སིལ་ཏོག

   བོད་མིས་བཟའ་བའི་སིལ་ཏོག་གི་རིགས་ཧ་ཅང་མང་ཞིང་གཙོ་བོ་ནི་མཚོ་ངོས་ལས་མཐོ་ཚད་རྨིད་སུམ་སྟོང་ཡན་ཆད་དུ་སྐྱེས་སིལ་རིགས་ཡིན་པ་སྟེ།   འབྲུ་སིལ་དང་འབྲོང་སིལ།   ཐང་སིལ།   སིལ་དམར།   སིལ་ནག   སིལ་སྒྲོ་བ།   དྲེད་མོ་སིལ་དཀར།    རྨིད་སུམ་སྟོང་མན་དུ་སྐྱེས་པའི་སིལ་རིགས་ལ།    སིལ་བོང་རྣ།   སིལ་འདེགས་ཀ   སིལ་བོང་ནུ།   ཕོ་རོག་གམ་ཁྭ་ཏའི་སིལ་ཏོག   གླ་སྟར།  མངར་ཁམ།    བིམ་པ།    ཀུ་ཤུ   ཚེའུ།   ཆང་བ་ལི།   སྟར་ག    རྒྱ་ཤུག  རྒུན་འབྲུམ།   ཀྭ་འབྲུ་སོགས་ཤིན་ཏུ་མང་ངོ་། །

   འོ་ཞོ།  ཞོ་ནི་འོ་མར་སྐྱུར་རྩི་བརྒྱབ་ནས་བསྙལ་བའི་བཏུང་བྱ་ནུར་མོ་ཞིག་ཡིན་ཞིང་།   རིགས་ལ་འབྲི་ཞོ་དང་ར་ཞོ།  བ་མོའི་ཞོ་སོགས་ཡོད་ལ་འོ་མ་མི་གཅིག་པའི་ཞོ་ལ་བཟོ་བའི་ཐབས་ཀྱང་མི་འདྲ་བས་མངར་ཞོ་དང་རློན་ཞོ།   ཞོ་སྐྱ་སོགས་ཡོད་ཅིང་།   ཞོ་ཡི་ནུས་པས་ཟས་འཇུ་ཞིང་གཉིད་འཕེལ།    བོད་མིས་ཞོ་འཐུང་རྗེས་ཇ་མི་བཏུང་བའི་སྲོལ་ཡོད་པས་གཏམ་དཔེར་ཡང་།   ཞོ་འཐུང་རྗེས་ཀྱི་ཇ་འཐུང་སློག་ཧྲུལ་ཁྱིས་གསེད་འདྲ།   ཞོ་འཐུང་རྗེས་ཀྱི་དུ་འཐེན་གངས་རི་སྨུག་པས་བཟུང་འདྲ་ཞེས་ཟེར་ཞིང་།   འོ་མ་ལའང་འབྲི་འོ་དང་མཛོ་མོའི་འོ་མ།   ར་མའི་འོ་མ།   མ་མོའི་འོ་མ།   བ་མོའི་འོ་མ་སོགས་ཡོད་ལ་འོ་མའི་ནུས་པས་ལུས་ཟུངས་གསོ་ཞིང་ས་བོན་འཕེལ།   བད་ཀན་དང་རླུང་མཁྲིས་སེལ།