༄༅།།《བོད་ཀྱི་མངོན་བརྗོད་བསྡུས་འགྲེལ་གསར་བསྒྲིགས》པར་དུ་བསྐྲུན།

དུས་རབས་བཅུ་གསུམ་པའི་སྔོན་རྗེས་སུ་བོད་ཀྱི་ལོ་ཙཱ་བ་ཆེན་པོ་ཤོང་སྟོན་རྡོ་རྗེ་རྒྱལ་མཚན་གྱིས་རྒྱ་གར་གྱི་རིག་གཞུང《སྙན་ངག་མེ་ལོང་མ》དང་། བསྟན་བཅོས《དཔག་བསམ་འཁྲི་ཤིང》《ཀླུ་ཀུན་ཏུ་དགའ་བ》སོགས་མངོན་བརྗོད་ཀྱི་ཐ་སྙད་ཀྱིས་སྤྲས་པ་མང་པོ་བོད་ཡིག་ཏུ་བསྒྱུར། དུས་མཚུངས་སུ་རྒྱ་གར་གྱི་མཁས་པ་འཆི་མེད་སེང་གེས་མཛད་པའི《མངོན་བརྗོད་ཀྱི་བསྟན་བཅོས་འཆི་བ་མེད་པའི་མཛོད》ཅེས་པ་དེ་བོད་ཀྱི་མཁས་པ་ཡར་ལུང་གྲགས་པ་རྒྱལ་མཚན་གྱིས་བོད་ཡིག་ཏུ་བསྒྱུར། དེ་ནས་བཟུང་བོད་ཀྱི་མཁས་པ་རྣམས་ཀྱིས་མཛད་པའི་གཞུང་རྣམས་སུ་མངོན་བརྗོད་ཀྱི་ཐ་སྙད་ཇེ་མང་དུ་ཕྱིན་ཏེ་བོད་ཀྱི་རྩོམ་རིག་འཕེལ་རྒྱས་སུ་གཏོང་བར་ཕན་ནུས་ཆེན་པོ་ཐེབས་ཡོད་པ་རེད།
སྐབས་འདིར་བོད་ཀྱི་མངོན་བརྗོད་ཀྱི་ཐ་སྙད་ཡུན་རིང་དུ་གནས་ཐབས་དང་སྲུང་འཛིན་བྱེད་པ། རྒྱ་ཆེའི་ཀློག་པ་པོས་མངོན་བརྗོད་ཀྱི་མིང་གིས་བཅིངས་པའི་བོད་ཀྱི་གནའ་རྩོམ་སློབ་སྦྱོང་བྱེད་སླ་བ་དང་ནང་དོན་ལེགས་པར་རྟོགས་པའི་ཆེད་དུ། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་ལི་ཀྲུང་ལིན་ལགས་ཀྱིས་སྒྲིག་རྩོམ་བྱས་ཤིང་སི་ཁྲོན་མི་རིགས་དཔེ་སྐྲུན་ཁང་གིས་དཔར་དུ་བསྐྲུན་པའི《བོད་ཀྱི་མངོན་བརྗོད་བསྡུས་འགྲེལ་གསར་བསྒྲིགས》ཞེས་པ་ད་ལྟ་དངོས་སུ་སྤྱི་ཚོགས་སོ་སོར་འགྲེམ་སྤེལ་བྱས་ཡོད་པ་དང་། དེབ་ཀྱི་ནང་དོན་དང་སྒྲིག་རིམ་ཐད་བོད་རྒྱ་ཤན་སྦྱར་གྱིས་མིང་ཚིག་དང་མིང་ཚིག་སོ་སོའི་མངོན་བརྗོད། གྲངས་ཚིག་དང་གྲངས་ཚིག་སོ་སོའི་མངོན་བརྗོད། བོད་ཟླ་དང་བོད་ཟླ་སོ་སོའི་མངོན་བརྗོད། བོད་ཟླའི་ཚེས་གྲངས་དང་ཚེས་གྲངས་སོ་སོའི་མངོན་བརྗོད་བཅས་ཆ་ཤས་བཞི་རུ་ཕྱེས་ཡོད་དོ།།