ངོས་དང་པོ > རྩེད་འཇོ། > ལུས་རྩལ། > ༄༅།།2020ལོའི་མཚོ་སྔོན་ཐུན་ཏེའི་རྫོང་རུ་བུམ་པའི་མཐོ་སྒང་ཡུལ་ཕྱིའི་རྐང་རྒྱུག་འགྲན་སློང་འགྲན་བསྡུར་དང་སྐབས་གཉིས་པའི་རྫོང་རུའི་འབྱུང་ཡུལ་དང་གནས་མཆོག་འབའ་རྫོང་ཞེས་པའི་ཡུལ་སྐོར་ངོ་སྦྱོར་བྱ་འགུལ་སྤེལ།

༄༅།།2020ལོའི་མཚོ་སྔོན་ཐུན་ཏེའི་རྫོང་རུ་བུམ་པའི་མཐོ་སྒང་ཡུལ་ཕྱིའི་རྐང་རྒྱུག་འགྲན་སློང་འགྲན་བསྡུར་དང་སྐབས་གཉིས་པའི་རྫོང་རུའི་འབྱུང་ཡུལ་དང་གནས་མཆོག་འབའ་རྫོང་ཞེས་པའི་ཡུལ་སྐོར་ངོ་སྦྱོར་བྱ་འགུལ་སྤེལ།

རྩོམ་པ་པོ།：མི་གསལ། ཡོང་ཁུངས།：མཚོ་ལྷོ་བོད་ཡིག་སྨྱན་གསར། དུས་ཚོད།：2020-09-22 09:21:17 ཀློག་གྲངས།：

སྤྱི་ཟླ9བའི་ཚེས21ཉིན། མཚོ་ལྷོ་ཁུལ་མི་དམངས་སྲིད་གཞུང་དང་མཚོ་སྔོན་ཞིང་ཆེན་ལུས་རྩལ་སྤྱིའི་ཚོགས་པས་གཙོ་སྒྲུབ་དང་། ཀྲུང་གུང་ཐུན་ཏེ་རྫོང་ཨུ་དང་། ཐུན་ཏེ་རྫོང་མི་དམངས་སྲིད་གཞུང་གིས་འགན་སྒྲུབ་བྱས་ཤིང་། ཐུན་ཏེ་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་དང་། ཐུན་ཏེ་རྫོང་ཞིང་ཕྱུགས་དང་ཆུ་བེད་ཅུའུ། མཚོ་སྔོན་ཞིང་ཆེན་ཡུལ་ཕྱིའི་རྐང་རྒྱུག་མཐུན་ཚོགས་བཅས་ཀྱིས་རོགས་སྒྲུབ་བྱས་པའི2020ལོའི་མཚོ་སྔོན་ཐུན་ཏེའི་རྫོང་རུ་བུམ་པའི་མཐོ་སྒང་ཡུལ་ཕྱིའི་རྐང་རྒྱུག་འགྲན་སློང་འགྲན་བསྡུར་དང་སྐབས་གཉིས་པའི་རྫོང་རུའི་འབྱུང་ཡུལ་དང་གནས་མཆོག་འབའ་རྫོང་ཞེས་པའི་ཡུལ་སྐོར་ངོ་སྦྱོར་བྱ་འགུལ་དེ་ཐུན་ཏེ་རྫོང་འབའ་མདོ་སྡེ་བ་རུ་གཟབ་རྒྱས་ངང་བསྡུས།

ཐེངས་འདིའི་འགྲན་བསྡུར་སྟེང་ཡུན་ནན་དང་ཀན་སུའུ། ཧྲན་ཏུང་། ཅང་ཞི། ཧུའུ་ནན། མཚོ་སྔོན་སོགས་ས་ཁུལ་ནས་ཐོན་པའི་འགྲན་ཞུགས་པ་མི400ཡོད། རེབ་འདིའི་ཡུལ་ཕྱིའི་འགྲན་རྒྱུག་དེ་གཙོ་ཆེ་བ་རིགས་གཉིས་སུ་བགར་ཡོད་དེ། ཆེད་ལས་རང་བཞིན་གྱི་འགྲན་ཞུགས་པ་དང་མང་ཚོགས་རང་བཞིན་གྱི་འགྲན་ཞུགས་པ་སྟེ། ཆེད་ལས་འགྲན་ཞུགས་པའི་ལམ་ཐག་སྤྱི་ལེ38ཡིན་དང་། འགྲན་རྒྱུག་ལམ་ཐིག་འབའ་མདོ་ནས་མགོ་བརྩམས་ཏེ། མཐུན་སྒྲིལ་སྡེ་བ་དང་། ཐ་ར་ལུང་པ། ཝ་དཀར་ཞོལ་མ། དེ་ནས་ཡང་བསྐྱར་འབའ་མདོ་སྡེ་བ་བཅས་ཡིན། མང་ཚོགས་འགྲན་ཞུགས་པའི་ལམ་ཐག་སྤྱི་ལེ16ཡིན་ལ་ལམ་ཐིག་འབའ་མདོ་སྡེ་བ་ནས་མཐུན་སྒྲིལ་སྡེ་བ་དང་ཡང་བསྐྱར་འབའ་མདོ་སྡེ་བ་ཡིན།

ཛ་དྲག་གི་འགྲན་རྩོད་བརྒྱུད་མཐར། འགྲན་ཐག་སྤྱི་ལེ38ཡིན་པའི་ཆེད་ལས་ཚན་ཆུང་ཁྲོད་སྐྱེས་པ་མཱ་ཞུའེ་ཅུན་དང་སྐྱེས་མ་ཚའོ་མོ་ཅེ་ལ་ཨང་དང་པོ་ཐོབ་པ་དང་། དེ་མིན་འགྲན་ཐག་སྤྱི་ལེ16ཡིན་པའི་མང་ཚོགས་འགྲན་ཞུགས་ཚན་ཆུང་ཁྲོད་སྐྱེས་པ་འཇིགས་མེད་བསམ་གཏན་དང་སྐྱེས་མ་སྟག་མོ་མཚོ་གཉིས་ལའང་ཨང་དང་པོའི་བྱ་དགའ་བཅས་ཐོབ་པ་རེད།

འགྲན་རྒྱུག་བྱེད་པའི་ཚུལ།

རྫོང་རུ་བུམ་པའི་མཚོ་སྔོན་ཞིང་ཆེན་མཐོ་སྒང་ཡུལ་ཕྱིའི་རྐང་རྒྱུག་འགྲན་སློང་འགྲན་བསྡུར་ནི་མཚོ་སྔོན་ཞིང་ཆེན་ལ་མཚོན་ན་ད་བར་དུ་མཚོ་ངོས་ལས་ཆེས་མཐོ་བ་དང་། འགྲན་ཞུགས་མི་གྲངས་ཆེས་མང་བ། དེ་མིན་བྱ་དགའ་ཆེས་མཐོ་བའི་ཡུལ་ཕྱིའི་འགྲན་རྒྱུག་ཡིན་པར་མ་ཟད། རྒྱལ་ནང་དུའང་མཚོ་ངོས་ལས་ཆེས་མཐོ་ཞིང་། མི་དང་རང་བྱུང་ཁམས་ཀྱི་འབྲེལ་ལམ་ཡང་ཆེས་ཉེ་བའི་རྨ་ཆུའི་འགྲམ་རྒྱུད་ཀྱི་ཡུལ་ཕྱིའི་འགྲན་རྒྱུག་ཅིག་ཡིན་ལ་དུས་ཡུལ་ལོ་ངོ་གཉིས་རིང་འབད་བརྩོན་བྱས་པ་ལས་ཐུན་ཏེ་རྫོང་གིས་རྫོང་རུའི་འབྱུང་གནས་དང་གནས་མཆོག་འབའ་རྫོང་ཞེས་པའི་རང་གི་མིང་བྱང་ལ་བརྟེན་ནས་འཛམ་གླིང་ལ་དྲིལ་སྒྲོག་བྱེད་པའི་སྟེགས་བུ་གལ་ཆེན་ཞིག་ཀྱང་ཡིན་ནོ།།