བོད་ལྗོངས་ཀྱི་གཟུགས་འདས་རིག་གནས་ཤུལ་བཞག་རྒྱུན་འཛིན་པའི་པར་རིས་ཀུན་བཏུས་ཐོག་མ་བཀྲམ།

     གསར་འགོད་པས་བོད་ལྗོངས་མང་ཚོགས་སྒྱུ་རྩལ་ཁང་ནས་ཤེས་རྟོགས་བྱུང་བར། བོད་ལྗོངས་ཀྱི་གཟུགས་འདས་རིག་གནས་ཤུལ་བཞག་གི་རྒྱུན་འཛིན་པའི་པར་རིས་ཀུན་བཏུས་ཐོག་མ་དེ་དངོས་སུ་པར་སྐྲུན་འགྲེམས་སྤེལ་བྱས་ཤིང་། དཔེ་དེབ་དེའི་ནང་བོད་ལྗོངས་ཀྱི་ཚབ་མཚོན་རང་བཞིན་གྱི་རྒྱུན་འཛིན་པ350ཡི་གནས་ཚུལ་མདོར་བསྡུས་ངོ་སྤྲོད་བྱས་ནས་བོད་ལྗོངས་ཀྱི་གཟུགས་འདས་རིག་གནས་ཤུལ་བཞག་གི་ད་ལྟའི་གནས་བབ་ཤེས་རྟོགས་བྱ་རྒྱུར་ཁ་ཕྱོགས་བསྟན་ཡོད།
     ངོ་སྤྲོད་བྱས་པར་གཞིགས་ན། གཟུགས་འདས་རིག་གནས་ཤུལ་བཞག་རྒྱུན་འཛིན་པའི་པར་རིས་ཀུན་བཏུས་དཔེ་དེབ་དེར་ཡིག་འབྲུ་ཁྲི36ཡོད་པ་དང་། དེའི་ནང་ལྗོངས་ཡོངས་ཀྱི་རྒྱལ་ཁབ་རིམ་པ་དང་རང་སྐྱོང་ལྗོངས་རིམ་པའི་གཟུགས་འདས་རིག་གནས་ཤུལ་བཞག་གི་ཚབ་མཚོན་རང་བཞིན་གྱི་རྒྱུན་འཛིན་པ350ཡི་དཔྱད་གཞིའི་ཡིག་རིགས་བསྡུས་པའི་ནང་དམངས་ཁྲོད་རྩོམ་རིག་གི་ཚབ་མཚོན་རང་བཞིན་གྱི་རྒྱུན་འཛིན་པ19དང་། སྲོལ་རྒྱུན་རོལ་དབྱངས་རིགས་ཀྱི་རྒྱུན་འཛིན་པ17སྲོལ་རྒྱུན་ཞབས་བྲོའི་རིགས་ཀྱི་རྒྱུན་འཛིན་པ124སྲོལ་རྒྱུན་ཟློས་གར་རིགས་ཀྱི་རྒྱུན་འཛིན་པ23གཞས་མ་གཏམ་རིགས་ཀྱི་རྒྱུན་འཛིན་པ7སྲོལ་རྒྱུན་མཛེས་རྩལ་རིགས་ཀྱི་རྒྱུན་འཛིན་པ30སྲོལ་རྒྱུན་རྩལ་ནུས་རིགས་ཀྱི་རྒྱུན་འཛིན་པ75སྲོལ་རྒྱུན་གསོ་རིག་རིགས་ཀྱི་རྒྱུན་འཛིན་པ31དམངས་སྲོལ་རིགས་ཀྱི་རྒྱུན་འཛིན་པ24བཅས་ཚུད་ཡོད་པ་རེད།
     བོད་ལྗོངས་སུ་གཟུགས་འདས་རིག་གནས་ཤུལ་བཞག་གི་ཐོན་ཁུངས་ཕུན་སུམ་ཚོགས་པོ་ཡོད་པས། རྒྱལ་ཁབ་དང་། རང་སྐྱོང་ལྗོངས། གྲོང་ཁྱེར། རྫོང་བཅས་རིམ་པ་བཞིའི་གཟུགས་འདས་རིག་གནས་ཤུལ་བཞག་གི་མིང་གཞུང་མ་ལག་སྤྱིར་ན་གྲུབ་ཡོད། དེའི་ནང་རྣམ་གྲངས89དང་ཚབ་མཚོན་རང་བཞིན་གྱི་རྒྱུན་འཛིན་པ68དག་རྒྱལ་ཁབ་རིམ་པའི་མིང་གཞུང་ནང་བཅུག་པ་དང་། རྣམ་གྲངས323དང་ཚབ་མཚོན་རང་བཞིན་གྱི་རྒྱུན་འཛིན་པ350རང་སྐྱོང་ལྗོངས་རིམ་པའི་མིང་གཞུང་ནང་བཅུག་པ། རྫོང་རིམ་པ་ཡན་གྱི་གཟུགས་འདས་རིག་གནས་ཤུལ་བཞག་གི་རྣམ་གྲངས1107ཟིན་པ་བཅས་རེད།