༄༅།།《ནག་ཚང་ཉི་མའི་ལོ་རྒྱུས་དྭངས་གསལ་རིན་ཆེན་བང་མཛོད》ཅེས་པའི་དཔེ་དེབ་པར་བསྐྲུན་འགྲེམ་སྤེལ་བྱས།

ཉེ་ལམ། ནག་ཚང་རྫོང་གནའ་བོའི་ཞང་ཞུང་ཤེས་རིག་དཔེ་ཚོགས་ཨུ་ཡོན་ལྷན་ཁང་གིས་གཙོ་སྒྲིག་མཛད་པའི《ནག་ཚང་ཉི་མའི་ལོ་རྒྱུས་དྭངས་གསལ་རིན་ཆེན་བང་མཛོད》ཅེས་པའི་དཔེ་དེབ་འདི་སི་ཁྲོན་མི་རིགས་དཔེ་སྐྲུན་ཁང་གིས་པར་བསྐྲུན་འགྲེམ་སྤེལ་བྱས། དེ་ཡང་ནག་ཚང་ཉི་མ་རྫོང་ནི་བོད་བཙན་པོའི་དུས་རབས་ཀྱི་ཡར་སྔོན་དུ་བྱུང་བའི་གནའ་བོའི་ཞང་ཞུང་བོན་གྱི་ཤེས་རིག་དར་ཡུལ་ཞང་ཞུང་སྟོད་སྨད་བར་གསུམ་ཁྲོད་ཀྱི་ཞང་ཞུང་བར་བའི་ལྟེ་བ་ཡིན་སྟབས། ཞང་ཞུང་གི་གནའ་ཤུལ་མང་པོ་གང་སར་མཐོང་རྒྱུ་ཡོད་པ་མ་ཟད། བརྗིད་ཉམས་ཀྱིས་ཕྱུག་པའི་རྟ་སྒོ་གངས་རི་དང་། དྭངས་ཤིང་གསལ་བའི་དྭང་ར་གཡུ་མཚོ་ཡང་གནས་དེ་རུ་ཡོད་པས། གཙོ་སྒྲིག་པས་རྟ་སྒོ་གངས་རི་དང་དྭང་ར་གཡུ་མཚོ་སོགས་གཙོ་བྱས་པའི་ཡུལ་དེའི་ལོ་རྒྱུས་དང་གནས་བཤད་དག་རྒན་རབས་བགྲེས་པོའི་ངག་རྒྱུན་དང་དོན་དངོས་སོགས་ལ་གཞིགས་ནས་ཞང་ཞུང་སྒོ་བའམ་ནག་ཚང་ནས་དར་བའི་ལོ་རྒྱུས་ཀྱི་རང་བཞིན་དང་ས་གནས་ཀྱི་རང་བཞིན། ཆོས་ལུགས་ཀྱི་རང་བཞིན། སྒྱུ་རྩལ་གྱི་རང་བཞིན། དཔྱད་གཞིའི་རང་བཞིན། ཞིབ་འཇུག་གི་རང་བཞིན་བཅས་ཀྱི་ཉམས་རྫོགས་པའི་གནའ་བོའི་རྫོང་མཁར་དང་། དགོན་སྡེ། གནས་རི། གནས་མཚོ། རང་བྱུང་གི་བྲག་ཕུག ཞང་ཞུང་ཡི་གེའི་བྲིས་རྒྱུན། ཐང་ག  དམངས་གླུ། སྒོར་གཞས་སོགས་ལེགས་པར་བསྡུས་ནས་རྒྱ་ཆེའི་ཀློག་པ་པོ་དག་གི་སྤྱན་ལམ་དུ་ཕུལ་ཡོད་དོ།།