བོད་ལྗོངས་ཀྱིས་མཚོ་སྔོན་སོགས་ཞིང་ཆེན་གྱི་ལྗོངས་རྒྱུའི་ས་ཁོངས་བར་ལ་མཉམ་ལས་བྱེད་རྒྱུ་ཡིན་པ།

           གསར་འགོད་པས་བོད་རང་སྐྱོང་ལྗོངས་ཡུལ་སྐོར་ཅུས་ནས་ཤེས་གསལ་ལྟར་ན། ལོ་ལྔ་ཚན་བཅུ་གཉིས་པའི་སྐབས་སུ་བོད་ལྗོངས་ཀྱིས་སེམས་ཀྱི་ཉི་ཟླའི་རིག་གནས་ལྗོངས་རྒྱུ་ཁུལ་དང་། ཇ་རྟའི་གནའ་ལམ། ཐང་བོད་གནའ་ལམ་བཅས་ཚུད་པའི་ས་ཁོངས་གཙོ་བྱས་ཏེ། སི་ཁྲོན་དང་། ཡུན་ནན། མཚོ་སྔོན། ཤིན་ཅང་། ཧྲན་ཞི་སོགས་ཞིང་ཆེན་ལ་མཉམ་ལས་བྱེད་པར་ཤུགས་སྣོན་རྒྱུ་རེད།
            བོད་རང་སྐྱོང་ལྗོངས་ཡུལ་སྐོར་ཅུས་ཀྱིས་ངོ་སྤྲོད་ལྟར་ན། ཕྱིས་འབྱུང་གི་ལོ་ལྔའི་ནང་དུ། བོད་ལྗོངས་ཀྱིས་སྲིད་འཛིན་གྱི་འགག་འཕྲང་གཏོར་ནས་ནང་འབྲེལ་ཕྱི་བསྐྱེད་དང་། སྒོ་ཀུན་ནས་ཕྱི་ཕྱོགས་སུ་གློད་པའི་རྒྱུན་བསྐྱངས་ཁར། སེམས་ཀྱི་ཉི་ཟླའི་རིག་གནས་ལྗོངས་རྒྱུ་ཁུལ་དང་། ཇ་རྟའི་གནའ་ལམ། ཐང་བོད་གནའ་ལམ་བཅས་འབྲེལ་བའི་ས་ཁོངས་གཙོ་བྱས་ནས་སི་ཁྲོན་དང་། ཡུན་ནན། མཚོ་སྔོན། ཤིན་ཅང་། ཧྲན་ཞི་སོགས་ཞིང་ཆེན་བར་མཉམ་ལས་ཀྱི་འབྲེལ་བ་འཛུགས་རྒྱུ་དང་། མཉམ་གཅིག་ཏུ་མངའ་ཁོངས་དེ་དག་གི་ཐོན་རྫས་ཕྱོགས་གཅིག་ཏུ་བསྡུས་ནས་ཐོན་ཁོངས་མཉམ་སྤྱོད་དང་། དགེ་མཚན་ཕན་ཚུན་ཁ་གསབ་བྱེད་ཐུབ་པ་མངོན་འགྱུར་བྱེད་རྒྱུ་ཡིན་ལ། དུས་མཚུངས་སུ་བལ་བོ་བར་གྱི་མཉམ་ལས་ལ་ཡང་ཤུགས་སྣོན་བརྒྱབ་ཏེ། ཧི་མ་ལ་ཡའི་རིག་གནས་གཞིར་བཟུང་། ཀྲུང་བལ་ས་མཚམས་བརྒལ་བའི་ལྗོངས་རྒྱུ་ལ་སོགས་པའི་བྱེད་ཐབས་ལེགས་པོ་ཞིག་གཏན་འབེབས་བྱས་ནས་མངའ་ཁོངས་སྤྱིའི་འགྲན་རྩོད་སྟོབས་ཤུགས་ཇེ་ཆེར་གཏོང་རྒྱུ་རེད།