རྒྱལ་སྤྱིའི་བོན་གྱི་བགྲོ་གླེང་ཚོགས་འདུ་ཐེངས་གཉིས་པ་ཁྲི་བརྟན་ནོར་རྩེ་རུ་བསྡུས།

རྒྱལ་སྤྱིའི་བོན་གྱི་བགྲོ་གླེང་ཚོགས་འདུ་ཐེངས་གཉིས་པ་བལ་ཡུལ་
ཁྲི་བརྟན་ནོར་རྩེ་ལ་ཚོགས་པའི་གནས་བསྡུས།

        ཟླ12པའི་ཚེས10དང་ཚེས11ཉིན། རྒྱལ་སྤྱིའི་བོན་གྱི་རིག་གཞུང་བགྲོ་གླེང་ཚོགས་འདུ་ཐེངས་གཉིས་པ་དེ་བལ་ཡུལ་བོན་དགོན་དཔལ་ལྡན་ཁྲི་བརྟན་ནོར་བུའི་རྩེར་འཚོགས་ཤིང་། དེ་ཡང་དཔལ་ལྡན་ཁྲི་བརྟན་ནོར་བུ་རྩེ་དབུ་བརྙེས་ནས་མི་ལོ་ཉེར་ལྔ་འཁོར་བའི་རྟེན་འབྲེལ་མཛད་སྒོ་དང་སྟབས་བསྟུན་ནས་རྒྱལ་ཁབ་ཕྱི་ནང་ཀུན་ནས་ཆེད་དུ་ཕེབས་པའི་མཁས་དབང་དང་ཞིབ་འཇུག་པ་གྲགས་ཅན་མང་པོ་གདན་ཞུ་ཞུས་ཡོད་པ་ལྟར། རྒྱལ་སྤྱིའི་བོད་རིག་པའི་གྲོས་ཚོགས་ཀྱི་ཚོགས་གཙོ་ཟུར་པ་ཧྥ་རན་སི་རྒྱལ་ཁབ་ཚན་རིག་ཁང་གི་ཞིབ་འཇུག་པ་བོད་རིག་པའི་མཁས་དབང་ཆེན་མོ་སྐུ་ཞབས་མཁར་རྨེའུ་བསམ་གཏན་རྒྱལ་མཚན་ལགས་དང་། རྒྱལ་སྤྱིའི་བོད་རིག་པའི་གྲོས་ཚོགས་ཀྱི་ཚོགས་གཙོ་ལས་ཐོགས་པ་དབྱིན་ཇིའི་ཨག་སི་ཧྥོར་སློབ་གྲྭ་ཆེན་མོའི་དགེ་རྒན་ཆེན་མོ་བོད་རིག་པའི་མཁས་དབང་སྐུ་ཞབས་ཆལ་སི་རམ་བྷོ་Charles Ramble(གཡུང་དྲུང་ཚེ་དབང་།)། ཉི་ཧོང་གི་བོད་རིག་པའི་མཁས་དབང་ན་ག་ནོYasuhiko Nagano། གཞན་ཡང་བོད་རིག་པའི་མཁས་དབང་རི་གར་དྲོRicardo Canzio། བོད་རིག་པའི་མཁས་པFrançoise Pommaret། བོད་རིག་པའི་མཁས་པ་མར་རི་ཏMarietta Kind། བོད་རིག་པའི་མཁས་པJohn Myrdhin Reynolds། ཁྲི་བརྟན་ནོར་རྩེའི་དགེ་བཤེས་མཁས་དབང་དྲང་སྲོང་རྣམ་རྒྱལ་བཅས་ཀྱིས་ཉིན་གཉིས་ཀྱི་རིང་ལ་བོན་གྱི་སྐོར་ལ་བགྲོ་གླེང་གསུང་བཤད་གནང་།
        དེ་བཞིན་བགྲོ་གླེང་ཚོགས་ཐོག་ལ་རྒྱལ་ཕྱི་ནང་ཁག་གི་འཐུས་ཚབ་སྟེ།  དཔལ་གཤེན་བསྟན་སྨན་རིའི་གླིང་གི་བླ་སྤྱིའི་འཐུས་ཚབ། བཤད་སྒྲུབ་འདུས་སྡེའི་ཚོགས་གཙོ། སྨན་རིའི་གྲྭ་ཚང་གི་གཉེར་པ། སྨན་རིའི་དཔེ་མཛོད་ལས་བྱེད། བཙུན་དགོན་རད་ཎ་སྨན་གླིང་གི་གཉེར་པ། གཡུང་དྲུང་བོན་གྱི་དྲ་རྒྱའི་གསར་འགོད་པ། རྫ་སྨོན་རྒྱལ་གཡུང་དྲུང་གླིང་གི་སྐུ་ཚབ། ཞུ་རུ་ཞིང་གཡུང་དྲུང་ཀུན་གྲགས་གླིང་གི་འཐུས་ཚབ། ཝ་ན་མཐོ་སློབ་གཡུང་དྲུང་བོན་གྱི་དགེ་རྒན་རྣམ་པ་དང་། གཡུང་དྲུང་བོན་གྱི་སྤྱི་འཐུས། བལ་ཡུལ་རྒྱལ་ཁོངས་སུ་གནས་པའི་བོན་གྱི་དགོན་སྡེ་ཁག་གི་དབུ་བླ་རྣམ་པ་དང་།  འཕགས་ཡུལ་སྨན་རི་དང་བལ་པོའི་ཁྲི་བརྟན་ནོར་རྩེའི་དགེ་བཤེས་དང་སློབ་གཉེར་བ་ཁག་གཅིག   དེ་བཞིན་ཧྥ་རན་སི་བོན་ཚོགས་ཀྱི་ཚོགས་གཙོ་དང་། ལིག་མིན་རྐྱ་བོན་ཚོགས་ཀྱི་སྐུ་ཚབ། འོམ་མོ་གླིང་བོན་ཚོགས་ཀྱི་བླ་མ། དེར་མཚུངས་ཨ་རི་དང་། ཡོ་རོབ། ཉི་ཧོང་། རྒྱ་དཀར་ནག་སོགས་འཛམ་གླིང་ཤར་ནུབ་ཀྱི་རྒྱལ་ཁབ་དུ་མ་ནས་ཕེབས་པའི་སློབ་གཉེར་བ་སྟོང་ཕྲག་ལྷག་ཚོགས་ཐོག་ཏུ་ཞུགས་པ་རེད།