དགུང་ཨ་སྔོན་ཁྲི་གདུགས་ཉི་མ་དེ།།ལས་དབང་ཐང་ཆེ་བས་གླིང་བཞི་བསྐོར།།དུས་ནམ་ཟླ་ཁ་ལོ་སྒྱུར་བསམ་སྟེ།།གཟའ་སྒྲ་གཅན་ཁ་ལ་བཏབ་པ་གདའ།།བར་ཁམས་ལ་རྒྱུ་བའི་སྤྲིན་ནག་དེས།།ཐོག་སེར་བས་ལོ་འབྲས་བཅོམ་བསམ་སྟེ།།ངར་ཟེར་མ་རླུང་གིས་གཏོར་ལེ་གདའ།།དམའ་སྲིད་ཆགས་རི་རྒྱལ་ལྷུན་པོ་དེ།།ལྷུན་མི་འགྱུར་བརྗིད་ཉམས་ས་གཞིར་འགྱིངས།།རང་འབྱུང་བའི་ཁ་ལོ་སྒྱུར་བསམ་སྟེ།།དགུང་གནམ་ལྕགས་ཐོག་གིས་བཤིག་ལེ་གདའ།།...

དགོན་ཆེན་ཆེན་པོའི་དུང་དཀར་དེ།།སྟོབས་རྫུ་འཕྲུལ་གཉིས་ཀྱི་བདག་པོ་ལ།།ཆོས་དཀར་ཆོས་དུང་འུ་རུ་རུ།།བསམ་པའི་ཆོས་དེ་མ་འགྲུབ་ན།།དུང་དཀར་འབུད་དང་མ་འབུད་མེད།།རྒྱལ་ཁྲིམས་གསེར་གྱི་གཞུང་ཤིང་དེ།།ཁྲིམས་ཆེན་རྔ་བོ་བརྡུང་པའི་དུས།།དབུས་རི་རྒྱལ་བཞིན་དུ་རྒྱུ་འབྲས་བསྲུང་།།ཝ་ཛྰ་ཏི་གཉིས་དེ་སྒང་ནས་གཤག།བདེན་པའི་བྱས་དེ་མ་ཐོབ་ན།།ལས་དཀོར་ཟས་ཟོས་པ་ངོ་རེ་ཚ།།རྒྱལ་པོས་འབངས་ལ་མནར་གཅོད་གཅིག།བླ་མས་དཀོར་ལ་འབག་པ་གཉིས།།སྡིག་ཆེན་སྲོག་ལ་རྔམ་པ་གསུམ།།དམྱལ་བའི་འདམ་གྱི་གཏིང་རྡོ་ཡིན།།...

གངས་སྟོད་སེང་གེ་དཀར་མོ་དེ།།ནམ་རྒྱུན་གཡུ་རལ་ངོམ་ལེ་མིན།།རྐྱེན་ཆག་སྒོ་བྱུང་ན་ལོས་ཀྱང་ངོམ།།དམའ་རྒྱ་མཚོའི་ནང་གི་ཆུ་སྲིན་དེ།།དུས་ནམ་རྒྱུན་རྐན་སྒྲ་རྡེབ་ལེ་མིན།།འབུ་སྲིན་ཁོག་པ་གང་བའི་དུས།།རྐན་སྒྲ་མི་རྡེབ་ཀ་མེད་རེད།།...

ཁྱི་ལུད་དར་གྱིས་བཏུམས་ན་ཡང་།།ངན་པའི་དྲི་མ་ཕྱི་ལ་ཁ།།ཇ་ག་ལེར་བསྐོལ་ན་ཁུ་བ་བཟང་།།ལ་ག་ལེར་རྒྱབ་ན་འབྱུང་གཞིར་འཕྲོད།།དགྲ་ག་ལེར་རྒྱབ་ན་དགྲ་མགོ་ནོན།།...

ནོར་ནག་རི་བོའི་ལྷོ་བརྒྱུད་དུ།།རྨ་ཆུ་སྔོན་མོའི་བྱང་ངོགས་སུ།།མེ་ཏོག་རྣམ་བཀྲའི་རྩྭ་ཐང་དུ།།ཚོ་བ་ཞིག་གི་སྦྲ་ཚོགས་མཆིས།།མཛེས་སྡུག་མེ་ཏོག་གྲངས་མེད་ཁྲོད།།གསེར་ཆེན་མེ་ཏོག་ལྟ་ན་སྡུག།སྙིང་སྡུག་མཛེས་མ་ཁྲི་འབུམ་ཁྲོད།།ཀླུ་མོ་འཚོ་ལ་སྒྲུན་ནུས་མེད།།ཕོ་སྐྱེས་གསར་བུ་སུ་ཡིས་ཀྱང་།།ཆུང་མར་མི་འདོད་ཡོད་རེ་སྐན།།ཁོ་མོར་མཛེས་སྡུག་ཁོ་ན་མིན།།རྩོལ་བར་མཁས་པ་གླིང་ལ་གྲགས།།...

སྐར་ཚོགས་ཁྲ་མོའི་གཡས་ཟུར་ནས།།སྡེ་བརྒྱད་ཟོ་གཏོར་འཕངས་མི་དེ།།སོ་ཁ་རང་གིས་མ་བསྒྱུར་ན།།སྔགས་ནག་མཐུ་ཡིས་འཇོམས་རབས་ཡོད།།སྤང་དཀར་ལེབ་ཆེན་གོང་རོལ་ནས།།ཧོར་སྡུག་བཤན་རྒོད་ངར་མ་དེ།།རང་ཚོད་རང་གིས་མ་བཟུང་ན།།སྲོག་དམར་ཐང་ལ་འབེབས་རབས་ཡོད།།སྐྱེས་པའི་མཐའ་མ་འཆི་རྒྱུ་རེད།།བསགས་པའི་མཐའ་མ་རྫོགས་རྒྱུ་རེད།།བསགས་པའི་རྒྱུ་ནོར་མ་རྫོགས་ན།།སྐུ་ཟས་མ་ཆད་སློང་རྒྱུ་ཡོད།།མཛུབ་མོ་མ་ཆད་ལྡག་རྒྱུ་ཡོད།།ལྕེ་གནས་མ་ཆད་མིད་རྒྱུ་ཡོད།།...

དགུང་ཨ་སྔོན་མ་བཞེངས་གཞལ་ཡས་ཁང་།།སྤྲིན་དཀར་པོ་མ་བཞེངས་བང་རིམ་རེད།།ཆར་བསིལ་མ་མ་བཤམས་མཆོད་པ་རེད།།འདི་དགུང་སྔོན་གནམ་གྱི་འཛོམས་གསུམ་རེད།།རྫ་ཁྲ་ཡག་མ་བཞེངས་གཞལ་ཡས་ཁང་།།རྡོ་གཡའ་མ་མ་བརྩིགས་བང་རིམ་རེད།།ནང་རྫ་ཆུ་མ་བཤམས་མཆོད་པ་རེད།།འདི་ཁྲ་ཡག་རྫ་ཡི་འཛོམས་གསུམ་རེད།།གྲལ་ཁྲོམ་པ་མ་བཞེངས་གཞལ་ཡས་ཁང་།།གླུ་ཁ་མཚར་མ་བརྩིགས་བང་རིམ་རེད།།ཁ་ཇ་ཆང་མ་བཤམས་མཆོད་པ་རེད།།འདི་ཁྲོམ་པའི་གྲལ་གྱི་འཛོམས་གསུམ་རེད།།...

སྐྱེས་ཕོ་རབ་ཇུས་ཆེན་བསྐོར་ལེ་དེ།།རི་མགོར་དར་ཆེན་བསླངས་འདྲ་ཡོད།།དར་རྩེ་རླུང་གིས་བརྡབ་ན་ཡང་།།དར་ཤིང་ལྷུན་པོའི་རི་བཞིན་བརྟན།།སྐྱེས་ཕོ་འབྲིང་ཇུས་ཆེན་བསྐོར་ལེ་དེ།།མདའ་གྲི་མདུང་གསུམ་མཚོན་འཁོར་བསྐོར།།བསྐོར་ལེས་མི་ཚད་རྩེད་མོར་རོལ།།སྐྱེས་ཕོ་ཐས་ཇུས་ཆེན་བསྐོར་ལེ་དེ།།རྒྱུ་འབྲས་གཉིས་དེ་རྒྱབ་ཏུ་སྐྱུར།།སྡིག་པའི་ལས་དེ་པང་དུ་བླངས།།སྨན་མོ་རབ་མོ་འབྲིང་མོ་ཐ་གསུམ།།མོ་རབ་རྒྱ་མཚོ་འགྱིང་འདྲ་ཡོང་།།མོ་འབྲིང་རྒྱ་ལྕོག་བཙུགས་འདྲ་ཡོང་།།མོ་ཐ་མ་ལ་ཁའི་རླུང་དར་འདྲ།།རླུང་ཤར་ནས་འཚུབ་ཚེ་ནུབ་ལ་འཕྱོ།།རླུང་ནུབ་ནས་བསྐོར་ཚེ་ཤར་ལ་གཡོ།།བན་བླ་རབ་བླ་འབྲིང་བླ་ཐ་གསུམ།།བླ་རབ་འགྲོ་དྲུག་ཆོས་ལ་བསྒྱུར།།བླ་འབྲིང་རང་རྒྱུད་ཆོས་ལ་བསྒྱུར།།བླ་ཐས་འདས་པོའི་བསྐོར་ཟས་ཟ།།...

དཀར་པོ་དུང་གི་བརྒྱན་ཡ་ལ།།འོ་མའི་ཆོས་འཁོར་བརྒྱན་ལེ་དགོས།།སེར་པོ་གསེར་གྱི་བརྒྱན་ཡ་ལ།།དྲུག་དམར་གཡུ་ཡི་བརྒྱན་ལེ་དགོས།།རྒྱ་བྱུར་དམར་པོའི་བརྒྱན་ཡ་ལ།།སྤོས་ཤེལ་སེར་པོའི་བརྒྱན་ཡང་དགོས།།...

སྡེ་ཧོར་ཡུལ་ཆོས་ཀྱི་ཉི་མ་ཤར།།ནག་ཙིག་གེ་ཤན་པ་ཆོས་སྐལ་ཆད།།ཤྭ་འགྲོག་དགོ་འགྲོག་རྐྱང་ལ་འགྲོག།རྒོ་ཞར་མ་ནི་སྒེར་རང་འགྲོག།སྐྱབས་རེ་ས་བླ་མ་དཀོན་མཆོག་ཡོད་ཀྱང་ངོ་མ་ཤེས།།བློ་གཏད་ས་དམ་པའི་ལྷ་ཆོས་ཡོད་ཀྱང་སྒྲུབ་མ་ཐུབ།།...