བོད་ལྗོངས་ཀྱིས་སློབ་ཆེན་སློབ་བསྡུའི་ཡིག་རྒྱུགས་ཀྱི་སྐར་གྲངས་ལྟར་འདོད་མོས་རེའུ་མིག་འགོད་དུ་འཇུག་པ།

            ད་ལོ་རང་ལྗོངས་ཀྱི་སློབ་ཆེན་སློབ་བསྡུའི་ཡིག་རྒྱུགས་སྤྱི་ཚེས9ཉིན་ཕུན་སུམ་ཚོགས་པོའི་ངང་མཇུག་སྒྲིལ་བ་དང་།  གསར་འགོད་པས་རང་སྐྱོང་ལྗོངས་སློབ་གསོ་ཡིག་རྒྱུགས་ཁང་ནས་ཤེས་རྟོགས་བྱུང་བར་གཞིགས་ན།  རང་ལྗོངས་ཀྱི་མཐོ་རྒྱུགས་སྦྱངས་འབྲས་སྤྱི་ཟླ6པའི་ཚེས26ཉིན་གྱི་གཡས་གཡོན་དུ་ཁྱབ་བསྒྲགས་བྱེད་བཟོ་ཡོད་པ་དང༌།  སྤྱི་ཟླ6པའི་ཚེས28ནས་སྤྱི་ཟླ7པའི་ཚེས5ཉིན་བར་སློབ་མ་ཚོས་འདོད་མོས་རིའུ་མིག་འགོད་རྒྱུ་ཡིན་པ་རེད།
            སློབ་ཆེན་ཡིག་རྒྱུགས་སྐར་གྲངས་ཡོངས་བསྒྲགས་བྱས་རྗེས་རང་ལྗོངས་ཀྱི་སློབ་མ་ཚོས་ཐབས་ལམ་གཉིས་ཀྱི་ཐོག་ནས་སྐར་གྲངས་བལྟ་ཆོག་གི་ཡོད་པ་སྟེ།  གཅིག་ནས་ཁ་པར་ཨང་གྲངས96833513བརྒྱབ་ནས་ཤེས་རྟོགས་བྱེད་ཆོག་པ་དང༌།  གཉིས་ནས་རང་སྐྱོང་ལྗོངས་སློབ་གསོ་ཡིག་རྒྱུགས་དྲ་ཚིགས་ཐོག་ནས་ཤེས་རྟོགས་བྱེད་ཆོག་གི་ཡོད་པ་རེད།
            རང་སྐྱོང་ལྗོངས་སློབ་གསོ་ཡིག་རྒྱུགས་ཁང་གི་འབྲེལ་ཡོད་འགན་ཁུར་བས་སློབ་མ་ཚོའི་འདོད་མོས་རེའུ་མིག་འགོད་པའི་ཉེན་ཁ་ཆུང་དུ་གཏོང་རྒྱུ་དང་།  སློབ་མའི་འདོད་མོས་རེའུ་མིག་འགོད་སྐབས་ཀྱི་སེམས་ཁྲལ་ཆུང་དུ་གཏོང་ཆེད།  དུས་ཚོད་སྔ་སྣུར་དུ་བསྡུ་རྒྱུའི་སློབ་མ་ཕུད་རང་ལྗོངས་ཀྱིས་སྔར་བཞིན་སྐར་གྲངས་ལ་གཞིགས་ནས་འདོད་མོས་རེའུ་མིག་འགོད་པའི་བྱ་ཐབས་བཟུང་རྒྱུ་རེད་ཅེས་ངོ་སྤྲོད་གནང་བ་རེད།