གཞོན་ནུ་བློ་ལྡན་གྱི་དྲིས་ལན་ལེགས་བཤད་བློ་གྲོས་སྙིང་བོ། (ཚན་བཤུས།)

　　༄༅།།མྱི་ལུགས་ཐམས་ཅད་གཙོ་བོ་ཚུར་བསྡུ་ན། རྒྱུད་འཇམ་པ་དང་གཅིག  ཚོད་ཟིན་པ་དང་གཉིས། ཁོག་ཡངས་ཚུགས་ཐུབ་དང་གསུམ། བརྟག་དཔྱད་མཁས་པ་དང་བཞི། ཐམས་ཅད་ཀུན་ལ་ཕན་སེམས་དྲངས་པས་ཟིན་པ་དང་ལྔ་བོ་ལ་ཐམས་ཅད་འདུས་ཡོད།
　　དང་བོ་རྒྱུད་ཁོང་ཁྲོ་གདུག་རྩུབ་ཅན་གྱི་མི་དེ་སུ་ལ་མི་མཐུན། ཕར་ལ་ཕན་བཏགས་ཀྱང་སུན་འགྲོ། ཀུན་གྱིས་རིག་པ་མེད་པས་རྒྱུད་འཇམ་དགོས། རྒྱུད་འཇམ་ཟེར་རྒྱུ་བོ་དེ་ཀུན་ལ་ཁོང་ཁྲོ་ཚིག་རྩུབ་མེད་པར་རྒྱུད་འཇམ་དུང་ངེ་ཡོད་ནི་ཞིག་ལ་ཟེར་ནི་རེད་མ་གཏོགས། སྣབས་འདྲ་འདྲའི་སུ་ཡིན་ངོར་འགོས་འགྲོ་ནི་ཞིག་ལ་ཟེར་ནི་མ་རེད། དེ་དོན་ཚན་གཅིག་རེད།
　　བྱ་བ་མང་ཞིང་རང་ཚོད་མ་ཟིན་ན། སྐབས་རེར་ཡག་རུང་སྐབས་རེར་རང་ཕུང་མྱིས་འཕྱ་ས་ཞིག་རེད་འགྲོ་བས་གྲོགས་དང་བྱ་བ་རང་ཚོད་ཅིག་གི་ཐོག་ནས་བློ་སྣ་འགྱུར་ལྡོག་མེད་པར་རང་ཚུགས་ཟིན་དགོས། རང་ཚོད་ཟིན་ཟེར་རྒྱུ་བོ་བྱ་བ་གང་བྱེད་རུང་རང་གི་རྒྱུ་ཚོད་ཐུབ་ཚོད་དུས་ཚོད་མྱི་ཚོད་སོ་སོར་བསྟུན་ཤེས་ནི་ཞིག་ལ་ཟེར་ནི་རེད་མ་གཏོགས། གླེན་པས་ཨུ་ཚུགས་བྱས་ནས་གཞན་གྱི་བྱ་སྤྱོད་གང་ཡང་ཁས་མི་ལེན་ནི་ཞིག་ལ་ཟེར་ནི་མ་རེད། དེ་དོན་ཚན་གཉིས་པ་རེད།
　　ཁ་ཟས་བུད་མེད་ནོར་རྫས་སོགས་མི་འདོད་ནི་མེད་ཀྱང་། ཕུགས་ཀྱི་ཁེ་ཉེན་དང་ངོ་ཚ་ཁྲེལ་བ་ལ་བསམ། ཡང་ཚིག་ངན་སོགས་གནོད་པ་མི་ཁྲོ་ནི་མེད་ཀྱང་། ཕྱི་འདིང་ཁྲིམས་ཆད་སོགས་ལ་བསམ་ནས་སྐྱིད་སྡུག་གང་གི་སྐབས་ཀྱང་གཤིས་མི་འགྱུར་བར་རང་ཚུགས་ཐུབ་ན། ནམ་ཕུགས་རྒྱལ་ཁམས་ཀུན་གྱིས་བསྟོད་ཡོང་བས་ཚུགས་ཐུབ་པ་གལ་ཆེ། ཚུགས་ཐུབ་ཟེར་རྒྱུ་བོ་རང་གི་དྲན་ཚད་མྱིས་ཟེར་ཚད་པོའི་རྗེས་སུ་མི་རྒྱུག་པར་བྱ་སྤྱོད་བརྟག་ཐུག་པ་ཞིག་ལ་ཟེར་ནི་རེད་མ་གཏོགས། རྒལ་ཚིགས་ནང་དུ་དབྱུག་པ་དྲང་བ་ལྟར་བཀུག་རྒྱུ་མེད་ནི་ཞིག་ལ་ཟེར་ནི་མ་རེད། དེ་དོན་ཚན་གསུམ་པ་རེད།
　　དེ་ལྟར་བྱ་སྤྱོད་ཐམས་ཅད་ལ་འདི་དང་ཕྱི་མ་རང་དང་གཞན་ལ་འཕྲལ་དང་ཡུན་དུ་གང་ལ་གང་ཕན་ཁ་ཉེས་ལག་ཉེས་ཐམས་ཅད་ཞིབ་པར་བརྟག་དཔྱད་མཁས་ན་གང་བསམ་ཐམས་ཅད་ལེགས་པར་འགྲུབ་འོང་། བརྟག་ལོང་དཔྱད་ལོང་མེད་པར་བསྒྲུབ་ན་འུ་ཚོས་མ་ཟད་རྒྱལ་བོ་དཔའ་བའི་སྦྱིན་དང་། ཀ་ལིང་ཀའི་རྒྱལ་བོ་ཚོས་ཀྱང་། བྱང་ཆུབ་སེམས་དཔའ་མེ་ཏོག་ཟླ་མཛེས་དང་། དྲང་སྲོང་བཟོད་པ་སྨྲ་བ་ཚོ་བཙུན་མོ་རྣམས་དང་ལྷན་གཅིག་ཏུ་འདུག་ལུགས་ལ་བལྟས་ན། འདིས་འདོད་པའི་དབང་གིས་བཙུན་མོ་བསྡུ་འདོད་རེད་སྙམ་ནས། ཤན་པ་དང་ཁོ་རང་གིས་བགྲོངས་ཏེ་ཕྱི་ནས་འགྱོད་པ་སྐྱེས་པ་ལྟ་བུ་དང་། ཡང་གཞན་གྱི་ཁར་རྒྱུག་པ་དང་གཡོ་སྒྱུས། གཞན་མགོ་ལ་བསྒྱུར་བའང་ཡོད་དེ་གཡོན་ཅན་པདྨའི་རྩ་ལག་གིས་བཟང་མོ་བསད་ནས་རལ་གྲི་ཁྲག་ཅན་གོའུ་ཏ་མའི་མདུན་དུ་འཕང་ཚེ་གོའུ་ཏ་མ་ཁྲིམས་ལ་ཕོག་པ་ད་ང། ཡང་རྐུན་མ་ཞིག་གིས་བེའུ་ཞིག་བརྐུས་ཏེ། ནགས་ནང་གི་རང་སངས་རྒྱས་ཀྱི་མདུན་དུ་འཕང་ནས་བྲོས་པས་རང་སངས་རྒྱས་ཁྲིམས་ལ་གཏུག་པ་ལྟ་བུ་ཡོད་པས་བྱ་སྤྱོད་གང་ལ་ཡང་བརྟག་དཔྱད་ཞིབ་པར་བྱེད་དགོས་ཏེ། གཏམ་གོ་ཡག་མ་བྱས་ཚིག་མ་བཤད། དོན་རྟོགས་ཡག་མ་བྱས་མནའ་མ་སྐྱེལ་ཟེར་དཔེ། བྱ་སྤྱོད་གང་འགྲུབ་མི་འགྲུབ། འགྲུབ་ན་དོན་ཆེ་ཆུང་སོགས་བརྟགས་དཔྱད་བྱས་ཏེ། མདའ་ཕར་འཕང་ཐང་དུ་མི་ལྷུང་ནི། བྱ་གང་སྒྲུབ་ཐུར་ར་མི་ལྷུང་ནི་ཞིག་དགོས་མ་གཏོགས་རང་སྐྱོན་བལྟ་བའི་མེ་ལོང་མེད་པར། གཞན་སྐྱོན་འཚོལ་བའི་ཐུར་མ་བཟུང་ནས་ཐམས་ཅད་ཀྱི་ཚོད་ཉམས་སུ་བླང་ནས་གཡོ་སྒྱུ་བཀྱེ་ཐབས་ཤིག་ལ་ཟེར་ནི་མ་རེད། དེ་དོན་ཚན་བཞི་བ་རེད།
　　 དེ་ལྟར་རང་གཞན་གྱི་བྱ་སྤྱོད་གང་བྱས་ཚད་ལ་ཕན་སེམས་བསམ་པ་དྲངས་པོ་ཞིག་ཡོད་ན། རང་གཞན་གྱི་དོན་འགྲུབ་ཅིང་། ཚེ་འདིར་དཀར་ཕྱོགས་ཀྱི་སྲུང་མ་རྣམས་ཀྱིས་སྲུང་སྐྱོབ་མཛད་དེ་ཁ་རྗེ་རླུང་རྟ་དར། མྱིས་ཀྱང་བྱམས་ལ་བཀུར་སྟི་དང་མཆོད་བསྟོད་བྱེད། ཕྱི་མའི་ཆོས་ཀྱང་རང་བཞིན་ཤུགས་ཀྱིས་འགྲུབ་ཡོང་བས་བསམ་པ་བཟང་བོ་དང་མི་འབྲལ་བ་འདི་ཤིན་ཏུ་གལ་ཆེ། བསམ་པ་གཞན་ལ་ནག་ན་སྦྱོར་བ་རང་ལ་རྩུབ་ཡོང་བའི་དཔེ་རེད། ཕན་སེམས་དེ་ཡང་ཕན་བཏགས་མ་བཏགས་ཆ་ཡོད་མེད་མཐོ་དམན་བཟང་ངན་མེད་པར་ཕན་འདོགས་ཀྱི་བསམ་པ་བཟང་བོ་ཞིག་ཡོད་དགོས་ནི་རེད་མ་གཏོགས་གཉེན་ཉེ་རིང་གྲོགས་མཛའ་བཤེས་བུ་ཆུང་མ་ཚོ་གཅེས་ནི་ལ་ཟེར་ནི་མ་རེད། འོ་དེ་ལྔ་ཀ་ཚང་ན་གཞན་ཅི་ཡང་མེད་རུང་། མྱི་ཡི་དམ་པ་མཆོག་ཏུ་གྱུར་པ་ཡིན་ནོ། །