མཚོ་ལྷོ་ཁུལ་གཞི་རིམ་རྐང་འཛིན་ལོ་ཙཱ་བའི་གསོ་སྦྱོང་འཛིན་གྲྭའི་མུ་འབྲེལ་འཆད་ཁྲིད།

དགེ་རྒན་ཆེན་མོ་བུ་བཞི་ལགས་ཀྱིས་འཆད་ཁྲིད་གནང་བཞིན་པ།

　　ཟླ8པའི་ཚེས16ཉིན། མཚོ་སྔོན་མི་རིགས་སློབ་གྲྭ་ཆེན་མོའི་བོད་རིག་པའི་སློབ་གླིང་གི་དགེ་རྒན་ཆེན་མོ་བུ་བཞི་བསམ་པའི་དོན་གྲུབ་ལགས་ཀྱིས་མཚོ་ལྷོ་བོད་རིགས་རང་སྐྱོང་ཁུལ་ཡོངས་ཀྱི་གཞི་རིམ་རྐང་འཛིན་ལོ་ཙཱ་བའི་གསོ་སྦྱོང་འཛིན་གྲྭར《སྒྲ་སྦྱོར་བམ་གཉིས》ཀྱི་གཞུང་ལུགས་དང་སྦྱར་ནས་དེང་རབས་ཐ་སྙད་གསར་བ་འགའི་བསྒྱུར་སྟངས་ལ་དཔྱད་པ་ཞེས་པའི་འཆད་ཁྲིད་གནང་བ་རེད།
　　རྒན་བུ་བཞི་ལགས་ཀྱིས《སྒྲ་སྦྱོར་བམ་གཉིས》གཞུང་ལུགས་ཀྱི་ལོ་རྒྱུས་རིན་ཐང་དང་། ལོ་ཙཱའི་རྩ་དོན། དེང་རབས་ཐ་སྙད་གསར་བའི་བསྒྱུར་སྟངས་སོགས་ཕྱོགས་གང་མང་ནས་གནད་དུ་འཐིངས་པའི་འཆད་ཁྲིད་གནང་བ་སྟེ། ཁོང་གིས་གསུང་རྒྱུར། 《སྒྲ་སྦྱོར་བམ་གཉིས》ནི་སྔོན་མའི་ལོ་ཙཱའི་ཚད་གཞི་ཞིག་ཡིན་པར་མ་ཟད། ཉེ་རབས་དང་དེང་རབས་ཀྱི་ལོ་ཙཱའི་ཚད་ཐིག་ཅིག་ཀྱང་ཡིན་པས། དེ་ནི་དུས་རབས་ཀྱི་བཀག་རྒྱ་ལས་བརྒལ་ཞིང་ཤེས་རིག་ཚན་ཁག་གི་རིས་སུ་མ་ཆད་པར་ཕྱོགས་གང་ལ་སྤྱོད་ཀྱང་འཚམ་པའི་གཞུང་ལུགས་ཡང་དག་དང་ཚད་ལྡན་ཞིག་རེད་ཅེས་བརྗོད་པ་རེད། དེའི་འཕྲོར་དེང་རབས་ཐ་སྙད་གསར་བའི་བསྒྱུར་ཐབས་ཏེ། གྲངས་ཀྱི་བསྒྱུར་སྟངས་དང་། གོ་གནས་དང་ཐོབ་ཐང་གི་བསྒྱུར་སྟངས། མངོན་བརྗོད་ཀྱི་བསྒྱུར་སྟངས། སྟབས་བསྟུན་གྱི་ཐ་སྙད་བསྒྱུར་སྟངས་སོགས་དཔེ་གང་མང་དྲངས་ཏེ་ཁ་གསལ་ཞིང་གོ་བདེ་བའི་སྒོ་ནས་བསྟན་པ་རེད།
　　དགེ་རྒན་ཆེན་མོ་བུ་བཞི་ལགས་ཀྱི་འཆད་ཁྲིད་བརྒྱུད་ནས་ལོ་ཙཱའི་གཞུང་ལུགས་ཀྱི་ཉིང་བཅུད་ལ་རོལ་མྱོང་བྱེད་ཐུབ་པར་མ་ཟད། དེང་ཕྱིན་ལོ་ཙཱའི་ལག་ལེན་ལ་འཇུག་པར་མཛུབ་སྟོན་གསལ་བོ་གནང་བས་ཀུན་གྱིས་དགའ་བསུ་ཆེན་པོ་ཐོབ་པ་རེད།