ཆོས་དབྱིངས་སྐྱིད་སོགས་ལ་འགྲན་སྡུར་འདིའི་ནང་ཞུགས་པའི་ཐོབ་ཐང་ཐོབ།

       རྒྱུས་ལོན་པ་ལྟར་ན། ད་ལོའི་ཟླ3པར་སྤེལ་བའི2023ལོའི་རྒྱལ་ཡོངས་འདུར་རྒྱུག་འགྲན་སྡུར་གྱི་བྱ་དགའ་ཆེན་མོའི་འགྲན་སྡུར(ས་ཚིགས་དང་པོ)དང་འཛམ་གླིང་གཟེངས་རྟགས་འགྲན་སྡུར། དེ་བཞིན་ཨེ་ཤ་ཡའི་ལུས་རྩལ་འགྲན་ཚོགས་ཀྱི་འདེམས་སྒྲུག་འགྲན་སྡུར་ཨན་ཧུའེ་ཞིང་ཆེན་དུ་མཇུག་སྒྲིལ་ལ། ཐེངས་འདིའི་འགྲན་སྡུར་ནི2023ལོའི་འཛམ་གླིང་འདུར་རྒྱུག་འགྲན་སྡུར་གྱི་ཚད་གཞི་མཐོ་ཤོས་ཀྱི་རྣམ་གྲངས་རྐྱང་བའི་འགྲན་སྡུར་པུ་ཏ་ཕེ་སིའི་འཛམ་གླིང་གཟེངས་རྟགས་འགྲན་སྡུར་དང་ཧང་ཀྲིག་ཨེ་ཤ་ཡའི་ལུས་རྩལ་འགྲན་ཚོགས་ཀྱི་འདུར་རྒྱུག་འགྲན་སྡུར་རྣམ་གྲངས་ཀྱི་འདེམས་སྒྲུག་འགྲན་སྡུར་ཡིན་ཞིང་། མཚོ་སྔོན་གྱི་འདུར་རྒྱུག་ལུས་རྩལ་པ་གྲགས་ཅན་ཆོས་དབྱིངས་སྐྱིད་ཀྱིས་ཆུ་ཚོད2དང་སྐར་མ41སྐར་ཆ59ཡི་གྲུབ་འབྲས་ཐོག་ནས་སྐྱེས་མའི་སྤྱི་ལེ35ཡི་འདུར་རྒྱུག་འགྲན་སྡུར་ཁྲོད་ཨང་གཉིས་པ་བླངས་ཤིང་། ཀླུ་མོ་མཚོས་ཆུ་ཚོད2དང་སྐར་མ42། སྐར་ཆ39ཡི་གྲུབ་འབྲས་ཐོག་ནས་སྐྱེས་མའི་སྤྱི་ལེ35ཡི་འདུར་རྒྱུག་འགྲན་སྡུར་ཁྲོད་ཨང་གསུམ་པ་བླངས། བཀྲ་ཤིས་གཡང་འབུམ་གྱིས་ཆུ་ཚོད2དང་སྐར་མ29། སྐར་ཆ36གི་གྲུབ་འབྲས་ཐོག་ནས་སྐྱེས་པའི་སྤྱི་ལེ35ཡི་འདུར་རྒྱུག་འགྲན་སྡུར་ཁྲོད་ཨང་གསུམ་པ་བླངས་ཡོད་པ་རེད།
       ཀྲུང་གོ་མཆོང་རྒྱུག་འཕེན་གསུམ་མཐུན་ཚོགས་ཀྱིས་ཁྱབ་བསྒྲགས་བྱས་པའི་འདེམས་སྒྲུག་བྱ་ཐབས་གཞིར་བཟུང་། སྤྱི་ལེ35ཡི་འདུར་རྒྱུག་འགྲན་སྡུར་རྣམ་གྲངས་ནི2023ལོའི་རྒྱལ་ཡོངས་འདུར་རྒྱུག་འགྲན་སྡུར་གྱི་བྱ་དགའ་ཆེན་མོའི་འགྲན་སྡུར(ས་ཚིགས་དང་པོ)དང་འཛམ་གླིང་གཟེངས་རྟགས་འགྲན་བསྡུར། དེ་བཞིན་ཨེ་ཤ་ཡའི་ལུས་རྩལ་འགྲན་ཚོགས་ཀྱི་འདེམས་སྒྲུག་འགྲན་སྡུར། སི་ལོ་ཧྥ་ཁིའི་ཏུའུ་ཏིན་ཞིའི་འདུར་རྒྱུག་འགྲན་སྡུར་བཅས་ཀྱི་ཕྱོགས་བསྡུས་གྲུབ་འབྲས་ལ་གཞིགས་ནས་འདེམས་སྒྲུག་བྱས་ཤིང་། ཆོས་དབྱིངས་སྐྱིད་དང་ཀླུ་མོ་མཚོ། བཀྲ་ཤིས་གཡང་འབུམ་བཅས་ལ་གཡུར་དུ་ཟ་བའི་གྲུབ་འབྲས་ཐོག་ནས་པུ་ཏ་ཕེ་སིའི་འཛམ་གླིང་གཟེངས་རྟགས་འགྲན་སྡུར་ནང་ཞུགས་པའི་ཐོབ་ཐང་ཐོབ་ཡོད་པ་རེད།
       རྒྱུས་ལོན་པ་ལྟར་ན། ད་ལོའི་ཟླ8པར་པུ་ཏ་ཕེ་སི་རུ་མཚོ་བོད་མཐོ་སྒང་ནས་ཐོན་པའི་བོད་རིགས་ལུས་རྩལ་པ་གསུམ་མཉམ་དུ་འགྲན་རར་བསྐྱོད་རྒྱུ་ཡིན་ལ། དེ་དང་ཆབས་ཅིག་ཀྲུང་གོའི་མཆོང་རྒྱུག་འཕེན་གསུམ་མཐུན་ཚོགས་ཀྱིས་ཁྱབ་བསྒྲགས་བྱས་པའི་ཧང་ཀྲིག་ཨེ་ཤེ་ཡ་ལུས་རྩལ་འགྲན་ཚོགས་ཀྱི་འདེམས་སྒྲུག་བྱེད་ཐབས་ལ་གཞིགས་ནས་པུ་ཏ་ཕེ་སིའི་འཛམ་གླིང་གཟེངས་རྟགས་འགྲན་སྡུར་གྱི་ཚན་ཆུང་སོ་སོའི་འགྲན་སྡུར་ལ་ཞུགས་པའི་ཀྲུང་གོའི་བདམས་ཐོན་པ་གྲགས་ཅན་གསུམ་ལས་ཕུལ་བྱུང་གྲུབ་འབྲས་ལེན་མཁན་གཉིས་ལ་ཧང་ཀྲིག་ཨེ་ཤ་ཡ་ལུས་རྩལ་འགྲན་ཚོགས་ཀྱི་འགྲན་སྡུར་ནང་ཞུགས་པའི་ཐོབ་ཐང་ཐོབ་རྒྱུ་ཡིན་པ་རེད། བྱེད་ཐབས་དེ་གཞིར་བཟུང་ནས་འདེམས་སྒྲུག་བྱས་ཚེ་ཆོས་དབྱིངས་སྐྱིད་དང་ཀླུ་མོ་མཚོ་གཉིས་ལས་གཅིག་ལ་ཧང་ཀྲིག་ཨེ་ཤ་ཡ་ལུས་རྩལ་འགྲན་ཚོགས་ནང་ཞུགས་པའི་ཐོབ་ཐང་ཐོབ་དགོས་པ་རེད།
       ཆོས་དབྱིངས་སྐྱིད་སོགས་ཀྱིས་པུ་ཏ་ཕེ་སིའི་འཛམ་གླིང་གཟེངས་རྟགས་འགྲན་སྡུར་ལ་བདེ་བླག་ངང་བདམས་ཐོན་བྱུང་བ་ཤེས་རྟོགས་བྱུང་རྗེས“ད་ནི་ལས་འགན་དངོས་སུ་མགོ་རྩོམ་རྒྱུ་ཡིན་པས། ཟླ་ལྔ་ཙམ་གྱི་དུས་ཚོད་ལས་མེད་པའི་གྲ་སྒྲིག་ཁྲོད་ནུས་ཤུགས་ཡོད་རྒུས་སློབ་ཚན་རེ་རེ་ནན་གྱིས་སྦྱོང་བ་དང་གོམ་སྟབས་རེ་རེ་བཞིན་ཡག་པོར་སྤོས་ནས་རྒྱལ་ཁའི་དམིགས་འབེན་ལ་དམིགས་ནས་འབད་བརྩོན་བྱས་ཏེ་དེ་ལས་ལེགས་པའི་གྲུབ་འབྲས་ལེན་པར་བརྩོན་ལེན་བྱ་རྒྱུ་ཡིན”པར་བཤད།
       འདིའི་སྔོན་ལ། ཆོས་དབྱིངས་སྐྱིད་ཀྱིས་ལོན་ཏོན་ཨོ་རྩལ་འགྲན་ཚོགས་ཀྱི་སྤྱི་ལེ20ཡི་འདུར་རྒྱུག་འགྲན་སྡུར་ཁྲོད་ཨང་དང་པོ་བླངས་ཤིང་། ཀླུ་མོ་མཚོས2019ལོའི་འཛམ་གླིང་གཟེངས་རྟགས་འགྲན་སྡུར་གྱི་སྤྱི་ལེ50ཡི་འདུར་རྒྱུག་འགྲན་སྡུར་ཁྲོད་དངུལ་གྱི་རྟགས་མ་བླངས་ལ། བཀྲ་ཤིས་གཡང་འབུམ་གྱིས2022ལོའི་འཛམ་གླིང་མཆོང་རྒྱུག་འཕེན་གསུམ་གྱི་འདུར་རྒྱུག་འགྲན་སྡུར་གྱི་ཚོགས་པའི་གཟེངས་རྟགས་འགྲན་སྡུར་ཁྲོད་སྤྱི་ལེ35ཡི་ཚོགས་པའི་དངུལ་གྱི་རྟགས་མ་བླངས་ཡོད་པ་རེད། ཕུལ་བྱུང་གི་གྲུབ་འབྲས་དེ་དག་ཐོབ་རྗེས་ཁོ་ཚོས་སྔར་བཞིན་སྦྱོང་བརྡར་གྱི་འཐབ་ས་དང་པོ་བརྟན་སྲུང་བྱས་ནས་མདུན་སྐྱོད་ཀྱི་གོམ་སྟབས་ནམ་ཡང་ལྷོད་མྱོང་མེད།