སྒྲུང་ལྡེའུ་བོན་གསུམ་གྱིས་ཆབ་སྲིད་ཇི་ལྟར་བསྐྱངས་ཚུལ་ལ་གསར་དུ་དཔྱད་པ།

གསུམ། བོན་གྱིས་ཆབ་སྲིད་ཇི་ལྟར་བསྐྱངས་པ།
        འདིར་བོན་ཞེས་པ་ནི་ལྟ་གྲུབ་ཅིག་གམ་དེའི་སྲོལ་འཛིན་པའི་གང་ཟག་ལ་གོ་དགོས། སྲོང་བཙན་གྱི་ཡར་སྔོན་ན་བོན་གྱི་བསྟན་པ་རྒྱ་ཆེར་དར་བས་དེས་ཆབ་སྲིད་ལ་ཤུགས་རྐྱེན་ཞིག་མི་ཐེབས་པ་གཏན་ནས་མི་སྲིད། དེ་ཡང་རྒྱལ་ཕྲན་བཅུ་གཉིས་རྒྱལ་བོ་བཙལ་བའི་གནད་དེ་ཡང་བོན་ལ་འབྲེལ་ཏེ《མཁས་པའི་དགའ་སྟོན》ལས། “དེ་ཚེ་བོད་མི་སྐལ་ལྡན་འགའ་ཡིས་མཐོང༌། བཙན་པ་ལྷོ་དང་གཉགས། བཙུན་པ་ཁྱུང་དང་སྣུབས། གཉན་པ་སེ་དང་སྤོ་སྟེ་ཡབ་འབངས་རུས་དྲུག་དང་ལྷ་བོ་ལྷ་སྲས། སེ་བོན་རྨ་བོན། ཅོག་ལ་བོན། ཞང་ཞུང་བོན། ཚེ་མི་བོན་སོགས་ཤེས་པ་ཅན་བཅུ་གཉིས་དང་མཇལ⑼”ཞེས་གསལ་བ་དེ་ལས་བོན་གྱི་མི་སྣས་རྒྱལ་ཕྲན་གྱི་ཚབ་བྱས་ཏེ་རྒྱལ་བོ་སྲིད་ལ་དབང་བསྐུར་བ་དེ་ལ་བལྟས་ན་བོན་གྱི་ཤེས་པ་ཅན་དེ་དག་བོད་མི་ཡོངས་ཀྱིས་ཁས་ལེན་པའམ་དབང་ཤུགས་ངེས་ཅན་ཞིག་ཡོད་པ་མཐོང་ཐུབ་ལ། དེའི་ཕྱིར་གཉའ་ཁྲི་བཙན་པོ་བོན་གྱི་ཚབ་བྱེད་མི་སྣ་ཞིག་ཡིན་པར་མ་ཟད། དེ་དང་ལྷན་ཏུ་སྐུ་གཤེན་བྱུང་བ་དེས་བཙན་པོའི་ཆབ་སྲིད་ལ་བོན་གྱི་རྒྱབ་སྐྱོར་གྱི་ནུས་པ་ཆེན་པོ་ཞིག་ཐོབ་ཡོད་ཅིང༌། དེ་ལས་རྒྱལ་བོ་དང་བོན་ཟུང་དུ་སྦྲེལ་ནས་ཆབ་སྲིད་སྐྱོང་བ་རགས་ཙམ་ཤེས་ཐུབ། དེ་དུས་ཀྱི་བོན་ཞེས་པ་ནི། འབྲས་བུའི་བོན་བདེ་མཐོ་རིས་ཀྱི་ལམ་སྟོན་པ་དང༌། རྒྱུའི་བོན་མི་ནོར་རྒྱས་བྱེད་ཕྱཱ་གཡང་འགུགས་པ། བར་ཆད་སེལ་བྱེད་མདོས་གཏོ། ལེགས་ཉེས་སྟོན་བྱེད་མོ་རྩིས་བྱེད་པ་ལ་བོན་ཟེར་ཞིང༌། རྒྱལ་བོས་དེ་དག་བྱེད་མཁན་ཞིག་ཨ་མཆོད་དུ་བསྟེན་ནས་རྒྱལ་སྲིད་ཀྱི་དོན་དུ་གཡང་འགུགས་མདོས་གཏོ། མོ་རྩིས་བྱས་ཏེ་ཆབ་སྲིད་ཀྱི་གནད་དོན་ཐག་གཅོད་པ་དང༌། རྒྱལ་བོའི་བློ་འདྲི་ས་བྱེད་ཅིང་ཆོས་སྲིད་གང་ལའང་ནུས་པ་ཆེན་པོ་འདོན་པ་སྨོས་མི་དགོས་སྙམ། འོ་ན་ཆབ་སྲིད་ཀྱི་ཕྱོགས་གང་ཐད་ནས་ནུས་པ་ཐོན་ཞེ་ན་ཁོ་བོས་དབྱེ་ཞིབ་ཅུང་བྱས་པ་ལས་འདི་ལྟར་བརྗོད་འདོད།
(1)རྒྱལ་བོའི་སྐུ་དང་ཆབ་སྲིད་ཀྱི་བདེ་འཇགས་ལ་ནུས་པ་ཐོན་པའི་སྐོར།
        དེ་ཡང《མེ་ཏོག་སྙིང་བོ》ལས། “རྒྱལ་བོའི(གཉའ་ཁྲི)རིམ་གྲོ་བ་བོན་པོ་ཅོ་ན་གཤེན་གྱི་ཕྱག་གར་ཚ་དང༌། འཚེ་མི་གཤེན་བུ་རྒྱལ་ཚ་གཉིས་ཀྱིས་སྐུ་བསྲུངས་སོ། །དེའི་སྲས་དིང་ཁྲི་བཙན། དེའི་དུས་སུ་ཞང་ཞུང་བོན་ཤུན་འདུས་ཐེག་ཆེན་གྱིས་སྐུ་བསྲུངས་སོ། །དེའི་སྲས་མུ་ཁྲི་བཙན་པོ། བོན་པོ་གཤེན་པོ་ཚེ་རྒྱལ་གྱིས་སྐུ་བསྲུངས་སོ། །དེའི་སྲས་སྲིབས་ཁྲི་བཙན་པོ། ཞང་ཞུང་གཤེན་པོ་ཀུན་རིགས་རྒྱལ་བོས་སྐུ་བསྲུངས་སོ། །⑽”ཞེས་འབྱུང་བ་བཞིན་བོད་ཀྱི་ལོ་རྒྱུས་རྣམས་སུ་སྲོང་བཙན་སྔོན་དུ་རྒྱལ་བོ་རེ་རེར་སྐུ་གཤེན་ནམ་སྐུ་སྲུང་རེ་ཡོད་པ་དེ་ནི་བོན་པོའི་མི་ཞིག་ཡིན་པ་མ་ཟད་མཐུ་ནུས་ཆེ་ཞིང་རྒྱལ་བོས་ཆབ་སྲིད་ཀྱི་དགོས་མཁོ་ལ་བརྟེན་ནས་བླང་དོར་འདྲི་ས་ཞིག་རེད། སྐུ་གཤེན་གྱིས་རྒྱལ་བོ་གནམ་ནས་ཆད་པའམ་བོན་གྱི་ལྷ་ག་གེ་མོའི་སྤྲུལ་པ་ཡིན་པའི་གཏན་ཚིགས་བརྗོད་དེ་བོན་ལ་དད་པའི་དམངས་ཚོགས་ཀྱི་བསམ་བློའི་འཁོར་ཕྱོགས་བེད་སྤྱད་ནས་རྒྱལ་བོའི་ཆབ་སྲིད་སྲ་བརྟན་ལ་ནུས་པ་ངེས་ཅན་ཞིག་ཐོན་ཡོད། མདོར་ན། ཕན་ཚུན་ལ་ཡོད་པའི་ཕྱོགས་གཉིས་ཀྱི་ཁེ་ཕན་དེར་བརྟེན་ནས་སྤྱི་ཚོགས་དང་ཆབ་སྲིད་ཀྱི་བདེ་འཇགས་ཐད་ནུས་པ་གང་མང་ཞིག་བཏོན་པ་མ་ཟད་བོན་ཆོས་སྤེལ་བ་ལའང་ཕན་ནུས་ཆེན་པོ་ཞིག་ཐོན་ཐུབ་ཡོད།
(2)ལྷ་གསོལ་འདྲེ་མཆོད་ཀྱི་ཁེ་ཕན་སྒྲུབ་པའི་སྐོར།
        དེ་ཡང《རྒྱལ་རབས་གསལ་བའི་མེ་ལོང》ལས། “རྒྱུའི་བོན་པོ་རིགས་བཞི་ནི། སྣང་གཤེན་བལ་ཐོད་ཅན། འཕྲུལ་གཤེན་བལ་ཚོན་ཅན། ཕྱཱ་གཤེན་ཇུ་ཐིག་ཅན། དུར་གཤེན་མཚོན་ཆ་ཅན་ནོ། །དེ་ལ་སྣང་གཤེན་ བལ་ཐོད་ཅན་གྱིས་ཕྱཱ་དང་གཡང་འགུག་ལྷ་དང་སྨན་གསོལ། དགེ་ལེགས་དང་དཔལ་བསྐྱེད་ནས་མི་ནོར་རྒྱས་པར་བྱེད། འཕྲུལ་གཤེན་བལ་ཚོན་ཅན་གྱིས་མདོས་དང་ཡས་གཏོང༌།  སྲིད་དང་རྟེན་འཛུགས། འཕྲལ་ཕུགས་ཀྱི་འགལ་རྐྱེན་ཐམས་ཅད་སེལ་བར་བྱེད།⑾ ”ཅེས་པ་དག་ལས་གདོད་མའི་བོན་ཆོས་ཀྱིས་ལྷ་དང་འདྲེ་ངོས་འཛིན་གྱིས་དེ་དག་མཆོད་པའི་ཕན་ཡོན་དང་མ་མཆོད་པའི་ཉེས་དམིགས་བཤད་དེ། དེ་ལས་ལྷ་འདྲེས་གནོད་པ་བཟློག་པར་མདོས་གཏོ་དང་དར་ལྕོག་རྨུ་ཐག་འཐེན་པ། གཡང་འགུག དམར་མཆོད་བྱེད་པ་ལ་སོགས་ཀྱིས་རྒྱལ་བོའི་ཞབས་པད་བརྟན་ཞིང༌། སྲིད་ཀྱི་བར་ཆད་སེལ་བ་རྒྱལ་ཁམས་བདེ་ཞིང་ལོ་ཕྱུགས་ལེགས་པ་སོགས་སུ་ལེགས་ལམ་སྒྲུབ་པ་མ་ཟད། དམག་བྱེད་པའི་དུས་སུ་ཆེད་དུ་སྒྲུབ་པར་མངོན། 《མཁས་པའི་དགའ་སྟོན》ལས། “ཕྱཱ་དང་གནམ་ལ་དགའ་ཞིང་བླུན་པ་ཡི། །བོད་ཡུལ་མནའ་མི་སྤྱི་མཐུན་གཟུང་ཕྱིར་བསྟན། །སྤྱིར་ཡོ་ག་ལྷ་གྱེས་ལུགས་ལ་རྩིབས་ཀྱི་ལྷ་ཀ་ཡོལ་སྡེས་སྤྱན་དྲངས་པ་དང༌། ལྷ་གླང་རུ་དཀར་སོགས་དཀོར་ནོར་བརྫངས་ཚུལ་སོགས་དང་སྲིད་པའི་ལྷ་ཕལ་ཆེར་བྱུང་ཚུལ་དང་བཅས་པ་སྣང་ངོ༌། །⑿”ཞེས་པ་འདིར་བལྟས་ན་ལྷ་ཡི་ངོས་འཛིན་སོགས་རྒྱས་པར་གཉའ་ཁྲིའི་དུས་སུ་བྱུང་བར་མངོན་ཞིང༌། གཉའ་ཁྲིའི་དུས་ནས་གསོལ་མཆོད་རྒྱས་པར་དར་བ་དེའི་སྟེང་ནས་བཙན་པོའི་ཆབ་སྲིད་ལ་བོན་གྱི་ཤུགས་རྐྱེན་ངེས་ཅན་ཞིག་ཐེབས་པ་ཤེས་ཐུབ།
(3)མོ་རྩིས་སོགས་ཀྱིས་ཆབ་སྲིད་ལ་ནུས་པ་ཐོན་པའི་སྐོར།
        《རྒྱལ་རབས་གསལ་བའི་མེ་ལོང》ལས། “ཕྱཱ་གཤེན་ཇུ་ཐིག་ཅན་གྱིས་ལེགས་ཉེས་སྟོན། ཡིན་མིན་གྱི་ཐེ་ཚོམ་སེལ། ཟག་བཅས་ཀྱི་མངོན་ཤེས་འཆད་པར་བྱེད་དོ། །དུར་གཤེན་མཚོན་ཆ་ཅན་གྱིས་གསོན་གྱི་བགེགས་སེལ། གཤིན་གྱི་དུར་འདེབས། ཆུང་གི་སྲི་གནོན། གནམ་གྱི་རྒྱུ་སྐར་ལ་བལྟ། སའི་འདྲེ་འདུལ་བ་ཡིན་ནོ། །⒀”ཞེས་དང༌། མཁས་དབང་དམུ་དགེ་བསམ་གཏན་གྱི《དྲིས་ལན་ལི་དྭངས་རང་སྒྲ》ལས། “དེའི་དུས་ཀྱི་བོན་བརྒྱུད་འགའ་ནི། ད་ལྟ་སི་ཁྲོན་ཞིང་ཆེན་གྱི་རྒྱལ་མོ་ཚ་བ་རོང་གི་བོན་དང་ཆའང་རིགས་ཞེས་པའི་མི་རིགས་ཤིག་ཡོད་པ་དེའི་ནང་དུ་ཡོད་ལ། དེ་དག་ལ་ཡི་གེ་མེད་ཀྱང་ཕས་བུ་ལ་ངག་ཐོག་ནས་སློབ་པར་བྱེད། གཡང་འགུག མདོས་གཏོ། མོ་རྩིས་སོགས་བྱེད་པ་མ་ཟད། ད་དུང་མདའ་དང་ཅོག་ཙེ་སོགས་ལ་ལྷ་ཕབ་རྒྱུ་དང༌། ལྕགས་བསྲེག་ལ་ལྕེས་བལྡག་སྟེ་སྔགས་འདེབས་པ་སོགས་འཕྲུལ་སྣང་སྣ་ཚོགས་སྟོན་རྒྱུ་ཡོད་ལ་ལྟ་བ་དང་གྲུབ་མཐའ་ལས་འབྲས་སོགས་བཤད་རྒྱུ་ཅང་མེད་ཟེར⒁”ཞེས་པ་དག་ལ་བསམ་ན་རྒྱུ་བོན་རིགས་བཞིའི་གསུམ་པ་མོ་བ་ཡིན་པས་དེའི་དུས་སུ་དམག་ལ་འགྲོ་བ་དང༌། རྒྱལ་བོ་ཁྲིར་འདོན་པ། ཁྲིམས་ལུགས་གཏན་ལ་འབེབ་པ། དགའ་སྟོན་རྟེན་འབྲེལ། ཕོ་ཉ་འགྲོ་འོང༌། བཙུན་མོ་བཞེས་པ། ཕྱི་ཕྱོགས་ལ་འབྲེལ་བ་འཛུགས་པ་སོགས་ཆབ་སྲིད་དང་འབྲེལ་བའི་བྱ་བ་ཆེ་ཆུང་མང་བོའི་མཐའ་མའི་ཐག་གཅོད་མོ་དང་ལྷ་ཕབ་པ། བཟང་ངན་གྱི་ལྟས་ལ་བརྟག་སྟེ་བྱེད་ཅིང༌། སྲོལ་དེ་རིམ་བཞིན་དགའ་ལྡན་ཕོ་བྲང་བར་དུ་བྱོན་ལ། བཀའ་ཤག་གིས་སྐུ་རྟེན་ལ་བརྟེན་ནས་གནད་དོན་ཆེན་པོ་དག་ཐག་གཅོད་པ་དེས་ཀྱང་གསལ་བོ་མཚོན་ཐུབ། ཐུའུ་བཀྭན་བློ་བཟང་ཆོས་ཀྱི་ཉི་མས“བོན་ཞེས་སྨད་ཀྱང་གལ་ལ་ཐུག་པའི་དུས། །བོན་པོ་ཇུ་ཐིག་ཅན་ལ་བླང་དོར་འདྲི⒂”ཞེས་པ་བཞིན་སྤྱི་ཚོགས་ཐོག་མོ་དང་པྲ་རྩིས་བྱེད་པ། ལྷ་ཕབ་པ་སོགས་དར་ཁྱབ་ཆེ་བ་ལ་བལྟས་ནའང་གསལ་བོར་ཤེས་ཐུབ།
(4)བོན་གྱིས་ཕྱི་འབྲེལ་ལ་ནུས་པ་ཐོན་པའི་སྐོར།
        གཉའ་ཁྲི་རྒྱལ་ཕྲན་བཅུ་གཉིས་ཀྱི་རྗེ་བོར་བོན་གྱིས་མངའ་གསོལ་བ་བཞིན་རྒྱལ་བོས་བོན་གྱི་སྐུ་གཤེན་བསྟེན་པ་དེ་ལས་རྒྱལ་ཕྲན་བཅུ་གཉིས་ནང་ཁུལ་དུ་མཐུན་སྒྲིལ་གྱི་ནུས་པ་ཞིག་ཐོན་པ་མ་ཟད། བོན་ཆོས་ དར་བའི་རྒྱལ་ཁབ་གཞན་ལའང་ཆོས་ལུགས་སྟེང་གི་འབྲེལ་བ་བྱུང་ཡོད་དེ། སྐུ་གཤེན་དེ་དག་རྒྱལ་ཕྲན་བཅུ་གཉིས་ཀྱི་བོན་ལས་ཅུང་མཁས་ཤིང་མིང་གྲགས་ཡོད་པ་ཞིག་ཏུ་མ་ཟད་ཡུལ་གྲུ་གཞན་ལས་བོན་སྦྱངས་པའམ་གཞན་གྱི་བོན་དང་འབྲེལ་འདྲིས་བྱས་ཏེ་ཆོས་ལུགས་ཀྱི་རང་བཞིན་ལྡན་པའི་འབྲེལ་བ་ཞིག་བྱུང་བ་དེས་ཆབ་སྲིད་དང་དམངས་ཚོགས་ཀྱི་བར་ལའང་འབྲེལ་བ་ཞིག་ངང་གིས་འབྱུང་སྲིད་པ་འདས་པའི་ལོ་རྒྱུས་མང་བོས་ར་འཕྲོད་ཐུབ། གྲི་གུམ་གྱིས་བོན་བསྣུབས་པ་ལས་བྱུང་བའི་ཡ་ང་བའི་ཆག་འཇིག་དང་འཐབ་རྩོད་དེས་རྒྱལ་ཕྲན་བར་དུའང་འགལ་བ་ཆེན་པོ་ཞིག་བྱུང་བ་མཚོན་ཐུབ། འདི་ནི་ཆབ་སྲིད་བོན་གྱིས་བསྐྱངས་པའི་ཟུར་ཞིག་ཡིན་ནའང་སྔོན་བོན་གྱིས་ཆབ་སྲིད་བསྐྱངས་པའི་གྲས་སུ་བཞག་མེད་པ་འདྲའོ། །

མཇུག་གི་གཏམ།

        སྒྲུང་ལྡེའུ་བོན་གསུམ་ལ་སྔོན་གྱི་རྩོམ་རིག་དང༌། ཆབ་སྲིད། ཤེས་རིག སྤྱི་ཚོགས་བཅས་ལ་དབྱེ་ཞིབ་བྱེད་པའི་རིན་ཐང་ཆེན་པོ་ཡོད་ལ་གཏིང་ཟབ་ཅིང་རྒྱ་ཆེ་བ་ཞིག་ཀྱང་ཡིན་པས་གོང་དུ་བརྗོད་པ་ནི་སྒྲུང་ལྡེའུ་བོན་གསུམ་གྱིས་ཆབ་སྲིད་ཇི་ལྟར་བསྐྱངས་ཚུལ་ ཙམ་ལས་སྒྲུང་ལྡེའུ་བོན་གསུམ་གྱི་ངོ་སྤྲོད་བྱས་པ་མིན་ན། རྩོམ་ཡིག་འདིས་ལོ་རྒྱུས་ལས་བྱུང་བའི་ཡུལ་སྲོལ་གོམས་འདྲིས་དང་དམངས་ཁྲོད་གཏམ་རྒྱུད་ཀྱི་བཤད་ཚུལ་འགའ་རེས་ཟུར་བརྒྱན་ནས་བཀོད་པའི་བསྡོམས་ཚིག་དག་ཀྱང་མི་གཅིག་གི་མཐོང་རྒྱ་ནི་ཁབ་གཅིག་གི་བུ་གའི་དཔེ་བཞིན་ཡོད་ཚད་བདེན་པའི་ངེས་པ་མེད་ན་མཁྱེན་ལྡན་དག་གིས་ སྐྱོན་བརྗོད་དང་མཛུབ་སྟོན་གྱི་བཀའ་དྲིན་སྐྱོང་བར་ཞུ།
མཆན་འགྲེལ།
 ①དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 164
 ②《དགེ་འདུན་ཆོས་འཕེལ་གྱི་གསུང་འབུམ་ཕྱོགས་བསྒྲིགས》པོད་གཉིས་པ།  བོད་ལྗོངས་དཔེ་རྙིང་དཔེ་སྐྲུན་ཁང༌།  ཤ 77
③དོན་འགྲུབ་རྒྱལ་དང་ཁྲིན་ཆིན་དབྱིན་གྱིས་བསྒྱུར།《ཐང་ཡིག་གསར་རྙིང་ལས་བྱུང་བའི་བོད་ཆེན་པོའི་སྲིད་ལུགས》མཚོ་སྔོན་མི་རིགས་དཔེ་སྐྲུན་ཁང༌།  ཤ130
④《ལ་དྭགས་རྒྱལ་རབས》བོད་ལྗོངས་མི་དམངས་དཔེ་སྐྲུན་ཁང་) ཤ27
⑤དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 193
⑥ དབང་རྒྱལ་དང་བསོད་ནམས་སྐྱིད་གཉིས་ཀྱིས་བསྒྲིགས།《ཏུན་ཏོང་ནས་ཐོན་པའི་བོད་ཀྱི་ལོ་རྒྱུས་ཡིག་ཆ》མི་རིགས་དཔེ་སྐྲུན་ཁང༌། ཤ97
⑦ ཤར་རྫ་བཀྲ་ཤིས་རྒྱལ་མཚན།《ལེགས་བཤད་རིན་པོ་ཆེའི་མཛོད》མི་རིགས་དཔེ་སྐྲུན་ཁང༌། ཤ 187
 ⑧ལྡེའུ་ཇོ་སྲས།《ལྡེའུ་ཆོས་འབྱུང》བོད་ལྗོངས་མི་དམངས་དཔེ་སྐྲུན་ཁང༌། ཤl0l
⑨ 《ལ་དྭགས་རྒྱལ་རབས》བོད་ལྗོངས་དཔེ་རྙིང་དཔེ་སྐྲུན་ཁང༌། ཤ 27
⑩མཁས་པ་ལྡེའུ།《རྒྱ་བོད་ཆོས་འབྱུང་རྒྱས་པ》བོད་ལྗོངས་དཔེ་རྙིང་དཔེ་སྐྲུན་ཁང༌།ཤ 223
 ⑴ དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 164
⑵ཙོང་ཁ་བ་བློ་བཟང་གྲགས་པ།《ལེགས་བཤད་གསེར་འཕྲེང》མཚོ་སྔོན་མི་རིགས་དཔེ་སྐྲུན་ཁང༌། ཤ 51
⑶《དགེ་འདུན་ཆོས་འཕེལ་གྱི་གསུང་རྩོམ》པོད་གཉིས་པ།བོད་ལྗོངས་དཔེ་རྙིང་དཔེ་སྐྲུན་ཁང༌། ཤ77
 ⑷དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 185
⑸ ས་སྐྱ་བསོད་ནམས་རྒྱལ་མཚན།《རྒྱལ་རབས་གསལ་བའི་མེ་ལོང》མི་རིགས་དཔེ་སྐྲུན་ཁང༌། ཤ119
⑹ དབང་རྒྱལ་དང་བསོད་ནམས་ཀྱིས་བསྒྲིགས།《ཏུན་ཏོང་ཐོན་པའི་བོད་ཀྱི་ལོ་རྒྱུས་ཡིག་ཆ》མི་རིགས་   དཔེ་སྐྲུན་ཁང༌། ཤ 78
⑺ དབང་རྒྱལ་དང་བསོད་ནམས་སྐྱིད་གཉིས་ཀྱིས་བསྒྲིགས།《ཏུན་ཏོང་ཐོན་པའི་བོད་བྱི་ལོ་རྒྱུས་ཡིག་ཆ》མི་རིགས་དཔེ་སྐྲུན་ཁང༌། ཤ 78
⑻ ཉང་ཉི་མ་འོད་ཟེར།《ཆོས་འབྱུང་མེ་ཏོག་སྙིང་པོ》བོད་ལྗོངས་དཔེ་རྙིང་དཔེ་སྐྲུན་ཁང༌། ཤ209
⑼ དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 159
⑽ ཉང་ཉི་མ་འོད་ཟེར།《ཆོས་འབྱུང་མེ་ཏོག་སྙིང་པོ》བོད་ལྗོངས་དཔེ་རྙིང་དཔེ་སྐྲུན་ཁང༌། ཤ160
⑾ ས་སྐྱ་བསོད་ནམས་རྒྱལ་མཚན།《རྒྱལ་རབས་གསལ་བའི་མེ་ལོང》མི་རིགས་དཔེ་སྐྲུན་ཁང༌། ཤ 57
⑿ དཔའ་བོ་གཙུག་ལག་ཕྲེང་བ།《ཆོས་འབྱུང་མཁས་པའི་དགའ་སྟོན》མི་རིགས་དཔེ་སྐྲུན་ཁང༌། ཤ 156
⒀ ས་སྐྱ་བསོད་ནམས་རྒྱལ་མཚན། 《རྒྱལ་རབས་གསལ་བའི་མེ་ལོང》མི་རིགས་དཔེ་སྐྲུན་ཁང༌། ཤ 27
⒁རྔ་བ་ཁུལ་རྩོམ་སྒྱུར་ཅུའུ།《རྔ་བ་ཁུལ་ལོ་རྒྱུས་རིག་གནས་དཔྱད་ཡིག》དེབ་གསུམ་པ། ཤ19
⒂ཐུའུ་བཀྭན་བློ་བཟང་ཆོས་ཀྱི་ཉི་མ།《ཐུའུ་བཀྭན་གྲུབ་མཐའ། 》ཀན་སུའུ་མི་རིགས་དཔེ་སྐྲུན་ཁང༌། 389

 

《བོད་རིག་པའི་དཔྱད་རྩོམ་ཕྱོགས་བསྒྲིགས》ལས་བཏུས།