མངའ་རིས་ས་ཁུལ་གྱིས་སྐྱེ་ཁམས་འཚོ་སྡོད་ལ་འཚམ་པའི་མཛེས་སྡུག་ཁྱིམ་གཞིས་བསྐྲུན་པར་འབད་བརྩོན་བྱས།

       ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོ་འགའི་རིང་། བོད་ལྗོངས་མངའ་རིས་ས་ཁུལ་གྱིས་ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་ལག་བསྟར་དོན་འཁྱོལ་བྱས་ནས“རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི”འདུ་ཤེས་བརྟན་པོར་བཙུགས་ཤིང་། རྒྱལ་ཁབ་དང་བོད་རང་སྐྱོང་ལྗོངས་ཀྱི་སྐྱེ་ཁམས་དཔལ་ཡོན་འཛུགས་སྐྲུན་གྱི་དཔེ་སྟོན་ཁུལ་གཏོད་རྒྱུ་གཙོ་གནད་དུ་བཟུང་སྟེ། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་ནུས་ཤུགས་ཡོད་རྒུས་སྲ་བརྟན་དུ་བཏང་ནས་སྐྱེ་ཁམས་འཚོ་སྡོད་ལ་འཚམ་པ་དང་མཛེས་སྡུག་ལྡན་པའི་མངའ་རིས་འཛུགས་སྐྲུན་བྱས་པར་གྲུབ་འབྲས་མངོན་གསལ་དོད་པོ་ཐོབ་ཡོད།
     2018ལོ་ནས2020ལོའི་བར་བོད་རང་སྐྱོང་ལྗོངས་ཀྱི་སྐྱེ་ཁམས་ཁོར་ཡུག་སྲུང་སྐྱོང་གི་དཔྱད་ཞིབ་བྱེད་པའི་བརྒྱུད་རིམ་ཁྲོད་མངའ་རིས་ས་ཁུལ་ལ་བསྟུད་མར་ལོ་གསུམ་རིང་ཕུལ་བྱུང་ཐོབ་པ་དང་། “གཙང་པོ་གཉིས་དང་ཆུ་བོ་བཞིའི”རྒྱུག་ཁུལ་གྱི་ནགས་སྐྲུན་ལྗང་སྒྱུར་ལས་གཞི་དང་ས་བབ་སྨི4300མན་གྱི“ལྗོན་ཤིང་མེད་པའི་གྲོང་ཚོ་དང་ལྗོན་ཤིང་མེད་པའི་དུད་ཚང”མེད་པར་བཟོ་བའི་ལས་དོན་སྤེལ་ཏེ། “ལྟེ་བ་གཅིག་དང་ཁུལ་གཉིས། རྒྱུད་བཞི། ས་ཚིགས་མང་བ”བཅས་ཀྱི་སྐྱེ་ཁམས་བདེ་འཇགས་རྣམ་པ་བཙུགས་ཡོད་པས། རྒྱལ་ཁབ་ཀྱི་རིམ་པ་དང་པོའི་རི་སྐྱེས་སྲོག་ཆགས་གཙོད་དང་ནོར་ནག་སོགས་ཀྱི་གྲངས་འབོར་མངོན་གསལ་དོད་པོས་ཇེ་མང་དུ་ཕྱིན་ཡོད།       སྐྱེ་ཁམས་ཁོར་ཡུག་ཇེ་ལེགས་སུ་ཕྱིན་པར་བརྟེན་ནས2019ལོར་མངའ་རིས་ས་ཁུལ་གྱིས་རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ས་ཁུལ་སྐྲུན་པའི་སྤྱིའི་དམིགས་ཚད་བཏོན་པ་དང་། ས་ཁུལ་ཏང་ཨུ་དང་སྲིད་འཛིན་ཀུང་ཧྲུའུ་ཡིས་སྣེ་ཁྲིད་དེ་ས་ཁུལ་ཐད་གཏོགས་འབྲེལ་ཡོད་སྡེ་ཚན་དང་རྫོང7ཐུན་མོང་ངང་ཞུགས་པའི་གསར་སྐྲུན་མགོ་ཁྲིད་ཚན་ཆུང་བཙུགས་ཤིང་།《མངའ་རིས་ས་ཁུལ་རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ས་ཁུལ་བསྐྲུན་པའི་འཆར་འགོད》བཟོས་ཏེ། མངའ་རིས་འཛུགས་སྐྲུན་དེ་དཔལ་འབྱོར་དར་རྒྱས་དང་། གྲོང་ཁྱེར་དང་གྲོང་གསེབ་གཞི་གཅིག་ཅན། མཛེས་སྡུག་ལྡན་པའི་ཁོར་ཡུག སྐྱེ་ཁམས་དཔལ་ཡོན། སྤྱི་ཚོགས་འཆམ་མཐུན། མི་དམངས་བདེ་སྐྱིད་བཅས་ཀྱི་གངས་ལྗོངས་མུ་ཏིག་ལྟ་བུ་ཞིག་ཏུ་བསྐྲུན་པར་ཧུར་ཐག་བྱེད་བཞིན་ཡོད། 2020ལོའི་ཟླ10པར་རྒྱལ་ཁབ་སྐྱེ་ཁམས་ཁོར་ཡུག་པུའུ་ཡིས་མངའ་རིས་ས་ཁུལ་ལ“རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་གྱི་དཔེ་སྟོན་ས་ཁུལ་སྐོར་བཞི་བའི”མཚན་སྙན་སྤྲད་པ་དང་། དེས་མངའ་རིས་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དེ་རྒྱང་སྐྱོད་ཀྱི་ལམ་བུ་གསར་པར་བསྐྱོད་པ་མཚོན་ཡོད།       རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ས་ཁུལ་རྒྱལ་ཁའི་ངང་བསྐྲུན་པའི་རྨང་གཞིའི་སྟེང་། མངའ་རིས་ས་ཁུལ་གྱིས་བོད་རང་སྐྱོང་ལྗོངས་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ཁུལ་བསྐྲུན་པའི་ལས་དོན་ལ་སྐུལ་འདེད་ཧུར་ཐག་བཏང་ནས།《མངའ་རིས་ས་ཁུལ་གྱིས་རྒྱལ་ཁབ་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ས་ཁུལ་བསྐྲུན་པ་དང་། མཛེས་སྡུག་ལྡན་པའི་མངའ་རིས་འཛུགས་སྐྲུན་གྱི་གོམ་སྟབས་ཇེ་མགྱོགས་སུ་གཏོང་བའི་སྐོར་གྱི་ལག་བསྟར་ཇུས་གཞི》བཟོས་པ་དང་། ས་ཁུལ་གྱིས་སྤྱི་འདོམས་དང་། རྫོང་སོ་སོའི་འགན་ཁུར། གོང་འོག་མཐུན་སྦྱོར་གྱི་ལས་དོན་རྩ་དོན་སྤྱད་ནས། ས་ཁུལ་དང་རྫོང་། ཤང་གྲོང་། གྲོང་ཚོ（གྲོང་ལྷན）བཅས་རིམ་པ་བཞིའི་མཉམ་འབྲེལ་གསར་གཏོད་བྱས་ཏེ། ས་ཁོངས་ཧྲིལ་བོའི་སྐྱེ་ཁམས་དཔལ་ཡོན་འཛུགས་སྐྲུན་གཅིག་དྲིལ་ཅན་ལ་སྐུལ་འདེད་བཏང་བ་རེད།