༄༅།།ཀྲུང་གུང་མཚོ་སྔོན་ཞིང་ཨུའི་ཏང་གི་སློབ་གྲྭའི་དགེ་རྒན་ཆེན་མོ་བསོད་ནམས་དབང་རྒྱལ་གྱིས་མཚོ་ལྷོ་ཁུལ་གྱི་རྐང་འཛིན་ལོ་ཙཱ་མི་སྣ་དག་ལ་མི་རིགས་སྐད་ཡིག་ལག་ལེན་ཐད་ནས་འཆད་ཁྲིད་གནང་།

སྤྱི་ཟླ7པའི་ཚེས15ཉིན་གྱི་སྔ་དྲོར། མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་རྩ་འཛུགས་ལྟར། ཀྲུང་གུང་མཚོ་སྔོན་ཞིང་ཨུའི་ཏང་གི་སློབ་གྲྭའི་དགེ་རྒན་ཆེན་མོ་བསོད་ནམས་དབང་རྒྱལ་གྱིས་མཚོ་ལྷོ་ཁུལ་དང་རྫོང་སོ་སོའི་མི་རིགས་སྐད་ཡིག་བྱ་བའི་ལྟེ་གནས་དང་རྒྱང་སྒྲོག་བརྙན་འཕྲིན་ཁང་། ཚགས་པར་ཁང་། སྲིད་ཁྲིམས་སྡེ་ཁག དེ་མིན་ཁུལ་ཡོངས་ཀྱི་ཡུལ་ཚོ་དང་གྲོང་རྡལ་གྱི་ལོ་ཙཱའི་ལས་ལ་གཞོལ་བའི་རྐང་འཛིན་པ་སོགས་བསྡོམས་པས་མི40ལ《སྤྱི་ཚོགས་བཅོས་སྐྱོང་མཐོང་ལམ་གྱི་མི་རིགས་སྐད་ཡིག་ལག་ལེན་ཐབས་ལམ》ཞེས་པ་བརྗོད་གཞི་བྱས་ཏེ་སྤྱི་ཚོགས་བཅོས་སྐྱོང་དང་སྐད་ཡིག་བཅོས་སྐྱོང་། ཀྲུང་གོ་གུང་ཁྲན་ཏང་གི་སྐད་ཡིག་བཅོས་སྐྱོང་ལྟ་བ་དང་ལག་ལེན། མི་རིགས་སྐད་ཡིག་གི་སྤྱི་ཚོགས་བཅོས་སྐྱོང་ལག་ལེན། སྒོས་སུ་གྲོང་ཁྱེར་དང་ཞིང་སྡེའི་སྐད་ཡིག་བཅོས་སྐྱོང་དང་། རྒྱལ་ཡོངས་མི་རིགས་བྱ་བའི་གྲོས་ཚོགས་ཀྱི་དགོངས་དོན། ཚོགས་ཆེན་བཅུ་དགུ་བའི་སྙན་ཞུའི་དགོངས་དོན་བསྣར་རྐྱོང་སོགས་ཀྱི་ཐད་ནས་འཆད་ཁྲིད་དཔྱིས་ཕྱིན་པ་གནང་། 
དགེ་རྒན་བསོད་ནམས་དབང་རྒྱལ། ལན་གྲུ་སློབ་གྲྭ་ཆེན་མོའི་འབུམ་རམས་པ། མཚོ་སྔོན་ཞིང་ཆེན་ཏང་གི་སློབ་གྲྭ་དང་ཞིང་ཆེན་སྲིད་གཞུང་སློབ་གླིང་། ཞིང་ཆེན་སྤྱི་ཚོགས་རིང་ལུགས་སློབ་གླིང་གི་དགེ་རྒན་ཆེན་མོ། མཚོ་སྔོན་བོད་རིགས་ཞིབ་འཇུག་ཚོགས་པའི་དྲུང་ཆེ་གཞོན་པ་དང་མཚོ་སྔོན་ཞིང་ཆེན་ནང་བསྟན་སློབ་གླིང་གི་དགེ་རྒན་ཆེན་མོའི་ལས་འགན་གཅིག་ལྕོགས་སུ་བཞེས་ཡོད་ལ། སྔ་ཕྱིར་དུ་མཚོ་སྔོན་མཐོ་རིམ་གསར་གཏོད་འཇོན་མི་འཆར་གཞིའི་རྩེར་སོན་འཇོན་ཐང་མི་སྣ་དང་མཚོ་སྔོན་ཞིང་ཆེན་ཆེད་ལས་ལག་རྩལ་གྱི་ཕུལ་བྱུང་འཇོན་མི། མཐོ་སྒང་སྔོན་ཐོན་དགེ་རྒན་དཔུང་སྡེའི་དགེ་རྒན་སོགས་སུ་བདམས། ཞིང་ཆེན་ཨུ་ཡོན་ལྷན་ཁང་དང་ཀྲུང་དབྱང་ལ་བོད་ཁུལ་སྤྱི་ཚོགས་ཀྱི་དཔལ་འབྱོར་འཕེལ་རྒྱས་གཏོང་ཐབས་ཕྱོགས་ནས་ནང་ཁུལ་གྱི་གཞུང་ལུགས་དཔྱད་གཞི་བྲིས། ཁོང་གི་ཆེད་དོན་སློབ་ཁྲིད་ལ2016ལོར་ཀྲུང་དབྱང་སྤྱི་ཚོགས་རིང་ལུགས་སློབ་གླིང་གི“སྤུས་ལེགས་བསླབ་ཚན”། མཚོ་སྔོན་ཞིང་ཆེན་ཏང་གི་སློབ་གྲྭའི“ཕུལ་བྱུང་ཆེད་དོན་བརྗོད་གཞི”དང“ཕུལ་བྱུང་ཆེད་དོན་བརྗོད་གཞི་བཅུ”རུ་བདམས་པར་མ་ཟད། 2016ལོའི་མཚོ་སྔོན་ཞིང་ཆེན་ཏང་གི་སློབ་གྲྭའི་སློབ་ཁྲིད་མ་ལག་འགྲན་བསྡུར་གྱི་དགེ་རྒན་ཆེན་མོའི་རུ་ཁག་ཁྲོད་བྱ་དགའ་ཨང་དང་པོ་ཐོབ། 2018ལོར་ཞིང་ཆེན་ཡོངས་ཀྱི་སློབ་ཆེན་ཁག་གི་འགྲན་བསྡུར་ཁྲོད་དུ་སྤུས་ལེགས་སློབ་ཁྲིད་ཀྱི་མཚན་སྙན་ཐོབ། ད་ལྟའི་བར་དུ་རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་ལས་གཞི་གསུམ་དང་ཞིང་ཆེན་རིམ་པའི་ཞིབ་འཇུག་ལས་གཞི་བཞི་གཙོ་སྐྱོང་གནང་ཞིང་། རྒྱལ་ཁབ་ཕྱི་ནང་གི་དུས་དེབ་ཚད་ལྡན་ཁག་ཏུ་རྒྱ་བོད་ཡིག་རིགས་གཉིས་ཀྱི་ལམ་ནས་དཔྱད་རྩོམ20ལྷག་སྤེལ།