་ཚད་ཙག་གིས་བསྡམས་སོང་།།
བ་སྤུའི་ཐོག་གི་ཐལ་རྡུལ་སྐྱ་བོ།།
རླུང་ལ་བསྐུར་བའི་སྨོན་པ་ཟད་པོ།།
ག་ནས་བོར་བ་ཡེ་ནས་མ་ཤེས།།              
                               2015.10.24 ཁྲིན་ཏུའུ་ནས།