བོད་ལྗོངས་མི་རིགས་སློབ་གླིང་དང་ཨ་རིའི་ནཱ་སཱ་ལི་སློབ་ཆེན་བར་མཉམ་ལས་འབྲེལ་བ་བཙུགས་པ།

སློབ་གཙོ་ལི་ཧོང་ཧྲུན་དང་སློབ་གཙོ་གཞོན་པDr. Burton Webbགཉིས་
མཉམ་འབྲེལ་གྲོས་མཐུན་གྱི་མིང་རྟགས་འགོད་བཞིན་པ། 

           ཟླ3ཚེས31ཉིན།  བོད་ལྗོངས་མི་རིགས་སློབ་གླིང་དང་ཨ་རིའི་ནཱ་སཱ་ལི་སློབ་ཆེན་གཉིས་བར་དངོས་སུ་ཕན་ཚུན་མཉམ་འབྲེལ་བྱེད་པའི་འགོ་བརྩམས་ཤིང་།  བོད་ལྗོངས་མི་རིགས་སློབ་གླིང་གི་ཏིང་ཨུའི་ཧྲུའུ་ཅི་གཞོན་པ་དང་སློབ་གཙོ་ལི་ཧོང་ཧྲུན་གཉིས་ཀྱིས་སློབ་གླིང་གི་ཚབ་བྱས་ཏེ་ནཱ་སཱ་ལི་སློབ་གླིང་གི་སློབ་གཙོ་གཞོན་པDr. Burton Webbདང་ཕན་ཚུན་མཉམ་འབྲེལ་གྱི་མིང་རྟགས་བཀོད་པ་རེད།

སློབ་གྲྭ་གཉིས་ཀྱི་འབྲེལ་ཡོད་མི་སྣ་རྣམས་ལྷན་དུ་པར་བསྐྱོན་པ།

           མིང་རྟགས་འགོད་པའི་མཛད་སྒོ་སྟེང་།  ཨ་རིའི་ནུབ་བྱང་ནཱ་སཱ་ལི་སློབ་གླིང་གི་སློབ་གཙོ་གཞོན་པDr. Burton Webbཡིས“ང་རང་དགའ་འོས་པ་ཞིག་ནི་སློབ་གྲྭའི་དགེ་སློབ་བར་ཕན་ཚུན་བསམ་བློ་བརྗེ་རེས་དང་ཕན་ཚུན་ལ་སློབ་སྦྱོང་བྱེད་པ་སོགས་ཀྱི་ཕྱོགས་ནས་འབྲེལ་འདྲིས་ཀྱི་བྱ་འགུལ་སྤེལ་པའི་དུས་སྐབས་བཟང་བོར་བསྟུན་ཏེ་སློབ་མ་གང་མང་ཞིག་གིས་བོད་ལྗོངས་ལ་སྔར་ལས་ལྷག་པར་རྒྱུས་ལོན་ཟབ་མོ་བྱེད་ཐུབ་པ་དེ་ཡིན”ཟེར།

རྟེན་འབྲེལ་གྱི་ཁ་བཏགས་དཀར་པོའི་ལག་སྐྱེས་ཕུལ་པ།

           ཕན་ཚུན་ལ་ལེགས་སྐྱེས་འབུལ་བའི་དུས་སུ།  བོད་ལྗོངས་མི་རིགས་སློབ་གླིང་གི་ཏིང་ཨུའི་ཧྲུའུ་ཅི་འཕྲིན་ལས་དབང་རྒྱལ་གྱིསDr. Burton Webbལ་རྟེན་འབྲེལ་གྱི་ཁ་བཏགས་དཀར་པོ་ཕུལ་ཞིང་། སློབ་གཙོ་ལི་ཧོང་ཧྲུན་དང་སློབ་གཙོ་གཞོན་པDr. Burton Webbགཉིས་ཀྱིས་རང་སོ་སོའི་སློབ་གྲྭའི་གནས་བབ་དང་ཁྱད་ཆོས།  སློབ་སྒྲུབ་དམིགས་ཡུལ་སོགས་ངོ་སྤྲོད་རགས་བསྡུས་བྱས་པ་མ་ཟད།   Dr. Burton Webbཡིས་བོད་ལྗོངས་མི་རིགས་སློབ་གླིང་གི་འབྲེལ་ཡོད་འགན་ཁུར་བ་ནཱ་སཱ་ལི་སློབ་གླིང་ལ་ལྟ་ཞིབ་བྱེད་པར་གདན་དྲངས་པ་རེད།  
           ཕན་ཚུན་གྲོས་མཐུན་བྱུང་བ་ལྟར་ན།  བོད་ལྗོངས་མི་རིགས་སློབ་གླིང་དང་ནུབ་བྱང་ནཱ་སཱ་ལི་སློབ་གླིང་གཉིས་ཀྱིས་དགེ་སློབ་འབྲེལ་འདྲིས་སམ་ཕན་ཚུན་བར་དགེ་སློབ་མངགས་ཏེ་སློབ་སྦྱོང་དང་བྱ་ལས་སྒྲུབ་པ་དང་།  སློབ་མས་རང་སྟེང་ནས་འགྲོ་གྲོན་བཏང་སྟེ་ཅིག་ཤོས་ཕྱོགས་ཀྱི་སློབ་གྲྭར་སློབ་སྦྱོང་བྱེད་དུ་འགྲོ་བར་སྐུལ་བསྟོད་དང་།  མཉམ་འབྲེལ་སྒོས་རིག་གཞུང་ཞིབ་འཇུག་དང་རིག་གཞུང་མཉམ་འབྲེལ་གྱི་བྱ་འགུལ་སྤེལ་རྒྱུ་དང་།  པར་སྐྲུན་ཐོན་རྫས་དང་དཔེ་ཚོགས།  ཆ་འཕྲིན་ཡིག་ཚགས།  ཉར་ཚགས་བཤམ་སྟོན་དངོས་རྫས།  སློབ་ཁྲིད་འཆར་འགོད་དང་སློབ་ཁྲིད་ཞིབ་བརྗོད་སོགས་ཀྱི་ཆ་ནས་ཕན་ཚུན་བརྗེ་རེས་བཅས་བྱ་རྒྱུ་རེད།

བོད་ལྗོངས་མི་རིགས་སློབ་གླིང་གི་སློབ་གཙོ་གཞོན་པ་བཀྲ་ཤིས་ཚེ་རིང་གིས་
དཔེ་མཛོད་ཁང་གི་གནའ་དཔེ་ངོ་སྤྲོད་བྱེད་བཞིན་པ།

            ཨ་རིའི་ནུབ་བྱང་ནཱ་སཱ་ལི་སློབ་གླིང（NNU）ནི་སྤྱི་ལོ1913ལོར་བཙུགས་ཤིང་།  ཨ་རིའི་ཨེ་ཏཱ་ཧོའོ(Idaho)བྷོ་ཡཱའུ་སིའི(Boise) གྲོང་ཁྱེར་ཉེ་འགྲམ་གྱི་འཁོར་སྐར་གྲོང་ཁྱེར་ནཱ་ཕཱ（Nampa）ན་ཆགས་ཡོད་པ་དང་། ཨ་རིའི་ཨེ་ཏཱ་ཧོའོ(Idaho)ཞེས་པའི་ས་ཁུལ་འདིའི་ལོ་རྒྱུས་ཆེས་རིང་ཤོས་ཀྱི་སྒེར་གཉེར་སློབ་གྲྭ་ཞིག་ཡིན།  སློབ་གྲྭ་འདིར་ཚོང་གཉེར་སློབ་གླིང་དང་།  སློབ་གསོ་སློབ་གླིང་།  གླུ་གཞས་སློབ་གླིང་།  མང་ཚོགས་སྨྱན་སྤེལ་སློབ་གླིང་།  ནད་གཡོག་སློབ་གླིང་།  དར་མའི་སློབ་གསོ་གླིང་།  སྒྱུ་རྩལ་གླིང་།  རྩིས་འཁོར་གླིང་།  སྐྱེ་དངོས་གླིང་། རང་བྱུང་ཚན་རིག་གླིང་། ལུས་རྩལ་གླིང་།  དབྱིན་ཡིག་གླིང་སོགས་སློབ་གླིང་དུ་མ་མཆིས་ཤིང་།  དངོས་གཞིའི་ཆེད་ལས60ལྷག་དང་རབ་འབྱམས་པའི་ཆེད་ལས30ལྷག་བཙུགས་ཡོད་པ་རེད།