རྒན་པདྨ་ལྷུན་གྲུབ་ལགས་ཀྱིས་མཚོ་ལྷོའི་གཞི་རིམ་རྐང་འཛིན་ལོ་ཙཱ་བའི་གསོ་སྦྱོང་འཛིན་གྲྭར་འཆད་ཁྲིད་གནང་བ།

མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་ཞིབ་འཇུག་ཁང་གི་ཀྲུའུ་རིན་ནམ་འབུམ་རམས་པ་པདྨ་ལྷུན་གྲུབ་ལགས་ཀྱིས་འཆད་ཁྲིད་གནང་བཞིན་པ།

　　ཟླ8པའི་ཚེས14ཉིན། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་ཞིབ་འཇུག་ཁང་གི་ཀྲུའུ་རིན་པདྨ་ལྷུན་གྲུབ་ལགས་ཀྱིས2012ལོའི་མཚོ་ལྷོ་བོད་རིགས་རང་སྐྱོང་ཁུལ་ཡོངས་ཀྱི་གཞི་རིམ་རྐང་འཛིན་ལོ་ཙཱ་བའི་གསོ་སྦྱོང་འཛིན་གྲྭར་སྐད་རིགས་ཀྱི་བརྡ་སྤྲོད་ཁྱད་ཆོས་དང་ལོ་ཙཱའི་ཁ་ཕྱོགས་ཞེས་པའི་འཆད་ཁྲིད་གནང་བ་རེད།
　　རྒན་པདྨ་ལྷུན་གྲུབ་ལགས་ཀྱིས་སྤྱི་ཚོགས་འཕེལ་འགྱུར་དང་མི་རིགས་སྐད་ཡིག་གི་གནས་བབ་དང་། ལོ་ཙཱའི་ལག་ལེན་ལས་བསྐྱེད་པའི་རིགས་གཞུང་འཕེལ་འགྱུར་ཐད་ཀྱི་མྱོང་ཚོར། སྐད་རིགས་སོ་སོའི་ཁྱད་ཆོས་དང་ལོ་ཙཱའི་རྩ་དོན། སྐད་ཡིག་རིག་གནས་དང་འགྱུར་རྩོམ་རང་ངོས་ནས་ལོ་ཙཱའི་ཁ་ཕྱོགས་འཚོལ་བ་སོགས་ལ་རྒྱལ་ཁབ་ཕྱི་ནང་གི་ལོ་ཙཱ་སྨྲ་བ་རྣམས་ཀྱི་ལྟ་གྲུབ་དང་ལོ་ཙཱའི་རིགས་གཞུང་ཕུན་སུམ་ཚོགས་པ་བརྗོད་ཐོག  ང་ཚོའི་འཚོ་བའི་ཁྲོད་ས་ཁྱབ་རྡོ་ཁྱབ་ཏུ་སོང་བའི་དཔེ་མང་པོ་དྲངས་ནས་གསལ་བོར་བརྗོད་པ་རེད།
　　དེར་མ་ཟད་ལོ་ཙཱ་བྱེད་དུས་ཐ་དད་པའི་སྐད་རིགས་གཉིས་ཀྱི་ཐུན་མོང་གི་ཆ་དང་ཐུན་མིན་གྱི་ཆ་ལ་ཞིབ་འཇུག་བྱས་ཐོག  སོ་སོའི་བརྡ་སྤྲོད་པའི་རྨང་གཞི་ཤེས་བྱ་དང་། བོད་རྒྱ་སྐད་རིགས་གཉིས་ལ་མཚོན་ན་སོ་སོའི་ཐ་སྙད་ཀྱི་གྲུབ་ཚུལ། བྱ་བྱེད་ལས་གསུམ་གྱི་གོ་རིམ་སྒྲིག་སྟངས་ཀྱི་ཁྱད་པར། རྩོམ་ལུས་མི་འདྲ་བའི་ཁྱད་ཆོས་སོགས་ཁོང་བྱན་ཆུད་དགོས་ཚུལ་བསྟན་པ་རེད།
　　རྒན་པདྨ་ལྷུན་གྲུབ་ལགས་ཀྱི་འཆད་ཁྲིད་བརྒྱུད་ནས་ང་ཚོས་ལོ་ཙཱའི་ཐད་ཀྱི་རིགས་གཞུང་གསར་བ་དག་ལ་སློབ་སྦྱོང་དང་ངེས་ཤེས་གསལ་བོ་ཞིག་བསྐྱེད་ཐུབ་ཅིང་། ལོ་ཙཱའི་ལག་ལེན་ཁྲོད་རྒྱུན་འབྱམས་སུ་སོང་བའི་ནོར་འཁྲུལ་མང་བོ་ཞིག་ལ་དག་བཅོས་དང་གཟབ་གཟབ་བྱེད་དགོས་ཚུལ་བསྟན་པའི་ཁར། རྗེས་སོར་ལོ་ཙཱ་བྱེད་དུས་བསྒྱུར་པ་པོ་རྣམས་ཀྱིས་རིག་གནས་ལ་ཇི་ལྟ་བུའི་ལྟ་ཚུལ་ཞིག་བཅངས་དགོས་ཚུལ་བསྟན་པ་སོགས་ཀྱིས་ལོ་ཙཱའི་བྱ་བའི་ལག་ལེན་ལ་ངེས་པ་དོན་གྱི་དགེ་མཚན་ཆེན་པོ་ལྡན་པ་རེད།