༄༅།།མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱིས་རྫོང་ལྔའི་ཁྲོམ་རའི་ཡིག་བཀོལ་གནས་ཚུལ་ལ་ལྟ་སྐུལ་བྱས།

ནན་ཏན་སྒོས《མཚོ་ལྷོ་བོད་རིགས་རང་སྐྱོང་ཁུལ་རང་སྐྱོང་སྲོལ་ཡིག》དང《མཚོ་ལྷོ་བོད་རིགས་རང་སྐྱོང་ཁུལ་བོད་སྐད་ཡིག་བྱ་བའི་སྲོལ་ཡིག》ལག་བསྟར་དང་། དངོས་གནས་སྤྱི་ཚོགས་ཁྲོམ་རའི་ཡིག་བཀོལ་གྱི་ལྟ་སྐུལ་དོ་དམ་བྱ་བར་ཤུགས་སྣོན་ཆེད། སྤྱི་ཟླ8པའི་ཚེས25ཉིན་ནས་ཚེས27ཉིན་བར། མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱིས་མཚོ་ལྷོ་ཁུལ་ཁྲོམ་རའི་ལྟ་སྐུལ་དོ་དམ་ཅུའུ་དང་མཉམ་འབྲེལ་སྒོས་རྫོང་ལྔའི་ལས་གཉེར་སྒོ་བྱང་སོགས་ཀྱི་བོད་རྒྱ་སྐད་གཉིས་ཚད་ལྡན་དག་ཐེར་གནས་ཚུལ་ལ་ལྟ་སྐུལ་གནང་། ལྟ་སྐུལ་གནང་བར་བརྒྱུད། རྫོང་སོ་སོས་རང་རྟོགས་ཀྱིས་སྲང་ལམ་གྱི་སྒོ་བྱང་སོགས་ལ་བོད་ཡིག་མེད་པ་དང་ཡི་གེ་ཆད་ལྷག  ཡིག་ནོར་སོགས་ཀྱི་གནད་དོན་དག་ཐེར་བྱས། ལས་བྱེད་མི་སྣ་སྲང་ལམ་རེ་རེ་དང་ལས་གཉེར་ཁང་རེ་རེར་སྐྱོད་དེ་ཚོང་གཉེར་བ་རྣམས་ལ་གནད་དོན་བརྗོད་པ་དང་གང་དག་ནོར་བཅོས་བྱེད་དགོས་པ་གསལ་བོར་བསྟན། བོད་ཡིག་མི་ཤེས་པའི་ཚོང་གཉེར་བ་དག་ལ་ཡང་དག་པའི་སྒོ་བྱང་བྲིས་ཏེ་དུས་བཀག་ནང་བཅོས་སྒྱུར་བྱེད་དགོས་པར་རེ་བ་བཏོན། དུས་བཀག་ནང་བཅོས་སྒྱུར་བྱེད་དགོས་པའི་ཚོང་གཉེར་བ་རྣམས་ལ་ཡང་ཡང་ཕྱིར་བཅར་སྒོས། སྒོ་བྱང་གི་ཡི་གེ་ཡང་དག་ཡོང་བར་ཁག་ཐེག་བྱས། ཕྱོགས་སོ་སོའི་མཐུན་སྦྱོར་དང་མཉམ་འབྲེལ་འོག རྫོང་སོ་སོའི་སྤྱི་ཚོགས་ཁྲོམ་རའི་ཡིག་བཀོལ་དག་ཐེར་བྱ་བ་ལེགས་པོར་སྤེལ་ཞིང་། སྤྱི་བའི་ཞབས་ཞུ་ཁྱབ་ཁོངས་སུ་བོད་རྒྱ་ཡིག་གཉིས་བཀོལ་སྤྱོད་བྱེད་ཚད98%ཡན་ལ་སླེབས་ཡོད། དག་ཐེར་བྱས་པར་བརྒྱུད། བོད་རྒྱ་སྐད་གཉིས་བེད་སྤྱོད་ཚད་སྔར་ལས་ཚད་ལྡན་དུ་གྱུར་ལ། སྤྱི་ཚོགས་ཁྲོམ་རའི་ཡིག་བཀོལ་གྱི་སྒྲིག་སྲོལ་སྲུང་སྐྱོང་སྒོས། རྒྱལ་ཡོངས་དཔལ་ཡོན་གྲོང་ཁྱེར་འཛུགས་སྐྲུན་བྱ་བ་དང་ཁྱད་ལྡན་མཁར་གྲོང་འཛུགས་སྐྲུན། གྲོང་ཁྱེར་གྱི་སྣང་བརྙན་ལེགས་པོར་གཏོང་བར། འཆམ་མཐུན་དཔལ་ཡོན་གྱི་ཁྲོམ་རའི་ཡིག་བཀོལ་ཁོར་ཡུག་ལེགས་པོ་བསྐྲུན།