བོད་རིགས་ལུས་རྩལ་བ་ཆོས་དབྱིངས་སྐྱིད་ལུན་ཏུན་ཨོ་རྩལ་འགྲན་ཚོགས་ཁྲོད་བདམས་པ།

ཆོས་དབྱིངས་སྐྱིད་རྒྱལ་ཁའི་ངང་ཕྱིར་ཕ་ཡུལ་དུ་ལོག་པས་ཀུན་གྱི་དགའ་བསུ་ཐོབ་པ།

　　རྒྱུས་ལོན་བྱུང་བ་ལྟར་ན་ཅང་སོའི་ཐཱད་ཚང་ནས་བསྡུས་པའི2012ལོའི་རྒྱལ་སྤྱིའི་འགྲོ་རྩལ་འགྲན་སྡུར་རམ་ལུན་ཏུན་ཨོ་རྩལ་འགྲན་ཚོགས་ཀྱི་སྤྱི་ལེ20ཡི་སྐྱེས་མའི་འགྲོ་རྩལ་ལེགས་འདེམ་འགྲན་སྡུར་ཁྲོད། བོད་རིགས་ལུས་རྩལ་པ་ཆོས་དབྱིངས་སྐྱིད་ཀྱིས་ཟངས་ཀྱི་རྟགས་མ་བླངས་པས་ལུན་ཏུན་ཨོ་རྩལ་འགྲན་ཚོགས་སྟེང་ཞུགས་པའི་ཐོབ་ཐང་ཐོབ་ཅིང་། ཁོ་མོ་ནི་ཀྲུང་གོའི་ལོ་རྒྱུས་སྟེང་ཨོ་རྩལ་འགྲན་ཚོགས་ལ་ཞུགས་པའི་བོད་རིགས་ལུས་རྩལ་བ་ཐོག་མ་ཡིན་ངེས་རེད།
　　ཀྲུང་གོའི་མཆོང་རྒྱུག་མཐུན་ཚོགས་ཀྱི་ལེགས་འདེམ་བྱེད་ཐབས་ལྟར་ན་ཐེངས་འདིའི་འགྲན་སྡུར་ཁྲོད་སྔོན་གྲས་སུ་ཡོད་པའི་མི་བཞི་ཕལ་ཆེར་ལུན་ཏུན་ཨོ་རྩལ་འགྲན་ཚོགས་སྟེང་ཞུགས་རྒྱུ་ཡིན་ཞིང་། སྔོན་གྲས་ཀྱི་མི་གསུམ་ནི་འགྲན་ཚོགས་ཁྲོད་དངོས་སུ་ཞུགས་རྒྱུ་ཡིན་པ་དང་། ཨང་བཞི་བ་ནི་རྗེས་སྣོན་ལུས་རྩལ་བ་ཡིན་པ་རེད།
　　ད་ལོར་ལོ22ལ་སོན་པའི་ཆོས་དབྱིངས་སྐྱིད་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདའ་གཞི་རྫོང་ཝ་འཇོག་ཡུལ་ཚོའི་འབྲོག་སྡེ་ནས་ཡོང་བའི་ཕུལ་དུ་བྱུང་བའི་བོད་རིགས་ཀྱི་འགྲོ་རྩལ་འགྲན་ཞུགས་པ་ཞིག་ཡིན། 2010ལོའི་ཟླ7པར་ཁོ་མོ་རྒྱལ་ཁབ་རུ་ཁག་ཏུ་ཞུགས་ཤིང་། 2010ལོའི་ཟླ9བར་རྒྱལ་ཁབ་ལུས་རྩལ་ཅུའུ་དང་། ཀྲུང་གོའི་མཆོང་རྒྱུག་མཐུན་ཚོགས། རྒྱལ་སྤྱིའི་མཆོང་རྒྱུག་མཉམ་འབྲེལ་ཚོགས་པ་བཅས་ཀྱིས་པེ་ཅིན་དུ་བསྡུས་པའི་རྒྱལ་སྤྱིའི་འགྲོ་རྩལ་འགྲན་ཚོགས་སམ་རྒྱལ་ཡོངས་འགྲོ་རྩལ་འགྲན་ཚོགས་ཀྱི་སྤྱི་ལེ20ཡི་སྐྱེས་མའི་འགྲོ་རྩལ་འགྲན་སྡུར་ཁྲོད་རྒྱལ་ནང་གི་ཨང་དང་པོ་བླངས་པ་དང་། 2011ལོར་རྒྱལ་སྤྱིའི་མཆོང་རྒྱུག་འགྲན་སློང་འགྲན་སྡུར་རམ་རྒྱལ་ཡོངས་འགྲོ་རྩལ་རྟིང་རྩོད་འགྲན་སྡུར་ཁྲོད་ཨང་གཉིས་པ་བླངས། 2011ལོར་སྐབས་བཅུ་གསུམ་པའི་འཛམ་གླིང་མཆོང་རྒྱུག་ལེགས་ཐོན་འགྲན་སྡུར་གྱི་སྤྱི་ལེ20ཡི་སྐྱེས་མའི་འགྲོ་རྩལ་འགྲན་སྡུར་ཁྲོད་ཨང་ལྔ་བ་བླངས་པ་སོགས་ཚར་དུ་དངར་བའི་གྲུབ་འབྲས་མི་དམན་པ་བླངས་པ་རེད།