ཁྱུང་མཆུ་རྫོང་གསེར་དེའུ་གྲོང་རྡལ་སློབ་ཆུང་གིས་དཔེ་ཀློག་དུས་དྲན་གྱི་སྙན་ངག་གྱེར་འདོན་སྤེལ་བ།

     སྤྱི་ལོ2016ལོའི་ཟླ4བའི་ཚེས23ཉིན་ཏེ་སྐབས21པའི་འཛམ་གླིང་དཔེ་ཀློག་ཉིན་མོར། མདོ་སྨད་ཁྱུང་མཆུ་རྫོང་གསེར་དེའུ་གྲོང་རྡལ་སློབ་ཆུང་གིས་འཛམ་གླིང་དཔེ་ཀློག་དུས་དྲན་གྱི་སྙན་ངག་གྱེར་འདོན་འགྲན་སྡུར་སྐབས་གསུམ་པ་དབྱངས་ཀྱི་གཤོག་པ་ལྗང་ཁུ་ཞེས་པའི་བྱ་འགུལ་སྤེལ།
གཅིག དཔེ་ཀློག་དུས་ཆེན་ངོ་སྤྲོད་མདོ་ཙམ།
     རྒྱལ་སྤྱིའི་དཔེ་ཀློག་དུས་ཆེན། མིང་ཆ་ཚང་ལ་འཛམ་གླིང་དཔེ་ཀློག་དང་དཔེ་སྐྲུན་རང་དབང་གི་ཉིན་མོ་ཟེར། དཔེ་ཀློག་དུས་ཆེན་འདི་ནི་སི་པེན་རྒྱལ་ཁབ་ཀྱི་གནའ་བོའི་ངོ་མཚར་གཏམ་རྒྱུད་ཅིག་ལས་བྱུང་། དེ་ཡང་སི་པེན་གྱི་སྒ་ཁྲ་ལོ་ནི་ཡ་ཟེར་བའི་ཡུལ་དེའི་རི་ན་མི་ཤ་ཟ་མཁན་གྱི་འབྲུག་ཧ་ཅང་གཏུམ་པོ་ཞིག་ཡོད་པར་གྲགས་ལ། ལོ་རེར་མི་རེ་འབྲུག་གཏུམ་པོ་དེར་གསོན་འབུལ་བྱེད་པའི་སྲོལ་ཞིག་ཡོད། ལོ་ཞིག་ལ་རྒྱལ་པོའི་སྲས་མོར་ཁེལ་བས། བཟློག་ཐབས་མེད་པའི་ལས་ཀྱིས་སྲས་མོ་མཆོད་འབུལ་བྱེད་གྲབས་ཀྱི་དུས་དེར། དཔའ་རྒོད་ལྗོར་ལྗིས་ཟེར་བ་སླེབས་ཤིང་། ཟླ4བའི་ཚེས23ཉིན། དཔའ་རྒོད་ཁོ་རི་ལ་འཛེགས་ནས་མི་ཤ་ཟ་མཁན་གྱི་འབྲུག་གཏུམ་པོ་དང་ཉིན་གང་བོར་འཐབ་འཛིང་བྱས་མཐར་གཞི་ནས་འདུལ་ཐུབ་པ་བྱུང་། རྒྱལ་པོའི་སྲས་མོ་ཡང་སྲོག་ལས་ཐར་བས་སྲས་མོས་དཔའ་རྒོད་དེ་ལ་དཔེ་ཆ་ཞིག་མཚམས་རྟགས་སུ་ཕུལ། དེས་ནི་ཤེས་རབ་དང་སྟོབས་ཤུགས་ཟུང་དུ་མཚོན་པ་རེད། དེ་ནས་བཟུང་། ཡུལ་དེ་གའི་བུད་མེད་རྣམས་ཀྱིས་ཀྱང་ལོ་རེའི་ཉིན་མོ་འདིར་རང་གི་ཁྱོ་ག་དང་མཛའ་བོ་སོགས་ལ་དཔེ་ཆ་འབུལ་བའི་སྲོལ་དར་ཞིང་། སྐྱེས་པ་ཚོས་ཕྱིར་རྒྱ་སེ་མེ་ཏོག་ལེགས་སྐྱེས་སུ་འབུལ་བ་ཡིན། རྟེན་འབྲེལ་ལེགས་པ་ཞིག་ལ། ཟླ4བའི་ཚེས23ཉིན་ནི་སི་པེན་རྒྱལ་ཁབ་ཀྱི་འཁྲབ་གཞུང་རྩོམ་པ་པོ་དང་སྙན་ངག་པ། འཛམ་གླིང་དེང་རབས་བརྩམས་སྒྲུང་གི་སྲོལ་འབྱེད་པ་སེ་ཝན་ཐེའུ་སི་ཡི་རྗེས་དྲན་ཉིན་མོ་ཡིན་ལ། ཡོ་རོབ་གླིང་གི་རིག་རྩལ་བསྐྱར་དར་སྐབས་ཀྱི་མིང་དུ་གྲགས་པའི་རྩོམ་པ་པོ་གྲགས་ཅན་ཤིགས་སི་ཕེར་ལགས་ཀྱི་འཁྲུངས་སྐར་དང་འདས་སྐར་གཅིག་ཏུ་ཁེལ་བའི་ཉིན་མོའང་ཡིན། ད་དུང་ཨ་རིའི་རྩོམ་པ་པོ་ནཱ་ཕུའུ་ཁི་ཧྥོའུ་དང་ཧྥ་རན་སིའི་རྩོམ་པ་པོ་མོ་ལེའུ་སི་ཏི་ལོའུ་ཨང་། འཁྱག་གླིང་གི་ནོ་པེར་རྩོམ་རིག་བྱ་དགའ་ཐོབ་མཁན་ལཱ་ཁེ་སི་ནེའུ་སི་སོགས་འཛམ་གླིང་ཡུལ་གྲུ་ཀུན་ལ་མིང་དུ་གྲགས་པའི་རྩོམ་པ་པོ་མང་པོ་ཞིག་གི་སྐྱེས་སྐར་དུའང་ཁེལ་བས་ན། 1995ལོར། མཉམ་འབྲེལ་རྒྱལ་ཚོགས་ཚང་གིས་ཟླ4བའི་ཚེས23ཉིན་འདི་རྒྱལ་སྤྱིའི་དཔེ་ཀློག་ཉིན་མོར་བདམས་ཤིང་། ད་ཆ་འཛམ་གླིང་ཤར་ནུབ་ཀུན་གྱི་རྒྱལ་ཁབ་བརྒྱ་ལྷག་གིས་ཉིན་མོ་འདི་ལ་སོ་སོའི་བྱེད་ལུགས་ལྟར་དཔེ་ཀློག་སྐོར་གྱི་ཆོ་ག་སྣ་ཚོགས་སྤེལ་བཞིན་ཡོད། འདི་ནི་འགྲོ་བ་མིའི་རིགས་ཀྱིས་ཤེས་རིག་གི་རིན་ཐང་ལ་བརྩི་བཀུར་བྱེད་པའི་ཀུན་སློང་དྭངས་མ་ཞིག་ཡིན་ལ། ཤེས་རིག་དང་དཔེ་སྐྲུན་གྱི་རང་དབང་ལ་སྲུང་སྐྱོབ་མཛད་པའི་ལོ་རྒྱུས་ཀྱི་རྡོ་རིང་ཞིག་ཏུའང་གྲུབ།
གཉིས། འདི་ལྟའི་བྱ་འགུལ་སྤེལ་དོན།
     ད་ལྟའི་མི་རྣམས་ཀྱིས། གཞུང་གི་དུས་ཆེན་ཁག་གཙོ་བྱས་པའི་དུས་ཆེན་མང་པོ་ཞིག་ལ་ང་ངར་ཁྱོད་ངར་གྱིས་སྔ་ཕྱི་རྩོད་ཀྱིན་ཡོད་དེ། རྒྱུ་མཚན་ནི་དུས་ཆེན་དེ་ག་ལ་གཞུང་ནས་ངལ་གསོ་གནང་བའམ། ཟ་འཐུང་གི་སྟོན་མོ་བཤམས་པ། ཡར་མར་འཁྱམ་ཉུལ་གྱི་གླགས་རྙེད་པ་གང་རུང་ཁོ་ནས་མ་གཏོགས། དུས་ཆེན་ཟེར་བ་ཞིག་དོན་གྱི་ཆ་ནས་དུས་ཆེན་ལྟར་རོལ་ཅིང་དུས་ཆེན་པོ་ཞིག་ཡིན་པའི་དོན་སྙིང་ཟེར་བ་སོགས་ལ་ནི་མཉམ་འཇོག་གང་ཡང་མེད་པས། དཔེ་ཀློག་དུས་ཆེན་ཟེར་བ་སོགས་ལ་ནི་བཤད་མ་དགོས་ས་རེད། ཐ་ན་འཛམ་གླིང་གི་དཔེ་ཀློག་ཉིན་མོ་ཟེར་བ་ཞིག་ཡོད་རབས་ཤེས་ཀྱི་མེད་ལ་ཤེས་རུང་མཐོང་ཆེན་བྱེད་ཐུབ་མེད། འདི་ནི་ང་རང་ཚོ་ངོ་གནོངས་དགོས་པ་ཞིག་མ་ཡིན་ནམ།
     སྤྱིར་ན་འུ་ཅག་ནི་མ་གཞི་ནས་རིག་གནས་དང་དཔེ་ཆ་ལ་འབྲེལ་འདྲེས་ཉུང་ལ། ལྷག་པར་སློབ་གསོའི་སྡེ་ཁག་ན་བྱ་བ་གཉེར་བའི་དགེ་རྒན་མང་པོ་ཞིག་གིས་ཀྱང་རང་གི་འཚོ་བ་དང་ཁེ་ཕན་ཁོ་ན་ཙམ་གྱིས་སློབ་ཁྲིད་དང་སློབ་གསོའི་ལས་སུ་སྙེགས་པ་ལས། ངེས་པ་དོན་གྱིས་སློབ་གསོ་དང་སློབ་ཁྲིད་ལ་སེམས་ཁུར་རྨང་ནས་བྱས་ཏེ་རང་ནུས་ཅི་ལྕོག་གིས་དཔེ་ཀློག་ཀྱང་ཅི་ཐུབ་ཅིག་ཨེ་འགྲུབ་བལྟ་མཁན་ཤིན་ཏུ་ཉུང་བ་དེས་ནི། རང་ཅག་གི་སློབ་གསོ་དང་ཤེས་རིག་འཕེལ་རྒྱས་ཀྱི་བག་ལ་ཞ་བའི་ལམ་ཁ་དེ་གསལ་བོར་མཚོན་ཡོད་པ་མ་ཡིན་ནམ། མ་གཞི་དུས་དྲན་ནི་དུས་དྲན་ཙམ་སྟེ། ཉིན་གཅིག་རིང་གི་བྱ་འགུལ་ཁོ་ན་ཙམ་ཡིན་ན་ཡང་། ཅིའི་ཕྱིར་དུས་དྲན་བྱེད་པ་དང་ཇི་ལྟར་དུས་དྲན་བྱེད་དགོས་པའི་དྲི་བ་ནི་སོ་སོའི་ཡུལ་དུ་ངེས་པར་དུ་ཡོད་དགོས་པའི་དོན་དག་ཅིག་རེད་སྙམ། དེ་བཞིན་དཔེ་ཀློག་ཉིན་མོར་དུས་དྲན་བྱེད་པ་ཡང་སློབ་མའི་ངོས་ནས་དཔེ་ཆ་ཀློག་པ་ནི་གལ་ཆེན་པོ་ཞིག་དང་རིན་ཐང་ཆེན་པོ་ཅན་ཞིག་ཡིན་པའི་ངེས་ཤེས་འོག་དཔེ་ཀློག་ལ་དགའ་མོས་བསྐྱེད་ཐབས་དང་དགེ་རྒན་སོགས་ཀྱིས་རང་གི་དཔེ་ཀློག་ལ་འཆར་བཀོད་གསར་བ་ཞིག་དང་གོམ་སྟབས་གསར་བ་ཞིག ཡང་ན་སྟོབས་ཤུགས་གསར་བ་ཞིག་སྨིན་དགོས་པ་ནི་འཛམ་གླིང་དཔེ་ཀློག་ཉིན་མོར་དུས་དྲན་བྱེད་དགོས་ཀྱི་རྒྱུ་མཚན་ཞིག་ཀྱང་རེད་འདོད།
གསུམ། བྱ་འགུལ་གྱི་བརྒྱུད་རིམ།
     གསེར་དེའུ་སློབ་ཆུང་གིས་སྤྱི་ལོ2014ལོ་ནས་བཟུང་འཛམ་གླིང་དཔེ་ཀློག་ཉིན་མོ་རྗེས་དྲན་གྱི་ཆོ་ག་སྤེལ་བ་ཡིན་ཞིང་། དེ་ནི་སློབ་གྲོགས་དང་དགེ་རྒན་རྣམས་དཔེ་ཀློག་ལ་དགའ་བ་དང་། དཔེ་ཀློག་གི་གོམས་གཤིས་ཡག་པོ་ཆགས་པར་དམིགས་པ་ཡིན། གསེར་དེའུ་སློབ་ཆུང་གི་དཔེ་མཛོད་ཁང་དུ། གཞུང་གིས་སྤྲད་པའི་དཔེ་ཆ་ལས་གཞན་ཟི་ལིང་སོགས་ནས་སློབ་མ་དང་དགེ་རྒན་སོ་སོར་འཚམས་པའི་བོད་ཡིག་དཔེ་ཆ་དུ་མ་བླུས་ཡོད་ཅིང་། སློབ་གྲོགས་དང་དགེ་རྒན་རྣམས་ལ་ཅི་འདོད་དུ་གཡར་བཞིན་ཡོད་པས། ལོ་རིམ་མཐོ་བའི་སློབ་གྲོགས་སྐོར་ཞིག་ལ་དཔེ་ཀློག་གི་གོམས་གཤིས་ཡག་པོ་ཆགས་ཡོད། སང་ལོ་སློབ་གྲྭའི་སློབ་ཁྲིད་ཐོག་ཁང་ལེགས་འགྲུབ་བྱུང་རྗེས། དགེ་སློབ70ཡས་མས་ཀྱིས་དུས་མཉམ་དུ་དཔེ་ཀློག་བྱེད་ཐུབ་པའི་དཔེ་མཛོད་ཁང་ཞིག་བསྐྲུན་འཆར་ཡང་ཡོད་དོ། །
     སྤྱི་ལོ2016ལོའི་ཟླ4བའི་ཚེས23ཉིན་གྱི་སྔ་དྲོའི་ཆུ་ཚོད8ཀྱི་སྟེང་ནས་ང་ཚོས་ལོ་སྔོན་མའི་ཉམས་མྱོང་དང་རྨང་གཞིའི་སྟེང་ནས་སླར་ཡང་ལོ་འདིའི་དཔེ་ཀློག་ཉིན་མོར་དུས་དྲན་གྱི་ཆོ་ག་སྟེ། སྐབས་གསུམ་པའི་སྙན་ངག་གྱེར་འདོན་འགྲན་སྡུར་སྤེལ་ཞིང་། འདི་གའི་སློབ་གྲྭ་གཞུང་གིས་རྒྱབ་སྐྱོར་དང་མཐུན་རྐྱེན་གྱ་ནོམ་པའི་ཐོག་དགེ་རྒན་ཡར་སེམས་ཅན་མང་པོའི་མ་བགོས་ཁུར་ལེན་གྱིས་རོགས་འདེགས་དང་། སློབ་མ་དག་གི་འབད་པ་ཧུར་ཐག་བཅས་ཀྱིས་ཐེངས་འདིའི་བྱ་འགུལ་གྱི་མགོ་མཇུག་བར་གསུམ་ཅུང་ལེགས་འགྲུབ་བྱུང་བར་སྙམ།