བོད་ལྗོངས་ཀྱི་གཟུགས་འདས་ཤུལ་བཞག་རིག་གནས་སྲུང་སྐྱོབ་བྱ་བར་སྒོར་དུང་ཕྱུར་ལྷག་བཏང་བ།

　　ཟླ5པའི་ཚེས26ཉིན། བོད་ལྗོངས་གཟུགས་འདས་ཤུལ་བཞག་རིག་གནས་སྲུང་སྐྱོབ་དང་རྒྱུན་འཛིན་བྱ་བའི་གསར་འགྱུར་ཁྱབ་སྒྲོག་ཚོགས་འདུ་སྟེང་ཁྱབ་སྒྲོག་བྱས་པ་ལྟར་ན། 2005ལོ་ནས་བཟུང་བོད་ལྗོངས་ཀྱི་གཟུགས་འདས་ཤུལ་བཞག་རིག་གནས་སྲུང་སྐྱོབ་ཁོར་ཡུག་ཇེ་ལེགས་སུ་སོང་བ་དང་། འགྲོ་གྲོན་བཏང་ཚད་མུ་མཐུད་དུ་ཇེ་མང་དུ་ཕྱིན། མིག་སྔའི་བར་དུ་ཀྲུང་དབྱང་ནོར་སྲིད་ཀྱིས་བོད་ལྗོངས་ཀྱི་གཟུགས་འདས་ཤུལ་བཞག་རིག་གནས་སྲུང་སྐྱོབ་ཐད་མ་དངུལ་སྒོར་ཁྲི9761བཏང་ལ། བོད་ལྗོངས་ཀྱི་རིམ་པ་སོ་སོའི་ནོར་སྲིད་ཀྱིས་བསྡེབས་ཀྱིས་མ་དངུལ་སྒོར་བྱེ་བ3ལ་ཉེ་བ་བཏང་བ་རེད།
　　2006ལོ་ནས་བཟུང་བོད་ལྗོངས་ཀྱིས་གཟུགས་འདས་ཤུལ་བཞག་རིག་གནས་ཀྱི་ཁྱབ་བཤེར་བྱ་བ་འགོ་བརྩམས་ནས་བོད་ལྗོངས་ཀྱི་རིགས་སོ་སོའི་གཟུགས་འདས་ཤུལ་བཞག་རིག་གནས་རྣམ་གྲངས1000ལྷག་གསལ་རྟོགས་ཐུབ་ཅིང་། གཟུགས་འདས་ཤུལ་བཞག་རིག་གནས་ཀྱི་རིགས་བཅུ་འདུས་པ་རེད།