སྨན་གསར་ལུགས་ནི་དུས་རབས་བཅུ་བདུན་པར་དབུས་གཙང་དུ་བྱུང་བའི་རི་མོའི་འབྲི་ལུགས་ཤིག་ཡིན་ཞིང་།འདི་ནི་སྨན་ཐང་ལུགས་ལ་དཔེ་བགྱིས་པའི་རྨང་གཞིའི་སྟེང་བྱུང་བས་སྨན་ལུགས་གསར་མ་ཞེས་མིང་བཏགས་པ་རེད།དཔྱད་རྩོམ་འདིར་སྨན་གསར་ལུགས་ཀྱི་སྲོལ་གཏོད་མཁན་སྤྲུལ་སྐུ་ཆོས་དབྱིངས་རྒྱ་མཚོས་བཀྲ་ཤིས་ལྷུན་པོ་དང་པོ་ཏ་ལ་སོགས་སུ་སྐུ་བརྙན་བཞེངས་པའི་བརྒྱུད་རིམ་དང་།དེ་མིན་སྐབས་དེའི་ལོ་རྒྱུས་རིག་གནས་རྒྱབ་ལྗོངས་དང་སྦྱར་ཏེ།འབྲི་ལུགས་དེ་ཉིད་འཕེལ་རྒྱས་སུ་ཕྱིན་པའི་རྒྱུ་མཚན་དང་།སྨན་གསར་ཞེས་པའི་མིང་ཇི་ལྟར་བྱུང་ཚུལ་སོགས་ལ་དཔྱད་པ་བཏང་ཡོད།...

དཔྱད་རྩོམ་འདིར་མཁས་དབང་དགེ་འདུན་ཆོས་འཕེལ་གྱི་ཆུང་གྲོགས་རྗེས་དྲན་ནམ་འདུ་འབྲལ་སྙིང་པོ་མེད་པར་རྟོགས་པའི་གླུ་ལས་རྩོམ་འདིའི་ལོ་རྒྱུས་རྒྱབ་ལྗོངས།དེ་མིན་སྙན་རྩོམ་གྱི་ཐུན་མོང་མ་ཡིན་པའི་སྒྱུ་རྩལ་རིན་ཐང་ལ་རང་ནུས་ཀྱིས་རགས་ཙམ་དཔྱད་བརྗོད་བྱས་ཡོད།...

]མིང་རྒྱལ་རབས་ཀྱིས་བོད་ལ་དབང་སྒྱུར་བརྟན་པོ་ཡོང་ཆེད་གྲུབ་མཐའ་ཆེ་ཁག་དང་ཡུལ་ཁག་གི་ཚབ་མཚོན་མི་སྣར་འཇའ་ས་དང་ཆོ་ལོ་བསྩལ་ནས་རིན་ཆེན་ཆོས་རྗེ་དང་།ཐེག་ཆེན་ཆོས་རྗེ།བྱམས་ཆེན་ཆོས་རྗེ་ལྟ་བུ་བཅས་པ་བྱོན་ལ།དེ་བཞིན་དུ་མདོ་སྨད་མེན་ཇུ་(岷州)ནས་འཁྲུངས་པའི་བླ་ཆེན་དཔལ་ལྡན་བཀྲ་ཤིས་མཆོག་ལའང་གོང་མས་བློ་ཆེན་ཆོས་རྗེ་ཞེས་པའི་འཇའ་ས་བསྩལ་བར་མངོན་མོད།འོན་ཀྱང་ཆོས་རྗེ་གང་ཉིད་ཀྱི་རྣམ་ཐར་དང་མཛད་རྗེས་སྐོར་ལ་ཉེ་ཆར་རྣམ་ཐར་རྒྱ་འགྱུར་མའི་དཔེ་རྙིང་རྩ་ཆེན་ཞིག་ཀན་སུའུ་མེན་ཞན་རྫོང་(岷县)ནས་རྙེད་པ་ཙམ་ལས་ད་ཕན་བར་དུ་འདིའི་སྐོར་གྱི་ཡིག་ཆ་དང་ཞིབ་འཇུག་བྱས་པ་སྟོང་ཆར་ལུས་ཡོད།དེ་བས་འདིར་གསར་དུ་རྙེད་པའི་གང་ཉིད་ཀྱི་རྣམ་ཐར་གཞིར་བཟུང་ནས་འབྲེལ་ཡོད་ཀྱི་ཡིག་ཆ་དག་གིས་ཟུར་བརྒྱན་ཏེ་བློ་ཆེན་ཆོས་རྗེའི་མཛད་རྗེས་སྐོར་ངོ་སྤྲོད་བྱས་པ་ཡིན།...

དཔྱད་རྩོམ་འདིར་ད་ཡོད་རྒྱལ་ཁབ་ཕྱི་ནང་གི་འབྲེལ་ཡོད་དཔྱད་ཡིག་གུང་བསྒྲིགས་ནས་བརྟགས་ན་སློབ་དཔོན་ཆོས་མཆོག་ནི་དུས་རབས་བརྒྱད་པའམ་སྤྱི་ལོ་བདུན་རྒྱའི་ནང་དུ་བྱོན་པའི་མཁས་དབང་ཞིག་ཡིན་པ་དང་།ཁོང་གི་འཁྲུངས་ཡུལ་རྒྱ་གར་དང་ཀསྨིར་གང་ཞིག་ཡིན་མིན་ཐད་ལ་དོགས་སློང་མཛད་པ་མ་ཟད།སློབ་དཔོན་གང་ཞིག་བསྟེན་མྱོང་བ།སྒོས་སུ་ཁོང་ལ་གསུང་རྩོམ་གཙོ་བོ་ཆེ་བ་གང་དང་གང་ཡོད་མེད་སྐོར་སོགས་གླེང་འདུག ...

དཔྱད་རྩོམ་འདིར་བོད་ཀྱི་དུས་རབས་རིམ་བྱུང་གི་ལོ་རྒྱུས་ཡིག་ཚང་ལས་བྱུང་བའི་ཙོང་ཁ་ཞེས་པའི་མིང་ནི།སྤུ་རྒྱལ་བཙན་པོའི་དུས་སུ་ཙོང་ཀ་དང་ཙོང་ཀ་ཆེ་ཆུང་།རྒྱའི་མཁར་ཙོང་ཀ་ཆེན་པོ་ཞེས་མདོ་སྨད་ཀྱི་ཡུལ་གྲུ་བྱེ་བྲག་པར་ངོས་འཛིན་པ་དང་།བོད་སིལ་བུའི་དུས་ནས་ས་ཕག་རིན་གཙང་གི་སྐབས་སུ་ཁམས་སམ་ཙོང་ཁམས།ཙོང་ཁ་བདེ་ཁམས།ཙོང་ཁའི་རྒྱལ་ཁམས།ཙོང་ཁའི་ཡུལ་ཆེན་བཅོ་བརྒྱད་ཅེས་ཨ་མདོ་སྤྱི་ལ་ངོས་འཛིན་པ།དགའ་ལྡན་ཕོ་བྲང་གི་སྐབས་ནས་དེང་གི་བར་དུ་ཙོང་ཆུའི་ལྷོ་བྱང་གི་ཡུལ་གྲུ་བྱེ་བྲག་པར་ངོས་འཛིན་པ་བཅས།མདོར་ན་ཙོང་ཁ་ཞེས་པའི་མིང་ནི་མདོ་སྨད་ཀྱི་ཡུལ་གྲུ་བྱེ་བྲག་པ་ནས་མདོ་སྨད་སྤྱི།དེ་ནས་ཙོང་ཆུའི་ལྷོ་བྱང་རྒྱུད་ཀྱི་ཡུལ་གྲུ་བྱེ་བྲག་པར་ངོས་འཛིན་པའི་ཚུལ་གྱི་མིང་གི་འཕོ་འགྱུར་ལ་དཔྱད་པ་བཏང་ཡོད།...