སྐབས་གཉིས་བའི་བོད་ལྗོངས་ཁྱད་ལྡན་ཐོན་ལས་འཕེལ་རྒྱས་གླེང་སྟེགས་ཁྲེང་ཏུའུ་ནས་སྤེལ་མགོ་བརྩམས།

     ཉེ་ལམ། བོད་ལྗོངས་ཚོང་དོན་ཐིན་གྱི་རྩ་འཛུགས་དང་། བོད་ལྗོངས་ཀྱི་ཁྱད་ལྡན་ཐོན་རྫས་ལས་རིགས་མཐུན་ཚོགས་ཀྱིས་སྤེལ་བའི་སྐབས་གཉིས་པའི་བོད་ལྗོངས་ཀྱི་ཁྱད་ལྡན་ཐོན་ལས་འཕེལ་རྒྱས་གླེང་སྟེགས་ཁྲེང་ཏུའུ་ནས་སྤེལ།
     ཚོགས་འདུའི་སྟེང་འབྲེལ་ཡོད་ཁྱད་ལྡན་ཐོན་ལས་ཆེད་མཁས་པ་དང་བོད་ལྗོངས་ཀྱི་ཁེ་ལས་མང་པོའི་འཐུས་མི་གདན་དྲངས་ཏེ་ཚོགས་འདུ་ལ་ཞུགས། ཚོགས་ཐོག་ནས་འཐུས་མི་རྣམས་ཀྱིས་བོད་ལྗོངས་ཀྱི་ཁྱད་ལྡན་ཐོན་ལས་མུ་མཐུད་དུ་འཕེལ་རྒྱས་བྱུང་བའི་ཐད་ནས་བསམ་འཆར་བཏོན་ནས་གྲོས་མོལ་གནང་། མ་ཟད་རྒྱལ་ཡོངས་ཀྱི་ས་གནས་སོ་སོ་ནས་ཡོང་བའི་ཆེད་མཁས་པ་རྣམས་ཀྱིས་བོད་ལྗོངས་ཀྱི་ཁྱད་ལྡན་ཐོན་ལས་འཕེལ་རྒྱས་ཀྱི་གནས་བབ་དང་ཁ་གཏན་འཇལ་དགོས་བའི་གནད་དོན་ཕྱོགས་ལ་གཏམ་བཤད་གནང་།
     ཐེངས་འདིའི་གླེང་སྟེགས་སྟེང་ཁེ་ལས་པ་དང་ཆེད་མཁས་པ་རྣམས་ཀྱིས་མཉམ་དུ་བསམ་བློ་བརྗེ་རེས་དང་ཉམས་མྱོང་བསྡུ་ལེན་བྱེད་པ་ལས་བོད་ལྗོངས་ཀྱི་ཁྱད་ལྡན་ཐོན་ལས་འཕེལ་རྒྱས་བྱུང་བར་སྟེགས་བུ་ཡག་པོ་ཞིག་མཁོ་འདོན་བྱས་ཡོད། བོད་ལྗོངས་ཀྱི་ཁེ་ལས་པ་རྣམས་ཀྱིས་བསྟན་དོན། “བོད་ཡིག་རྟགས་ཅན”གྱི་ཚོང་རྟགས་རྒྱལ་ནང་ཚོང་ར་རུ་ཁྱབ་གདལ་དུ་གཏོང་བ་དང་། འཛམ་གླིང་སྟེང་གྲགས་པར་འབད་བརྩོན་ལྷོད་མེད་བྱས་ཏེ་བོད་ལྗོངས་ཀྱི་ཁྱད་ལྡན་ཐོན་ལས་འཕེལ་རྒྱས་ཐད་རང་ཉིད་ཀྱི་ནུས་པ་བཏོན་ཏེ་བྱས་རྗེས་འཇོག་རྒྱུ་ཡིན་ཟེར།