༄༅།།མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས《རྨ་གཡང་ཕྱུག་མོའི》འགྲེམ་སྤེལ་གྱི་མཛད་སྒོ་སྤེལ།

2019ལོའི་ཟླ12པའི་ཚེས28ཉིན་གྱི་ཞོགས་པར།  མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས་སློབ་རའི་དུས་དེབ་རྨ《གཡང་ཕྱུག་མོའི》སྤྱིའི་འདོན་ཐེངས་གསུམ་པའི་འགྲེམ་སྤེལ་གྱི་མཛད་སྒོ་རིག་བྱེད་ཕུན་ཚོགས་གླིང་གི་མདུན་ངོས་ཀྱི་ཤེས་རབ་ཐང་ཆེན་དུ་སྤེལ། མཚོ་ལྷོ་ཁུལ་མི་རིགས་སློབ་འབྲིང་གཉིས་པ་ནི་སྔར་གྱི་ཁྲི་ཀ་རྫོང་མི་རིགས་སློབ་འབྲིང་གི་རྨང་གཞིའི་སྟེང་འཕེལ་རྒྱས་བྱུང་ཞིང་། 2019ལོའི་ཟླ8པར་ཁུལ་གྱི་མཐོ་འབྲིང་དུ་བསྒྱུར། སློབ་གྲྭ་ཚུགས་པ་ནས་ད་ལྟའི་བར་བགྲང་བྱ་སུམ་ཅུ་ལྷག་གི་ལོ་རྒྱུས་ལྡན་ཅིང་། དེའི་ཡུན་དུ《གངས་ཐིགས》དང《བདེན་འཚོལ》《རེ་སྨོན》སོགས་ཀྱིས་མཚོན་པའི་སློབ་རའི་ཚགས་པར་རིམ་པར་སྤེལ་མྱོང་ལ། འཛིན་གྲྭའི་སློབ་མ་རྣམས་ཀྱིས་བརྩམས་པའི《ཁ་སང་གི་ང་ཚོ》དང《ཁ་ཡ་ན་ཟླ》སོགས་ཀྱི་དེབ་ཀྱང་འགྲེམ་སྤེལ་བྱས་མྱོང་མོད།  སློབ་རའི་དུས་དེབ་ཀྱི་རྣམ་པར་ཕུལ་བ་ནི 《རྨ་གཡང་ཕྱུག་མོ》དང་པོ་ཡིན།  2018ལོའི་ལོ་མཇུག་ཏུ་སློབ་གྲྭའི་མགོ་ཁྲིད་རྣམ་པས་ཐུགས་ཁུར་དང་རྒྱབ་སྐྱོར་འོག་ཏུ།  བོད་ཡིག་གི་རྩོམ་སྒྲིག་པའི་དགེ་རྒན་གཉིས་དང་རྒྱ་ཡིག་གཅིག དབྱིན་ཡིག་གཅིག་བཅས་བསྡོམས་པས་མི་བཞིས་གྲུབ་པའི་རྨ་གཡང་ཕྱུག་མོའི་རྩོམ་སྒྲིག་ཁང་ཞེས་པའི་རྩོམ་སྒྲིག་ཚན་ཆུང་ཞིག་གསར་འཛུགས་གནང་ཞིང་།  སློབ་རའི་དུས་དེབ 《རྨ་གཡང་ཕྱུག་མོ》དངོས་སུ་འགྲེམ་སྤེལ་བྱེད་པའི་ལམ་དུ་ཆས་མགོ་བརྩམས།《རྨ་གཡང་ཕྱུག་མོ》ནི་ནང་དོན་གྱི་སྒོ་ནས་རྩོམ་ལུས་སྣ་ཚོགས་དང་ཡིག་གཟུགས་མཛེས་རིས་སོགས་དང་། སྐད་རིགས་ཀྱི་ཆ་ནས་རྒྱ་བོད་དབྱིན་གསུམ། རྩོམ་མཁན་གྱི་ཐད་ནས་སློབ་གྲྭ་འདིའི་དགེ་སློབ་གཙོ་བྱས་པའི་སྤྱི་ཚོགས་སྟེང་གི་རྩོམ་པ་པོས་བསྐུར་བའི་བརྩམས་ཆོས་ཀྱང་འདུ་བའི། སྣ་འཛོམས་དང་སྒོ་འབྱེད་རང་བཞིན་གྱི་ཁྱད་ཆོས་ལྡན་པའི་ལོ་ཕྱེད་ཀྱི་དུས་དེབ་ཅིག་ཡིན་ཞིང་།  ད་ཐེངས་ནི་སྤྱིའི་འདོན་ཐེངས་གསུམ་པ་ཡིན།
གཟའ་ལྷག་པའི་ཉིན་གྱི་སྔ་དྲོའི་སློབ་གསེང་རྩལ་སྦྱོང་གྲོལ་མ་ཐག  གླུ་བ་རྡོ་རྗེ་ཚེ་བརྟན་གྱི་དམངས་གླུ་སྙན་མོའི་དབྱངས་རྟ་དང་བསྡོངས་ནས། དགེ་རྒན་ཡོངས་དང་ལོ་རིམ་གསུམ་གྱི་སློབ་མ་རྣམས་རིག་བྱེད་ཕུན་ཚོགས་གླིང་གི་མདུན་དུ་གོ་རིམ་ལྟར་གྲལ་འགྲིག་པོར་བསྒྲིགས་ཤིང་།  སློབ་གྲྭའི་མགོ་ཁྲིད་དང་རྩོམ་སྒྲིག་པ་རྣམས་རང་རང་གི་གནས་སུ་བཞུགས་གདན་འཇགས་རྗེས་མཛད་སྒོའི་ལས་རིམ་གྱི་མགོ་དངོས་སུ་བརྩམས། ཐོག་མར་བོད་ཡིག་གི་རྩོམ་སྒྲིག་པ་རྒན་ལྕགས་རྒྱལ་འབུམ་གྱིས《གཡང་ཕྱུག་མོའི》སྤྱིའི་འདོན་ཐེངས་གསུམ་པའི་སྟེང་བཀོད་པའི་དགེ་སློབ་ཀུན་གྱི་མིང་ཐོ་བསྒྲགས་ཤིང་། དགའ་བསུ་མཚམས་མེད་ཞུ་བའི་ལག་ཟུང་མཐེབ་མོའི་རྡེབ་སྒྲའི་ཁྲོད་དུ་དུས་དེབ་རེ་རེ་རྟེན་འབྲེལ་ཞུ་བའི་སྐྱེས་སུ་བསྟབས།  དེ་འཕྲོར་ལོ་རིམ་གསུམ་གྱི་འཛིན་གྲྭ་སོ་སོར་ཡང་དུས་དེབ13རེ་རིམ་པ་བ་ཞིན་གནང་ངོ་། །བར་དུ་དགེ་རྒན་ལྕགས་རྒྱལ་འབུམ་དང་ལྷ་མཁར་ཚེ་རིང་གཉིས་ཀྱིས་རྩོམ་སྒྲིག་པའི་ཚབ་བྱས་ཏེ། ཐེངས་འདིའི་དུས་དེབ་ཀྱི་ནང་དོན་གྱི་ཁྱད་ཆོས་དང་དགེ་སྐྱོན། མ་འོངས་པར་ཤུགས་སྣོན་པའི་ཆ་སོགས་ཀྱི་བྱ་བའི་མགོ་སྔ་བར་གསུམ་ལ་གསལ་བཤད་དང་སྤྱི་སྡོམ་བྱས་ཤིང་། དུས་མཚུངས་སུ་དེབ་འདིའི་རྒྱུན་སྐྱོང་བ་ནི་ཐུན་མོང་གི་ལས་ཤིག་ཡིན་པས།  ཚང་མས་ཕྱར་བ་གྲུ་འདེགས་ཀྱིས་རྒྱབ་སྐྱོར་དང་ཐུགས་ཁུར་གནང་དགོས་པའི་རེ་བ་ཡང་བཏོན་ལ། ལོ་རྗེས་མའི་འདོན་ཐེངས་བཞི་བ་ནས་བཟུང་རྒྱལ་ཁབ་ཀྱི་ཚད་ལྡན་གྱི་དཔེ་རྟགས་བླངས་ཏེ་སྤྱི་ཚོགས་སུ་དགྲམ་རྒྱུ་ཡིན་པའི་གཏམ་བཟང་ཡང་ཆབས་ཅིག་ཏུ་བསྒྲགས།  མཐའ་མར་སློབ་གཙོ་གཞོན་པ་སྟོབས་ལྡན་གྱིས་ཐེངས་འདིར་རྩོམ་ཡིག་འགོད་ཐུབ་པའི་སློབ་མ་ཚོར་གཟེངས་བསྟོད་དང་སྦྲགས། རྩོམ་སྒྲིག་པའི་དགེ་རྒན་གྱིས་གསུངས་པའི་རེ་བ་ཡིད་ལ་ཉར་དགོས་ཤིང་། རྩོམ་ཡིག་ཡག་པོ་ཕྲིས་པའི་སློབ་གྲོགས་ཚོ་སློབ་སྦྱོང་གི་མིག་དཔེར་བལྟས་ནས།《རྨ་གཡང་ཕྱུག་མོའི》དུས་དེབ་འདི་ཉིད་རང་གི་རྩོམ་འབྲིའི་ནུས་པ་བསྐྱེད་སྲིང་བྱེད་སའི་སྟེགས་བུ་ཞིག་དང་། རྩོམ་རྩལ་གྱི་གཤོག་འགྱུར་རང་དགར་ངོམ་སའི་མཁའ་དབྱིངས་ཤིག རྩོམ་རིག་སྒྱུ་རྩལ་གྱི་གཞལ་ཡས་ཁང་དུ་བགྲོད་པའི་ཐེམ་སྐས་ཤིག་ཏུ་བཟུང་ནས།   ཕྱོགས་ཡོངས་ཀྱི་འཇོན་ནུས་བསྐྱེད་སྲིང་བྱེད་པར་ཧུར་བརྩོན་བྱེད་དགོས་པའི་ཚུལ་གྱི་སྙིང་ཕུར་ཐེབས་པའི་ཡར་སྐུལ་གྱི་གསུང་བཤད་གནད་བསྡུས་ཤིག་དང་བཅས་མཛད་སྒོའི་མཇུག་ཡོངས་སུ་བསྡུས།