མཐོ་རྒྱུགས་སྐབས་སུ་དྲོད་གྲང་ཚད་ལྡན་ཡིན། ས་ཁུལ་མང་ཆེ་བར་ཁ་ཐོར་རང་བཞིན་གྱི་ཆར་འབབ་ངེས།

         ལོ་རེར་ཐེངས་གཅིག་ལེན་བཞིན་པའི་མཐོ་རྒྱུགས་དེ་དངོས་སུ་འགོ་བརྩམས་ཤིང་། སློབ་གྲོགས་ཚོས་མཐོ་རྒྱུགས་སྐབས་སུ་གནམ་གཤིས་ཀྱིས་འགྱུར་ལྡོག་དང་བསྟུན་ནས་རྒྱུགས་ལེགས་པོ་སྤྲོད་ཆེད། མཚོ་སྔོན་གནམ་གཤིས་བརྟག་དཔྱད་ཅུའུ་ཡིས་དེ་རིང་སྔ་དྲོ་ནས་བཟུང་མཐོ་རྒྱུགས་སྐབས་ཀྱི་གནམ་གཤིས་སྔོན་བརྡའི་ཆེད་བསྒྲིགས་ཞབས་ཞུ་མགོ་ཚུགས་པ་རེད།
         རྒྱུས་ལོན་པ་ལྟར་ན། ད་ལོའི་མཐོ་རྒྱུགས་སྐབས་ཏེ། ཟླ6པའི་ཚེས7ཉིན་ནས་ཟླ6པའི་ཚེས9ཉིན་བར་རང་ཞིང་གི་ས་ཁུལ་མང་ཆེ་བར་ཆར་འབབ་རྒྱུ་རེད། ཤར་ཕྱོགས་ས་ཁུལ་ལ་ཕྱི་དྲོའི་དུས་སུ་ཆར་སམ་སིམ་ནས་ཆར་ཤ་ཡོང་པའི་གནམ་གཤིས་ཡོད་པ་དང་། ཚེས8ཉིན་ལྷོ་ཕྱོགས་ས་ཁུལ་ལ་ཆར་འབབ་རྒྱུ་རེད། དེའི་ནང་རྨ་ལྷོ་དང་མགོ་ལོག་གི་ས་ཁུལ་ཁ་ཤས་ལ་ཆར་འབྲིང་ཙམ་འབབ་རྒྱུ་རེད། དྲོད་ཚད་ལོ་སྔོན་མ་དག་གི་མཐོ་རྒྱུགས་སྐབས་ཀྱི་ཆ་སྙོམས་ཀྱི་དྲོད་ཚད་དང་ཕལ་ཆེར་གཅིག་འདྲ་རེད། དེ་བས་སློབ་གྲོགས་ཚོས་ཤར་གདུགས་དང་ཆར་ལྭ་འཛིན་རྒྱུ་མ་ཟད།འགྲིམ་འགྲུལ་བདེ་འཇགས་ལ་ཉམས་འཇོག་བྱེད་དགོས།
མཐོ་རྒྱུགས་སྐབས་ཀྱི་གནམ་གཤིས། (ཟླ6པའི་ཚེས7ནས་ཚེས9ཉིན )
         ཟླ6པའི་ཚེས7ཉིན། ཡུལ་ཤུལ་ལ་ཆར་སམ་སིམ་འབབ་པ་དང་ཞིང་ཆེན་ནང་ཁུལ་གྱི་ས་ཁུལ་གཞན་དག་ལ་གནམ་ཐང་བའམ་ཡང་ན་སྤྲིན་མང་རྒྱུ་རེད།
         ཟླ6པའི་ཚེས8ཉིན། མགོ་ལོག་དང་ཡུལ་ཤུལ། མཚོ་ལྷོའི་ལྷོ་ཕྱོགས། རྨ་ལྷོ། ཟི་ལིང་། མཚོ་ཤར། མཚོ་བྱང་ཤར་ཕྱོགས་བཅས་ལ་ཆར་སམ་སིམ་འབབ་པའམ་ཡང་ན་ཆར་ཤ་ཡོང་རྒྱུ་རེད། དེའི་ནང་རྨ་ལྷོའི་ལྷོ་ཕྱོགས་དང་མགོ་ལོག་ཤར་ཕྱོགས་ལ་ཆར་འབྲིང་ཙམ་འབབ་རྒྱུ་རེད། ཞིང་ཆེན་ནང་ཁུལ་གྱི་ས་ཁུལ་གཞན་དག་ལ་གནམ་ཐང་བའམ་ཡང་ན་སྤྲིན་མང་རྒྱུ་རེད།
         ཟླ6པའི་ཚེས9ཉིན། ཡུལ་ཤུལ་ལ་ཆར་སམ་སིམ་འབབ་པ་དང་ཞིང་ཆེན་ནང་ཁུལ་གྱི་ས་ཁུལ་གཞན་དག་ལ་གནམ་ཐང་རྒྱུ་རེད།