༄༅། །《སྡེ་པ་གཞུང་གི་ལོ་རྒྱུས་ཉིན་བྱེད་སྣང་བ》ཞེས་པའི་དཔེ་ཆ་སྟོད་སྨད་འོས་སྦྱོར།

བོད་ལྗོངས་སློབ་གྲྭ་ཆེན་མོའི་འབུམ་རམས་པའི་སློབ་དཔོན་ནོར་བུ་བསམ་འཕེལ་ལགས་ཀྱིས་བོད་དང་། སོག་པོ། མན་ཇུ། རྒྱ་ནག་བཅས་ཀྱི་འབྲེལ་ཡོད་ཡིག་ཚགས་དང་། དེ་མིན་ཡིག་རིགས་གཞན་འདྲ་མིན་མང་པོར་ཁུངས་གཏུགས་ཏེ་ཞིབ་བསྡུར་གང་གཟབ་གནང་ཐོག རྒྱལ་ཁབ་ཕྱི་ནང་གི་ཞིབ་འཇུག་ལ་ཐོབ་པའི་གྲུབ་འབྲས་གསར་པ་གང་མང་དཔྱད་གཞིར་བཟུང་ཏེ། ཆིང་རྒྱལ་རབས་དུས་འགོའི་མཚམས་ཀྱི་བོད་ས་གནས་ཀྱི་ལོ་རྒྱུས་འདི་ཉིད། ཆིང་རྒྱལ་རབས་དང་མིང་རྒྱལ་རབས་བརྗེ་མཚམས་ཀྱི་ཀྲུང་གོའི་ལོ་རྒྱུས་སྤྱིའི་རྒྱབ་ལྗོངས་ཁྲོད་བཞག་ཅིང་། བོད་སོག་འབྲེལ་བའི་ཚུགས་ལུགས་འཕེལ་ཕྱོགས་ལ་ཞིབ་འཇུག་གནད་སྨིན་བྱས་པའི་ལམ་ནས་བོད་སོག་མཉམ་འབྲེལ་སྟོབས་ཤུགས་ཀྱིས་མདོ་དབུས་མཐོ་སྒང་ལ་དབང་ཁ་བསྒྱུར་བའི་ཚུལ་དང་། བོད་སོག་མཉམ་འབྲེལ་སྲིད་དབང་གི་གྲུབ་སྟངས། དབང་སྒྱུར་ཁྱབ་ཁོངས། ཁྲིམས་སྲོལ་ལམ་ལུགས། དབང་ཆ་བགོ་འགྲེམས། ནང་ཁུལ་གྱི་འགལ་འབྲེལ། དེ་མིན་བོད་སོག་མཉམ་འབྲེལ་སྲིད་དབང་དང་ཆིང་རྒྱལ་རབས་ཀྱི་འབྲེལ་བ་དང་ཆིང་རྒྱལ་རབས་ཀྱིས་བོད་སྐྱོང་སྲིད་ཇུས་སྤེལ་འཆར་གྱི་ནང་གྲབས་ཇི་ལྟར་བྱས་ཚུལ་སོགས་ལས་འཕྲོས་ཏེ། སྐབས་དེའི་བོད་ས་གནས་ལོ་རྒྱུས་ཀྱི་ཆགས་སྟངས་དང་འཕེལ་རིམ་སྐོར་ལ་ཞིབ་འཇུག་བྱས་པའི་ནང་དོན་དངོས་གཞི་ལེའུ་བདུན་དུ་ཕྱེ་ནས་རྒྱས་པར་གླེང་ཡོད།