དགེ་འདུན་ཆོས་འཕེལ་རྗེས་དྲན་ཁང་ད་ལོའི་ཟླ7པར་འགྲུབ་ངེས་པ།

མཁས་དབང་དགེ་འདུན་ཆོས་འཕེལ།

        མཁས་དབང་དགེ་འདུན་ཆོས་འཕེལ་གྱིས་བོད་ཀྱི་རིག་གནས་འཕེལ་རྒྱས་དང་བོད་ཀྱི་སྤྱི་ཚོགས་འཕེལ་རྒྱས་ཐད་མཛད་རྗེས་ཆེན་པོ་བཞག་ཡོད། རྒྱུས་ལོན་པ་ལྟར་ན། མཁས་དབང་དགེ་འདུན་ཆོས་འཕེལ་སྐུ་གཤེགས་ཡུལ་དེ་སྲུང་སྐྱོབ་བྱེད་ཆེད། ལྷ་ས་གྲོང་ཁྱེར་མཁར་རྙིང་ཁུལ་སྲུང་སྐྱོབ་ལས་གཞི་ཁྲོད་མཁས་དབང་དགེ་འདུན་ཆོས་འཕེལ་སྐུ་གཤེགས་ཡུལ་ཞིག་གསོ་བྱ་རྒྱུ་ཡིན་པ་དང་དེ་ཉིད་དགེ་འདུན་ཆོས་འཕེལ་རྗེས་དྲན་ཁང་དུ་བསྐྲུན་འཆར་ཡོད་པ་རེད།
        མཁས་དབང་ཁོང་ཉིད་ལོ་ན་གཞོན་དུས་བློ་རིག་ཤིན་ཏུ་བཀྲ་ཞིང་ས་ཆ་མང་པོར་སློབ་གཉེར་བྱས་མྱོང་། 1945ལོར། ཁོང་རྒྱ་གར་ནས་བོད་ལྗོངས་སུ་སླེབས་རྗེས《དེབ་ཐར་དཀར་པོ》བརྩམས་ཤིང་། 1946ལོའི་ཟླ4བའི་ནང་བཀའ་ཤག་དང་དབྱིན་ཇི་བའི་མ་ཉེས་ཁ་གཡོག་གི་དབང་གིས་བཙོན་དུ་བཟུང་སྟེ་ལོ་གསུམ་ཙམ་ལ་སྡོད་དགོས་བྱུང་། དེའི་རིང་ལ་ལུས་སེམས་གཉིས་ཀྱི་ཐད་ནས་མནར་གཅོད་མྱངས། 1950ལོར་བཙོན་གྲོལ་བྱུང་མོད་ཐུགས་རབ་ཏུ་སྐྱོ་སྟེ་ཆང་རག་སོགས་ཚད་མེད་དུ་བཏུང་ཞིང་། མཐར1951ལོར་ཚེ་ལས་འདས། དེར་བརྟེན། མཁས་དབང་ཁོང་སྐུ་གཤེགས་ཡུལ་ལ་རྗེས་དྲན་ཞུ་བར་གནས་དེར་དགེ་འདུན་ཆོས་འཕེལ་རྗེས་དྲན་ཁང་སྐྲུན་རྒྱུ་ཡིན་པ་རེད།
        ཁོང་ཉིད་སྐུ་གཤེགས་ཡུལ་འདི་སྔ་གཞུག་ཏུ་ཐེངས་གཉིས་ལ་ཞིག་གསོ་གནང་མྱོང་ནའང་། རྨང་གཞིའི་སྒྲིག་ཆས་རྗེས་ལུས་སུ་སྣང་བས་བདེ་འཇགས་ཀྱི་ཉེན་ཁ་ཆེ་བ་དང་འཛུགས་སྐྲུན་གྱི་ཆ་རྐྱེན་དང་མི་འཚམ་པ་རེད། རྗེས་དྲན་ཁང་འདིའི་འཛུགས་སྐྲུན་རྒྱ་ཁྱོན་ལ་སྨི་གྲུ་བཞི་མ1269.03དང་། ཐོག་བརྩེགས་གསུམ་ཡོད་ཅིང་། འཛུགས་སྐྲུན་གྱི་བཟོ་བཀོད་ནི་བོད་མི་རིགས་ཀྱི་ཁྱད་ཆོས་དང་གནའི་བཟོ་བཀོད་མཐུན་སྦྱོར་བྱས་ཡོད་པ་དང་། ལས་གཞི་འདི་ད་ལོའི་ཟླ5བར་འཛུགས་སྐྲུན་འགོ་བརྩམས་པ་དང་ཟླ7པར་ལེགས་འགྲུབ་འབྱུང་ངེས་པ་རེད།