༄༅།།རྔ་བའི་ཏོག་གསར་གློ་ཚད་ཕོག་པའི་ནད་པ་གཅིག་པུ་དེ་དྲག་འདུག

གནས་ཚུལ་ལྟར་ན། ཟླ2པའི་ཚེས17ཉིན་གྱི་སྔ་དྲོར། རྔ་བ་ཁུལ་གྱི་ཏོག་གསར་གློ་ཚད་ཕོག་པའི་ནད་པ་གཅིག་པུ་དེ་དྲག་སྐྱེད་བྱུང་ནས་རྔ་བ་ཁུལ་མི་དམངས་སྨན་ཁང་ལས་ཕྱིར་བུད་འདུག 
རྔ་བ་ཁུལ་དུ་བྱུང་བའི་ནད་པ་གཅིག་པུ་ཀུའོ་ཆེ་གེ་མོ་ནི་ལོ་ན26ཅན་གྱི་ཧུའུ་པེ་ཞིང་ཆེན་ཨན་ལུའུ་གྲོང་ཁྱེར་གྱི་བུད་མེད་ཅིག་ཡིན་ཞིང་། ཁོང་མོར་ཟླ1པོའི་ཚེས28ཉིན་གྱི་ཕྱི་དྲོར་གློ་ལུ་བྱུང་རྐྱེན་འབར་ཁམས་གྲོང་ཁྱེར་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱི་ཞིབ་བཤེར་དང་ལེན་བྱས་པ་དང་། ཟླ1པོའི་ཚེས29ཉིན་གྱི་ཐོ་རེངས་ཆུ་ཚོད5:49ཐོག་རྔ་བ་ཁུལ་མི་དམངས་སྨན་ཁང་གིས་སྨན་ཁང་དུ་ཉར་ཞིང་ལོགས་སུ་བཀར་ནས་སྨན་བཅོས་བྱས། ཟླ1པོའི་ཚེས30ཉིན་གྱི་ཐོ་རེངས་སུ་ཏོག་གསར་གློ་ཚད་ཕོག་པའི་ནད་ངོ་བཟུང་། 
ཟླ2པའི་ཚེས14ཉིན་དང་ཚེས16ཉིན་རྔ་བ་ཁུལ་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་ཁོ་མོའི་ཉིང་སྐྱུར་ལ་ཞིབ་དཔྱད་ཚད་ལེན་ཐེངས་གཉིས་བྱས་པ་ཚང་མ་ནད་དྲག་པའི་རྟགས་མངོན་ཞིང་། ཁུལ་རིམ་པའི་རིགས་གཅིག་མཁས་ཅན་ཚོགས་ཆུང་གིས་ཞིབ་བཤེར་དང་དཔྱད་དཔོག་ཐེངས་མང་བྱས་པ་བརྒྱུད། ནད་པ་དེ《རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཏོག་གསར་གློ་ཚད་ཀྱི་ནད་བརྟག་སྨན་བཅོས་ཇུས་གཞི(ཚོད་ལྟའི་ལག་བསྟར་པར་གཞི་ལྔ་བ)》རུ་བཀོད་པའི་ལོགས་བཀར་མཚམས་འཇོག་དང་སྨན་ཁང་ལས་འབུད་པའི་ཚད་གཞི་དང་མཐུན་པ་ཐག་བཅད་རྗེས་སྨན་ཁང་ལས་བུད།
སྔ་དྲོའི་ཆུ་ཚོད11:36ཐོག ཁ་རས་བརྒྱབ་པའི་ཀུའོ་ཆེ་གེ་མོ་སྨན་དོན་མི་སྣའི་རོགས་རམ་འོག་ལོགས་བཀར་ནད་ཁུལ་ནས་ཐོན་ཞིང་། ལོགས་བཀར་ནད་ཁུལ་གྱི་སྨན་དོན་མི་སྣས་ཀུའོ་ཆེ་གེ་མོར་མེ་ཏོག་སོས་པ་དང་། ཁ་བཏགས་སོགས་ཕུལ་ནས་སྨན་ཁང་ནས་ཐོན་པར་རྟེན་འབྲེལ་ཞུས་པ་དང་འབྲེལ། ཁོ་མོར་མུ་མཐུད་ལོགས་བཀར་ལྟ་ཞིབ་ཉིན14བྱེད་རྒྱུའི་ཁ་ཏ་བྱས་འདུག ཀུའོ་ཆེ་གེ་མོས་སྨན་དོན་མི་སྣ་ཡོངས་ལ་སེམས་གཏིང་ནས་གུས་འདུད་ཞུས་པ་དང་འབྲེལ་དགོས་མཁོ་ཡོད་ཚེ་རང་ཉིད་ཀྱིས་ཁྲག་ཞལ་འདེབས་སུ་འབུལ་ཆོག་ཚུལ་ཡང་བརྗོད་འདུག