བྲག་དཀར་རྫོང་ཆ་ཚང་མི་རིགས་སློབ་འབྲིང་དང་གཅན་ཚ་རྫོང་མི་རིགས་སློབ་འབྲིང་གཉིས་པས་མཉམ་དུ་བསྒྲུབ་པའི་ལས་རྐང་གསོ་སྦྱོང་གི་བྱེད་སྒོ།

        ཀྲུང་གོ་གུང་ཁྲན་ཏང་བཙུགས་ནས་ལོ་འཁོར་བརྒྱ་ལོན་པར་དགའ་བསུ་ཞུ་བ་དང་སྦྲགས་རྣམ་པ་ཀུན་ཏུ་ཐོག་མའི་སློབ་གསོའི་སེམས་འདུན་མི་བརྗེད་པར། མི་གཞི་གསོ་སྐྱོང་གི་འགན་འཁྲི་ཡིད་ལ་བརྟན་པོར་འཆང་བའི་སློབ་གསོའི་གྲུབ་འབྲས་སྲ་བརྟན་ཡོང་བ། སྒོས་སུ་རང་སློབ་གྲྭའི་སྐད་ཡིག་སློབ་ཁྲིད་ཀྱི་སྤུས་ཚད་མཐོ་རུ་འདེགས་ཆེད། སྤྱི་ཟླ་༡༠པའི་ཚེས་༡༣ནས་༡༥བར་རྫོང་སློབ་གསོ་ཅུའི་ཡང་དག་པའི་མགོ་ཁྲིད་འོག་རང་སློབ་གྲྭའི་ཏང་ཀྲིའུ་པུའུ་ཡིས་རྩ་འཛུགས་བྱས་ཏེ་གཅན་ཚ་རྫོང་མི་རིགས་སློབ་འབྲིང་གཉིས་པར་བསྐྱོད་ནས་སློབ་སྒྲུབ་ཀྱི་བསམ་བློ་དང་སློབ་ཁྲིད་ཀྱི་ཉམས་མྱོང་བརྗེ་རེས། སློབ་ཁྲིད་ཀྱི་ཐོན་ཁུངས་མཉམ་སྤྱོད་བཅས་བརྗོད་དོན་ཡིན་པའི་ལས་རྐང་གསོ་སྦྱོང་གི་བྱེད་སྒོ་ཞིག་སྤེལ།         ཟླ་༡༠པའི་ཚེས་༡༣ཉིན་ང་ཚོ་བྲག་དཀར་རྫོང་ནས་ལམ་ལ་ཆས་ཏེ་གཅན་ཚ་མདའ་མོ་གཡང་རྫོང་དུ་འབྱོར། ཚེས་༡༤ཉིན་གཅན་ཚ་རྫོང་མི་རིགས་སློབ་འབྲིང་གཉིས་པར་བྱེད་སྒོ་དངོས་སུ་མགོ་བརྩམས། སྔ་དྲོའི་ཐུན་དང་པོར་རྐང་འཛིན་དགེ་རྒན་མཁའ་འགྲོ་ཚེ་རིང་གིས་རྒྱ་མཚོ་ནི་མ་འོངས་པའི་འབྲུ་མཛོད་ཡིན་ཞེས་པ་དང་། ཐུན་གཉིས་པར་རྐང་འཛིན་དགེ་རྒན་ཆོས་སྐྱོང་དཔལ་ལྡན་གྱིས་ཡ་རུ་ཞིག་ཅེས་པ་སློབ་ཁྲིད་གནང་རྗེས། ཐུན་གསུམ་པ་དང་བཞི་བར་ཁོང་རྣམ་པ་གཉིས་ཀྱིས་ཁྲིད་བཤད་དང་འབྲེལ་ནས་སློབ་ཁྲིད་བྱེད་སྟངས་སྐོར་ནས་མཛུབ་སྟོན་གལ་ཆེན་གནང་།         ཕྱི་དྲོའི་ཐུན་དང་པོར་ངེད་སློབ་གྲྭའི་དགེ་རྒན་སྟོབས་ལྡན་ཚེ་རིང་གིས་ཡ་རུ་ཞིག་ཅེས་པའི་ཁྲིད་ཡིག་དང་། དགེ་རྒན་དཀོན་མཆོག་ཚེ་རིང་གིས་ཕྲད་འདུས་མ་ཞེས་པའི་ཁྲིད་ཡིག།དགེ་རྒན་རྟ་མགྲིན་རྒྱལ་གྱིས་རྒྱ་མཚོ་ནི་མ་འོངས་པའི་འབྲུ་མཛོད་ཡིན་ཞེས་པའི་ཁྲིད་ཡིག་བཅས་མཚམས་སྦྱོར་བྱས། ཐུན་གཉིས་པ་ནས་ཆུ་ཚོད་གཉིས་ཀྱི་ཡུན་ལ་གཙན་ཚ་རྫོང་མི་རིགས་སློབ་འབྲིང་གཉིས་པའི་སློབ་ཁྲིད་ཞིབ་འཇུག་པ་དོ་རྒྱ་ཚེ་རིང་བཀྲ་ཤིས་ལགས་ཀྱིས་དགེ་རྒན་རྣམ་པ་གསུམ་གྱི་ཁྲིད་ཡིག་ལ་དཔྱད་འཇོག་གནང་རྗེས་ཁ་བྱང་ལ་སློབ་ཁྲིད་གྲ་སྒྲིག་གི་ཆིངས་བཞི་དང་གཟེར་བརྒྱད་ཅེས་པ་འཆད་ཁྲིད་གནང་། དེ་ནས་སློབ་རའི་རིག་གནས་འཛུགས་སྐྲུན་ལ་ལྟ་སྐོར་བྱས་པས།ང་ཚོ་ལ་སྔར་ལས་ལྷག་པའི་ཚོར་སྣང་ཟབ་མོ་ཞིག་སྐྱེས་བྱུང་།         ཟླ་༡༠པའི་ཚེས་༡༥ཉིན་གྱི་སྔ་དྲོར། གཅན་ཚ་རྫོང་སློབ་ཁྲིད་ཞིབ་འཇུག་ཁང་གི་མགོ་གཙོ་དོ་རྒྱ་བསོད་ནམས་ཚེ་རིང་གིས་ཁ་བྱང་ལ་མིང་བརྡའི་གཟུགས་འགྱུར་ཚུལ་བསྟན་པ་ཞེས་པ་འཆད་ཁྲིད་གནང་རྗེས་ཐེངས་འདིའི་བྱེད་སྒོ་ལ་དཔྱད་འཇོག་དང་སྤྱི་སྡོམ་མཛད་དེ་རེ་ཞིག་རྫོགས་པར་བྱས། ཉིན་གུང་ང་ཚོ་གཅན་ཚ་མདའ་མོ་གཡང་རྫོང་ནས་ལམ་ལ་ཆས་ཏེ་དགོང་མོར་བྲག་དཀར་རྫོང་དུ་འབྱོར།         ཐེངས་འདིར་ཕྱི་ཡི་ཁོར་ཡུག་གི་བཀོད་པ་ལེགས་ཤིང་། ནང་དུ་སློབ་གསོ་ཡི་བཅུད་ཀྱིས་གཏམས་པའི་གཅན་ཚ་རྫོང་མི་རིགས་སློབ་འབྲིང་གཉིས་པར་ལས་རྐང་གསོ་སྦྱོང་དུ་སོང་བ་བརྒྱུད་ངེད་སློབ་གྲྭའི་སྐད་ཡིག་དགེ་རྒན་རྣམས་ལ་སྔར་མེད་ཀྱི་ཤེས་རིག་གི་རྒྱགས་ཕྱེ་མང་དུ་བསྩལ་བ་དང་མ་འོངས་པའི་སློབ་སྒྲུབ་ཀྱི་ཁ་ཕྱོགས་ཐད་ལ་ལམ་སྟོན་གྱི་འོད་སྣང་གསར་བ་འཕྲོས། དེ་བས། ཐེངས་འདིའི་གསོ་སྦྱོང་ནི་དོན་སྙིང་ལྡན་ལ་གྲུབ་འབྲས་ཀྱིས་ཕྱུག་པ་ཞིག་ཡིན་པས།ཟླ་༡༠པའི་ཚེས་༡༧ཉིན་གྱི་ཕྱི་དྲོའི་ཐུན་གསུམ་པར། ངེད་སློབ་གྲྭའི་བསླབ་ཁག་སོ་སོའི་དགེ་རྒན་ཡོངས་དངོས་བཤེར་ཐོག་ཁང་གི་ཚོགས་འདུ་ཁང་དུ་འཛོམས་ཏེ་སྐད་ཡིག་ཚན་ཁག་ལས་རྐང་གསོ་སྦྱོང་ལ་ཞུགས་པའི་ཉམས་མྱོང་བརྗེ་རེས་ཀྱི་ཚོགས་འདུ་བསྡུས།         སློབ་སྟོན་ཀྲུའུ་རིན་གཞོན་པ་རྟ་མགྲིན་རྒྱལ་གྱིས་ཚོགས་འདུའི་མདོ་འཛིན་བྱས་ཏེ། ཐོག་མར་དགེ་རྒན་རྟ་མགྲིན་དབང་ཕྱུག་ནས་མགོ་བཟུང་སྟེ། རིམ་བཞིན་དགེ་རྒན་ཆོས་དབྱིངས་སྒྲོལ་མ། ཚེ་རིང་བཀྲ་ཤིས། རི་སྐྱིད་མཚོ། བསོད་ནམས་བཀྲ་ཤིས། ལྷ་མོ་གཡང་མཚོ། རྡོ་རྗེ་དོན་གྲུབ། དཔལ་བཟང་སྒྲོལ་མ་བཅས་ཀྱིས་ཐེངས་འདིའི་གསོ་སྦྱོང་ལ་ཞུགས་པའི་མྱོང་ཚོར་བཤད་པ་དང་སློབ་གཙོ་གཞོན་པ་བློ་བཟང་སྐྱིད་ཀྱིས་སྤྱི་སྡོམ་ལེགས་པར་མཛད་དེ་ཐེངས་འདིའི་བྱེད་སྒོ་ཡོངས་སུ་མཇུག་རྫོགས།