རོ་སྒྲུང་ལེའུ་ལྔ་བ། བསོད་ནམས་སྟོབས་ཀྱིས་རྒྱལ་ས་ཟིན་པ།

ཚོང་དཔོན་སྦྲང་མ་ཟིར་ཆུང་ཡུལ་མེད་འཁྱམས་ནས་ཡོང་བས་བསོད་ནམས་སྟོབས་ཀྱིས་རྒྱལ་ས་ཟིན་པ།

      ཡང་རྒྱལ་བུས་ཤིང་སྡོང་གི་རྩར་ཕྱིན་ནས། བླ་མ་ཀླུ་སྒྲུབ་སྙིང་པོ་ཡིན། ། ང་རང་རྒྱལ་བུ་བདེ་སྤྱོད་བཟང་པོ་ཡིན། ། རལ་གྲི་ངར་མ་རྡོ་ཆོད་ཡིན། ། དྲ་བ་ལྕགས་ཀྱི་མིག་དགུ་ཡིན། །  ཏོག་མ་སེང་ལྡེང་སྨུག་པོ་ཡིན། ། ཞགས་པ་འཕྲུལ་གྱི་ཨ་ལོང་ཡིན། ། མར་ཟན་ཟོས་པས་འཛད་མེད་ཡིན། ། རོ་ཁོག་བབ་བམ་ཤིང་སྡོང་གཅོད། ། ཅེས་བྱས་པས་རོ་དེ་བབས་བྱུང་སྟེ་ཏོག་མས་བརྡུངས། དྲ་བའི་ནང་དུ་བརྫངས། ཞགས་པས་བསྡམས་ནས་ཁུར་ཏེ་གོམ་པ་བདུན་ཙམ་སླེབས་པ་དང་། རྒྱལ་བུ་རྒྱལ་བུ་ལམ་ཐག་རིང་། ཡང་ན་ཁྱོད་ཀྱིས་སྒྲུང་ཞིག་ཤོད། ཡང་ན་ངས་སྒྲུང་ཞིག་བཤད་ཀྱི་ཟེར་བར། ཁ་རོག་ཏུ་ཡོང་བས། རྒྱལ་བུ་ལས་ཟད་ཁྱོད་འདྲའི་ཁ་ནས་གཏམ་ཡོང་བཟོ་མི་འདུག ངས་སྒྲུང་ཞིག་བཤད་ཀྱི་ཉོན་ཨང་ཟེར། ལུང་པ་ཞིག་ན་རྒྱལ་བུ་ཞིག་ཡོད་པར་འདུག ཡུལ་གཞན་ཞིག་ནས་ཚོང་པ་ཚོང་ལ་ཡོང་བ་ཞིག་དེར་ཡུལ་ཆགས་ནས་བསྡད་ཡོད་འདུག ཁོས་ནང་ཞིག་ཏུ་འཛུལ་ཕྱིན་པ་དང་། ཡུལ་དེའི་རྒྱལ་པོ་དེ་ལོ་གསར་མཛད་པའི་ཁུ་ར་མང་རབ་ཅིག་བཟི་བཞིན་གདའ། ཚོང་པ་དེས་སྒོའི་སྲུབས་ནས་ཁུ་ར་སྒར་བ་དང་ཐུག་སྟེ་ཁོས་ཁུ་ར་བྱུང་རིམ་གྱི་གྲངས་ཀ་བརྒྱབ་པས། ཁུ་ར་བསྒར་ཚར་ནས་སྒོ་ཕྱེ་བ་དང་། ང་ལ་ཁུ་ར་ཞིག་སྦྱིན་རོགས་ཟེར་བར། ཁུ་ར་འདིའི་གྲངས་ཚོད་ན་ཁུ་ར་སྦྱིན་པས་ཆོག་ཟེར། དེ་ཁོས་ཡོང་བྱས་ཏེ། ཁུ་རའི་གྲངས་ཇི་བཞིན་དུ་བགྲངས་པས་ཁོ་བདེན་པར་འདུག་ཅེས་རྒྱལ་པོ་ལ་ཞུས་པས་ཁོ་མངོན་ཤེས་མཁན་དུ་གྲགས་སོ། དེ་རྗེས་རྒྱལ་པོའི་ལྷ་རྟ་བོར་ནས་ཚོང་དཔོན་བོས་ཤོག་གསུངས་ཏེ། ཚོང་དཔོན་དེར་ཡོང་བ་དང་རྒྱལ་པོས་ངའི་ལྷ་རྟ་བོས་འདུག་པས་ཁྱོད་ཀྱི་མངོན་ཤེས་ཀྱིས་གར་སོང་ཤེས་པ་གྱིས་ཤིག་གསུངས། ཚོང་པ་དེ་ཁོ་རང་གི་ནང་དུ་ལོག་རྗེས་བློ་མ་བདེ་བར་ཁང་ཐོག་ཏུ་བསྡད་པ་དང་། ལྷ་རྟ་རྐུ་མཁན་གྱི་མི་འདུག་པ་དེ་ཚོས་ཚོང་དཔོན་ལ་མངོན་ཤེས་ཡོད་ཟེར་གྱི་འདུག་པས་འདིས་གང་ལབ་ཀྱི་ཡོད་དམ་བསམས་ལྐོག་ཉན་བྱས་པ་དང་། ཚོང་དཔོན་གྱིས་བལྟས་པས་ཁོང་གསུམ་པོས་མ་མཐོང་བར་མི་གཉིས་ན་རེ། མངོན་ཤེས་ཡོད་ན་ནི་ང་ཚོ་གསུམ་གྱི་བླ་ཚོང་གི་རེད་ཟེར། གཅིག་གིས་ནི་འདི་འདྲ་རང་ཡོད་པ་ཨེ་བདེན་མི་ཤེས་ཟེར། ཚོང་དཔོན་གྱིས་ཁོང་གསུམ་་པོས་མ་མཐོང་བ་བྱས་ཏེ། དགོ་ལྤགས་ཀྱི་གདན་ཞིག་ཡོད་པ་དེ་ནས་ཁོང་གསུམ་གྱི་མགོ་ལ་ཐུལ་ཐུལ་བསྐྱུར་བས། ཁོང་གསུམ་ན་རེ། ད་ལྐོག་ཉན་མི་ཐོས་པའི་ཁར་རང་གི་གནས་ཚུལ་ཚོར་བའི་དཔེ་ཡོད་ཟེར་སོང་ངོ་། ཚོང་དཔོན་དགའ་ནས་སང་ལུང་པའི་མི་རྣམས་ཚོགས་པ་ཞུ་ཟེར་རྒྱལ་པོ་ལ་ཞུས་སོ། དེ་ལྟར་སྟོང་དཔོན་གྱིས་བརྒྱ་དཔོན་བསྐུལ། བརྒྱ་དཔོན་གྱིས་བཅུ་དཔོན་བསྐུལ་ནས་མངའ་འོག་གི་མི་འཛོམས་པ་དང་། ཚོང་དཔོན་གྱིས་མྱུལ་བས་ཁོང་གསུམ་གྱི་མགོ་ལ་སྤུ་ཡོད་པས་ན། འདི་གསུམ་པོ་ཡིན་པར་འདུག་ཞུས་པས། ཁོང་གསུམ་པོས་ལྷ་རྟ་མ་བསད་པར་ཁྲིད་བྱུང་ངོ་། མི་དེ་རྣམས་ཀྱི་སྲོག་ལ་མ་བབས་པའི་ཞུ་བ་ཚོང་དཔོན་གྱིས་བྱས་སོ། རྒྱལ་པོའི་ཐུགས་དགོངས་ལ་མི་འདི་ངེད་རང་གི་མངའ་འོག་ནས་ནི་མིན། ཕྱོགས་གཞན་ལ་སོང་ན་ཕངས་པ་འདུག་བསམས་ནས། རྒྱལ་པོ་རང་གི་སྲས་མོ་གཅིག་གནང་ངོ་། དུས་ནམ་ཞིག་སོང་བ་དང་རྒྱལ་པོའི་མངའ་འོག་ན་ཚོང་དཔོན་ཞིག་ཡོད་པ་དེའི་བོང་བུ་གསུམ་རྐུ་ལ་ཤོར་བ་རྒྱལ་པོ་ལ་ཞུས། རྒྱལ་པོས་ཚོང་དཔོན་ལ་བོང་བུ་རྐུ་ལ་ཤོར་བས་མངོན་ཤེས་ཀྱིས་འཚོལ་ཐབས་གྱིས་གསུངས་པ་དང་། ཚོང་དཔོན་གྱི་བསམ་པ་ལ་གཅིག་ནས་གཉིས་སུ་བགྲངས་པས་ཁུ་རའི་མངོན་ཤེས་བྱུང་། བློ་མ་བདེ་བས་གཉིད་མ་བྱུང་བར་ཁང་ཐོག་བསྡད་པས་ལྷ་རྟའི་མངོན་ཤེས་བྱུང་། ད་རེས་ཅི་ཡང་མི་ཤེས་པས་མ་བྲོས་ནས་བསད་ཀྱིས་དོགས་ནས། རྒྱགས་ཕྱེ་ཞིག་ཁྱེར་ནས་མདོར་ཐོན། ཁ་ཤར་ལ་བལྟས་ནས་བྲོས་པས། མི་ཞིག་ཧྲེང་ཧྲེང་འགྲོ་ཡི་ཡོད་པ་མཐོང་སྟེ། མ་གི་དང་བསྡེབས་ནས་འགྲོ་བསམས་ཏེ་བརྒྱུགས་ཕྱིན་པ་དང་། མི་དེ་མར་ལོག་ནས་འགྲོ་ཡི་ཡོད་པས་ཚོང་དཔོན་ལ་ཕྱག་བཙལ་བ་དང་། བོང་བུ་རྐུ་མཁན་གྱི་ཟླ་བོ་ལྟོ་ལེན་ཏུ་ཡོང་བ་དང་ཐུག་སྟེ་མི་དེ་ན་རེ། བོང་བུ་འབུལ། སྲོག་ལ་མི་འབབ་པ་ཞིག་ཞུ་ཟེར། བོང་བུ་ཚོ་ག་ན་ཡོད་བྱས་པས། ལ་ཕར་རྒྱབ་ན་ཡོད་ཟེར། ཁོ་རང་ཚོ་བོང་བུ་སློག་ཏུ་བཏང་། སྲོག་ལ་མི་འབབ་པ་ཞུ་ཟེར། ཡང་ནམ་ཞིག་སོང་བ་དང་རྒྱལ་པོའི་བླ་གཡུ་བོར་ནས་ཚོང་དཔོན་བོས་ཤོག་གསུངས་ཏེ་ཚོང་དཔོན་བོས། རྒྱལ་པོའི་བློན་པོ་འ་ཞ་ཟེར་བ་ཞིག་གིས་བླ་གཡུ་བརྐུས་པ་ཡིན་ཞིང་། དེར་རྒྱལ་པོ་ན་རེ། ཚོང་དཔོན། རང་རེའི་བླ་གཡུ་བོར་འདུག་པས་རྩད་ཆོད་ཅིག་གསུངས་པ་དང་། ཚོང་དཔོན་གྱི་བསམ་པ་ལ། གཅིག་ནས་གཉིས་སུ་བགྲངས་པས་ཁུ་རའི་མངོན་ཤེས་བྱུང་། གནས་ཚང་ཁང་ཐོག་བསྡད་པས་ལྷ་རྟའི་མངོན་ཤེས་བྱུང་། དོན་མེད་བྲོས་ནས་ཕྱིན་པས་བོང་བུའི་མངོན་ཤེས་བྱུང་། ད་རེས་ནང་རྒྱུས་ཤིག་ལེན་ཨེ་ཐུབ་བསམས་ནས་གནས་ཁང་དུ་ལོག་ཕྱིན་ནོ། བློན་པོ་འ་ཞ་ཟེར་བ་དེའི་བསམ་པ་ལ། འདིས་ཐིག་པའི་ལུགས་ཀྱི་ཁུངས་ལུང་གང་འདྲ་ཡོད་དམ་བསམས་ནས་ནམ་ཕྱེད་ཙམ་ལ་ལངས་ཏེ་ཚོང་དཔོན་གྱི་ཁང་རྒྱབ་ཏུ་ཕྱིན། ཚོང་དཔོན་གྱི་བསམ་པ་ལ་སྔར་ནས་ནི་ལམ་འགྲོ་རེ་ཆེ་བྱུང་།  ཕ་རྒན་གྱི་མིང་ལ་འ་ཞ་ཟེར་གྱི་ཡོད་པས། རྩིག་སྲུབ་ལ་ཁ་བརྫངས་ནས་འ་ཞ་ཟེར་ངུས་པས། བློན་པོ་འ་ཞས་ཐོག་ནས་དྲུང་པ་ལགས་ང་འདིར་ཡོད་ཟེར། ཚོང་དཔོན་དགའ་སྟེ་སྨྲས་པ། བློན་པོ་འ་ཞ་ཡར་ཤོག་བྱས་པ་དང་། འ་ཞ་ཡར་ཡོང་སྟེ་ཚོང་དཔོན་ལ་སྨྲས་པ། བདག་ཉིན་ཁ་དཀར་ངོ་དཀར་ལ་ལམ་ནོར་ཞིག་བྱུང་། བླ་གཡུ་ཕྱག་ཏུ་འབུལ། བདག་གི་སྲོག་ལ་སྐྱོན་མེད་པ་ཞིག་ཞུ་ཟེར་བ་དང་། དེར་ཚོང་དཔོན་གྱིས་བླ་གཡུ་ཁྱེར་ཤོག་ཞུ་བར། འབུལ་ཆོག་བྱས་ནས་བློན་པོས་ཚོང་དཔོན་ལ་བླ་གཡུ་ཕུལ་ལོ། དེར་བླ་གཡུ་ཁྱེར་ནས་རྒྱལ་པོའི་དྲུང་དུ་ཕྱིན། བླ་གཡུ་ཕྱག་ཏུ་ཕུལ་ནས་ཚོང་དཔོན་གྱིས་ཞུས་པ། བདག་གི་མངོན་ཤེས་ལ་བློན་པོ་རྣམས་ཡིད་མ་ཆེས་པར་བློན་པོ་འ་ཞས་བླ་གཡུ་སྦས་པ་ཡིན་པར་འདུག་ཞུས་ནས་བླ་གཡུ་ཕྱག་ཏུ་ཕུལ་ལོ། དེ་ནས་རྒྱལ་པོས་བླ་གཡུ་བྱུང་བ་དེ་ལེགས་སོ་གསུངས། དེ་ནས་ནམ་ཞིག་སོང་བ་དང་། ཁང་པ་ཞིག་ཏུ་རྒྱལ་པོའི་སྲས་མོ་ལྷ་ལྕམ་དེ་ལ་ཚོང་དཔོན་གྱིས་སྨྲས་པ། ལྷ་ལྕམ་ཆང་ཞིམ་པོ་རྐྱན་བུ་གང་ཁྱེར་ཤོག་ཟེར་ནས་ཉི་མཐོངས་ཤིག་ཏུ་ཉལ་བསྡད་དོ། དེར་ལྷ་ལྕམ་གྱིས་ཆང་དེ་ཚོང་དཔོན་ལ་དྲངས་ནས་ཕྱེད་ཙམ་བཏུངས་ཚར་བ་དང་། གཅིག་ནས་གཉིས་སུ་བགྲངས་པས་ཁུ་རའི་མངོན་ཤེས་བྱུང་། མགོ་ལ་དགོ་སྤུ་སྟོར་བས་ལྟ་རྟའི་མངོན་ཤེས་བྱུང་། དོན་མེད་བྲོས་ནས་ཕྱིན་པས་བོང་བུའི་མངོན་ཤེས་བྱུང་། ནམ་གུང་འ་ཞ་བོས་པས་བླ་གཡུའི་མངོན་ཤེས་བྱུང་། ཚོང་དཔོན་ཡུལ་མེད་རྐང་འཁྱམས་ང་། རང་ཡུལ་དང་ཕ་མ་ཡང་དྲན། ལྷ་ལྕམ་ཁྱོད་ཀྱི་ཁྱོ་བོ་མི་ཡོང་བ་འདྲ་བྱས་པ་དང་། ལྷ་ལྕམ་ཚིག་པ་ཟོས་ཏེ་རྒྱལ་པོའི་སྐུ་མདུན་དུ་བརྒྱུགས་ནས། ངའི་འཁྱོ་བོ་འདི་དྲང་གཙང་ཞིག་མི་འདུག་ཅེས་རྒྱལ་པོ་ལ་ཞུས་སོ། རྒྱལ་པོས་གསུངས་པ། ཁྱོད་ཀྱི་ཁྱོ་བོ་ཚོང་དཔོན་འདི་མངོན་ཤེས་ཐོགས་པ་མེད་ལ་རིག་པ་དང་ལྡན་པ་ཞིག་ཡིན་པར་འདུག སྐྱེ་ས་རིགས་རྒྱུད་སུ་ལའང་རྒྱུད་མེད། བུ་མོ་ཁྱོད་ཀྱི་ཁྱོ་བོ་འདིས་ཡོང་བ་ཡོད། ཁ་རོག་ལོག་རྒྱུགས་གསུངས་པས། བུ་མོས་ཞུས་པ། གཅིག་ནས་གཉིས་སུ་བགྲངས་པའི་ཁུ་རའི་མངོན་ཤེས་ངས་ཀྱང་ཡོང་། ཁོ་རང་གི་ཕ་རྒན་འ་ཞ་བོས་པས་བློན་པོ་འ་ཞས་བླ་གཡུ་སྤྲད་ན་མངོན་ཤེས་ངས་ཀྱང་ཡོང་། ང་ནི་ཁོའི་ཆུང་མ་མི་བྱེད་ཞུས་པས། རྒྱལ་པོའི་སྐུ་མདུན་ན་བློན་པོ་རིག་པ་ཅན་ཞིག་ཡོད་པ་དེ་ན་རེ། སྔར་ནི་བདེན་པོ་ཡང་བྱུང་ལགས། ལྷ་ལྕམ་དེ་སྐད་གསུངས་ན། སང་ལུང་པའི་མི་རྣམས་ལ་འཛོམས་བརྡ་གཏོང་བར་འགྲོ་ཟེར་ཏེ། བློན་པོ་དེ་ཉིད་འཛའ་ར་ཞིག་ཁུར་ནས་ལ་རྒྱབ་དེར་སོང་ངོ་། ལ་ཕར་རྒྱབ་ནས་ཕྱོགས་བཞིར་བལྟས་པ་དང་། མི་ནི་གཅིག་ཀྱང་མེད་ཅིང་། རི་དྭགས་བྱ་བྱི་ལ་སོགས་ཀྱང་བྲོས་ཕྱིན། མེ་ཏོག་འཐུམ་བུ་ཞིག་གི་དཀྱིལ་དུ་སྦྲང་མ་གཅིག་ཟིར་ཟིར་ཟེར་བཞིན་འདུག་པ་དེ་བཟུང་ནས་དར་ཚོན་སྣ་སྔས་སྒྲིལ། ལག་པར་ཁྱེར་ནས་ཡོང་ངོ་། ལུང་པའི་མི་རྣམས་ལ་སྐད་བརྒྱབ་པས་མི་རྣམས་སྟོན་མོ་ཡོད་དམ་སྙམ་ནས་ཚོགས་ཆེན་པོ་བྱུང་ངོ་། དེར་རྒྱལ་པོ་གསེར་ཁྲི་ལ་གདན་དྲངས་ཏེ་ཚོང་དཔོན་ཤོག་གསུངས་སོ། ཚོང་དཔོན་སླེབས་པ་དང་བློན་པོས་སྨྲས་པ། མངོན་ཤེས་ཐོགས་པ་མེད་པའི་ཚོང་དཔོན་ལགས། བདག་གི་ལག་ན་ཅི་ཡོད་གདའ་ཟེར་བས། ཚོང་དཔོན་གྱིས་སྨྲས་པ། ངས་གཅིག་ནས་གཉིས་སུ་བགྲངས་པས་ཁུ་རའི་མངོན་ཤེས་བྱུང་། གནས་ཁང་གི་ཁང་ཐོག་བསྡད་པས་ལྷ་རྟའི་མངོན་ཤེས་བྱུང་། དོན་མེད་བྲོས་ནས་ཕྱིན་པས་བོང་བུའི་མངོན་ཤེས་བྱུང་། ནམ་གུང་འ་ཞ་བོས་པས་བླ་གཡའི་མངོན་ཤེས་བྱུང་། དེ་རིང་སྦྲང་མ་ཟིར་ཆུང་བློན་པོའི་ལག་ཏུ་འཆི་བ་འདྲ་བྱས་པས། བློན་པོ་རིགས་པ་ཅན་དེས་ཧ་ཧ་ཟེར། ལྷ་ལྕམ་གྱི་གཙོས་པའི་ལུང་པའི་མི་རྣམས་ངའི་རྩར་ཤོག ལ་ཕར་རྒྱབ་ན་མི་དང་བྱ་རི་དྭགས་གང་གིས་ཀྱང་མ་མཐོང་བ། ནེའུ་གསིང་ཞིག་ལ་སྦྲང་མ་འདི་འཁོར་བ་ངས་བཟུང་བ་ཡིན་ཏེ། ད་ཚོང་དཔོན་གྱིས་གསུངས་པ་བཞིན་ཨེ་འཆི་བ་བལྟ་ཟེར། དར་ཚོན་རིམ་གྱིས་བཀྲོལ་བ་དང་སྦྲང་མ་གནམ་ལ་ཕུར་མི་ཤེས་པས་ཚོང་དཔོན་ལ་ཡིད་ཆེས། རྒྱལ་བློན་རྣམས་ཀྱང་ཐུགས་ཡི་ཆེས། ལྷ་ལྕམ་དང་ཚོང་དཔོན་གཉིས་ལ་རྒྱལ་པོའི་རྒྱལ་གཞིས་སྤྲད་ཅིང་རྒྱལ་པོས་ཆོས་མཛད། རྒྱལ་འབངས་རྣམས་དར་ཞིང་རྒྱས་པ་བྱུང་བ་ཡིན་པར་གདའ་བྱས་པ་དང་། རྒྱལ་བུ་བདེ་སྤྱོད་བཟང་པོའི་ཁ་ནས་མི་ཁོ་བསོད་ནམས་ཆེ། བཤད་ཚད་ལམ་དུ་ཕྱིན་འདུག་བྱས་པས། རོ་ན་རེ། རོ་ལ་གཏམ་བྱུང་བྱ་ཁྲ་ཧུར་ཟེར། ལྡན་ལྕག་མེ་བུས་པ་འདྲ་བ་གསུམ་བརྒྱབ་ནས་རོ་དེ་རྡུལ་འཕྱུར་རེ་ལོག་སོང་ངོ་། རྒྱལ་བུ་ལོག་འགྲོ་བ་ལ་ནི་རོ་ཁུར་རྒྱུ་མེད་བསམ་ནས་ཡང་དུར་ཁྲོད་དེར་ཕྱིན་ནོ། །