༄༅།།མཁས་པ་ལྡེའུས་མཛད་པའི་རྒྱ་བོད་ཀྱི་ཆོས་འབྱུང་རྒྱས་པ། 

《མཁས་པ་ལྡེའུས་མཛད་པའི་རྒྱ་བོད་ཀྱི་ཆོས་འབྱུང་རྒྱས་པ》སློབ་དེབ་འདི་ནི་ཐོག་མར་མཁས་པ་ལྡེའུས་སྤྱི་ལོའི་དུས་རབས་བཅུ་གཉིས་པའི་དུས་དཀྱིལ་ལ་བརྩམས་པ་དང་། དེ་རྗེས་སུ་དུས་རབས་བཅུ་གསུམ་པའི་སྟོད་ཆར་མཁས་པ་ཇོ་ནམ་གྱིས་ཞུད་འགྲེལ་གནང་ཞིང་། དུས་སྐབས་དེ་རང་ལ་མཁས་པ་གཞན་ཞིག་གིས་སླར་ཡང་འགྲེལ་སྣོན་མཛད་ཡོད་པ་བཅས་ནི་མ་དཔེའི་ཁ་བྱང་དང་མཇུག་བྱང་ལས་གསལ། གནའ་རབས་ཀྱི་ལོ་རྒྱུས་ཡིག་ཆ་འདི་ནི་བོད་ཀྱི་རྒྱལ་རབས་ཆོས་འབྱུང་གི་ཁྲོད་ནས་བརྩམས་དུས་ཅུང་སྔ་བའི་གྲས་ཤིག་ཡིན་ལ། སྤྱིར་ན་ནང་དོན་གང་ཞིག་བརྗོད་པ་དེ་དག་སོ་སོའི་ཁུངས་ལུང་གསལ་ཙམ་དྲངས་པ་མ་ཟད། རྩ་བའི་གཞུང་ཚིག་དུམ་བུ་རེ་རེ་ལ་འགྲེལ་བཤད་ཅུང་བརྒྱུད་རིམ་ལྡན་པ་ཞིག་ཀྱང་གནས་ཡོད་ཅིང་། དེ་ཡང་རྒྱ་གར་དུ་ནངས་པ་སངས་རྒྱས་ཀྱི་བསྟན་པ་ཇི་ལྟར་བྱུང་བའི་ཁུངས་དང་། བོད་དུ་སངས་རྒྱས་ཆོས་ལུགས་ཀྱི་རྣམ་གྲངས་སྔ་ཕྱིར་ཇི་ལྟར་སྒྱུར་ཞིང་དར་བའི་སྐོར། དེ་བཞིན་མདོ་དང་རྒྱུད་སྡེའམ་བཀའ་དང་བསྟན་བཅོས་སོགས་བྱེ་བྲག་སོ་སོར་འབྱེད་པའི་དབྱེ་བ་ཞིབ་མོར་བསྟན་པ། དེ་དག་ཀྱང་ཚིག་ཉུང་ལ་དོན་བསྡུས་པའི་སྒོ་ནས་བཤད་པ་བཅས་སངས་རྒྱས་ཆོས་ལུགས་ལ་ཞིབ་འཇུག་བྱ་རྒྱུར་མཚོན་ནའང་ཐོག་མར་མདོ་རྒྱུད་གཞུང་ལུགས་བྱེ་བའི་སྒོ་འཕར་འབྱེད་པའི་ལྡེ་མིག་ལྟ་བུར་མངོན་ཞིང་། ལྷག་པར་དུ་བོད་ཀྱི་གནའ་རབས་ལོ་རྒྱུས་འགའ་ཞིག་གི་ཐད་རྒྱལ་རབས་ཆོས་འབྱུང་གཞན་དག་གི་ནང་མཐོང་དཀོན་པའི་དཔྱད་གཞི་ངོ་མཚར་ཅན་མི་ཉུང་བ་ཞིག་ ཡོད་པར་སྣང་། དཔེར་ན་མངའ་བདག་དཔལ་འཁོར་བཙན་དང་མགོན་སྤྱོད་གཉིས་ཀྱི་དུས་སུ་འབངས་གྱེན་ལོག་གི་བྱུང་ཚུལ་ཡང་གཞན་ལས་གསལ་ཙམ་འཁོད་ཡོད་པ་ལྟ་བུ། མདོར་ན་བོད་ཀྱི་ལོ་རྒྱུས་ལ་དཔྱད་གཞི་བྱེད་པའི་དཔེ་དེབ་སྤུས་མ་ཞིག་ཏུ་གྱུར་ཡོད།