མཚོ་སྔོན་བོད་ཡིག་ཁ་པར་གསར་འགྱུར་ཟླ3པའི་ཚེས28ཉིན་སྤེལ་རྒྱུ་རེད།

        མཚོ་སྔོན་ཞིང་ཆེན་བོད་རིགས་མི་དམངས་ཀྱི་བསམ་པའི་རིག་གནས་འཚོ་བ་སྔར་ལས་ཕུན་ཚོགས་དང་། རྒྱ་ཆེའི་བོད་རིགས་མང་ཚོགས་ལ་དུས་ཐོག་དང་སྟབས་བདེའི་ཆ་འཕྲིན་ཞབས་ཞུ་སྒྲུབ་པ་དང་། ཏང་དང་རྒྱལ་ཁབ་ཀྱི་སྲིད་ཇུས་ལ་རྒྱུས་ལོན་བྱེད་པའི་ཐབས་ལམ་རྒྱ་བསྐྱེད་དུ་གཏོང་ཆེད། མཚོ་སྔོན་ཞིང་ཨུའི་དགོངས་ཚུལ་ལྟར། ཞིང་ཨུའི་དྲིལ་སྒྲོག་པུའུ་དང་འབྲེལ་ཡོད་སྡེ་ཁག་གི་འབད་བརྩོན་འོག  མཚོ་སྔོན་ཞིང་ཆེན་རྒྱལ་སྤྱིའི་མཐུན་སྦྲེལ་དྲ་རྒྱའི་གསར་འགྱུར་ལྟེ་གནས་ཀྱིས་གཙོ་སྒྲུབ་གནང་བའི་མཚོ་སྔོན་གྱི་བོད་ཡིག་ཁ་པར་གསར་འགྱུར་ཞེས་པ་ཟླ3པའི་ཚེས28ཉིན་ཚོད་ལྟའི་རང་བཞིན་གྱིས་སྤེལ་འཆར་ཡོད་པ་རེད།
        མཚོ་སྔོན་གྱི་བོད་ཡིག་ཁ་པར་གསར་འགྱུར་སྤེལ་བ་ནི་མཚོ་སྔོན་ཞིང་ཆེན་གྱིས་ཚགས་པར་དང་བརྙན་འཕྲིན། རྒྱང་སྒྲོག  དྲ་རྒྱ་སོགས་སྨྱན་བྱད་ཀྱི་རྗེས་སུ་སྤེལ་བའི་ཁྱབ་སྒྲོག་སྨྱན་བྱད་གསར་བ་ཞིག་ཡིན་ཞིང་། མཚོ་སྔོན་ཞིང་ཆེན་བོད་རིགས་མང་ཚོགས་ཀྱིས་ཡར་བསྐྱེད་ཀྱི་ཆ་འཕྲིན་ཀློག་པའི་ཐབས་ལམ་གལ་ཆེན་ཞིག་ཏུ་འགྱུར་ངེས་པ་རེད།