བོད་སྐད་ཀྱི་ལམ་ནས་ནུབ་ཀྱི་དེང་རབས་ཕྱི་མའི་ལུགས་ཀྱི་གཞུང་ལུགས་ཁྲིད་མགོ་བརྩམས་པ།

མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ནམ་འབུམ་རམས་པ་ཡོན་ཏན་ལགས་ཀྱི་ཉེ་བའི་སྐུ་པར།

           ཉེ་སྔོན།   མཚོ་སྔོན་དགེ་ཐོན་སློབ་ཆེན་བོད་ཡིག་སྡེ་ཁག་གི་དགེ་རྒན་ནམ་འབུམ་རམས་པ་ཡོན་ཏན་ལགས་ཀྱིས་འདི་གའི་སློབ་གླིང་དུ་དེང་རབས་རིང་ལུགས་དང་དེང་རབས་རིང་ལུགས་ཕྱི་མའི་རིག་གཞུང་སྐོར་གྱི་སློབ་ཁྲིད་བྱས་ཤིང་། འདི་ནི་བོད་རིགས་སློབ་མས་བོད་སྐད་ཀྱི་ལམ་ནས་གཞུང་ལུགས་དེར་རྒྱུས་ལོན་ཐོབ་པ་ཐོག་མ་ཡིན།  དེར་མ་ཟད་བོད་དུ་དེང་རབས་རིང་ལུགས་དང་དེང་རབས་རིང་ལུགས་ཕྱི་མའི་གཞུང་ལུགས་སློབ་ཁྲིད་ཀྱི་སྟོང་ཆ་སྐོང་ཐུབ་པར་གྱུར།
            སློབ་སྐབས་འདིར་ཁོང་གིས་མཚོ་སྔོན་དགེ་ཐོན་སློབ་ཆེན་མི་རིགས་དགེ་ཐོན་སློབ་གླིང་གི་སློབ་མ150ལྷག་ལ། ནུབ་ཕྱོགས་ཀྱི་མཚན་ཉིད་རིག་པ་སྨྲ་བ་ཁཱན་ཐྲི(Immanuel Kant)དང་། ཉེ་ཁྲེ། (Friedrich Wilhelm Nietzsche) ཧྥི་རེའུད། (Sigmund Freud)ཧའེ་རྡི་ཀར། (Martin Heidegger ) མཱ་ཁི་སི་བེ་པེར། (Max Weber)ཧྥོ་ཁོལ་ཐྲི། (Foucault )དཱི་རེ་ཏ། (Derrida ) བཅས་ཀྱི་ལྟ་དགོངས་རྣམས་རིམ་གྱིས་ཁྲིད་ཅིང་།  དེང་རབས་རིང་ལུགས་ཀྱི་འབྱུང་ཁུངས་དང་བྱུང་འཕེལ།  དེང་རབས་རིང་ལུགས་ཕྱི་མའི་འབྱུང་ཁུངས་དང་བྱུང་འཕེལ། དེང་རབས་རིང་ལུགས་དང་དེང་རབས་རིང་ལུགས་ཕྱི་མའི་བར་གྱི་འབྲེལ་བ་ཆགས་སྟངས། མིང་བརྡ་གསར་བ་དང་ལྟ་གྲུབ། བློ་འབྱེད་བསམ་བློ་དང་མི་གཤིས་བཅིངས་འགྲོལ། སྒྲིག་གཞི་རིང་ལུགས་དང་སྒྲིག་གྲོལ་རིང་ལུགས། དེང་རབས་སྤྱི་ཚོགས་དང་ཆོས་ལུགས་ཀྱི་འབྲེལ་བ་སོགས་ནུབ་གླིང་གི་གཞུང་ལུགས་གསར་ཤོས་སྐོར་རྒྱས་འགྲེལ་བྱས་ཡོད་པ་དང་། ཞོར་ལ་བོད་ཀྱི་ཐུན་མོང་མ་ཡིན་པའི་རིག་གནས་དང་གཤིབ་བསྡུར་བྱེད་པའི་ཐབས་ལམ་སྤྱད་དེ་སློབ་མ་རྣམས་ལ་གོ་བསྐོན་བློ་འགུགས་སྒོས་སློབ་ཁྲིད་བྱས་ཡོད་པ་རེད།