«མར་ཁེ་སིའི་རིང་ལུགས་ཀྲུང་གོ་ཅན་དང་དུས་རབས་ཅན་དང་ཡོངས་ཁྱབ་ཅན་བཅས་སུ་འགྱུར་བར་མུ་མཐུད་ནས་སྐུལ་འདེད་གཏོང་དགོས།»

       ང་ཚོའི་ཏང་གིས་དུས་ནམ་ཡང་དཀའ་སྡུག་ཚད་མེད་སྤྱད་དེ་འོད་སྟོང་འཕྲོ་བའི་འགྲོ་ལམ་གསར་པ་བཏོད་ཐུབ་པའི་རྒྱུ་མཚན་གལ་ཆེན་ཞིག་ནི། ང་ཚོའི་ཏང་གིས་ཐོག་མཐའ་བར་གསུམ་དུ་བསམ་བློའི་ཐོག་ནས་ཏང་འཛུགས་རྒྱུ་དང་། རིགས་པའི་གཞུང་ལུགས་ཀྱི་ཐོག་ནས་ཏང་སྟོབས་ལྡན་དུ་གཏོང་རྒྱུར་མཐོང་ཆེན་བྱེད་པ་དང་། ཚན་རིག་དང་མཐུན་པའི་རིགས་པའི་གཞུང་ལུགས་ཀྱིས་རྒྱ་ཆེའི་ཏང་ཡོན་དང་ལས་བྱེད་པའི་བསམ་བློར་དྲག་ཆས་སྤྲས་རྒྱུ་རྒྱུན་འཁྱོངས་བྱས་ནས། ཏང་ཡོངས་ཀྱིས་ཐོག་མཐའ་བར་གསུམ་དུ་བསམ་བློ་གཅིག་གྱུར་དང་། བློ་རྩ་བརྟན་པོ་དང་། འཐབ་འཛིང་གི་ནུས་སྟོབས་ཆེན་པོ་མཐའ་འཁྱོངས་བྱུང་ཡོད་པའི་རྐྱེན་གྱིས་རེད། ང་ཚོས་དགེ་མཚན་ཐོབ་པ་དང་། རང་དབང་ཟིན་པ། འབྱུང་འགྱུར་རག་པ་བཅས་དང་། མདུན་སྐྱོད་ཀྱི་འགྲོ་ལམ་ཐོག་གི་འགོག་རྐྱེན་དང་འགལ་རྐྱེན་གྱི་དགྲ་བགེགས་སྣ་ཚོགས་ཁྱད་དུ་གསད་དགོས་ན། ངེས་པར་དུ་མར་ཁེ་སིའི་རིང་ལུགས་ཉིད་ཉེར་མཁོའི་འཇོན་ཐང་བྱས་ནས། མཐོང་རྒྱ་སྔར་བས་ཡངས་ཤིང་མིག་རྒྱང་དེ་བས་རིང་བའི་ཐོག་ནས་མ་འོངས་གོང་འཕེལ་ལ་འཕྲད་པར་འགྱུར་བའི་གནད་དོན་ཆེན་པོ་རབ་དང་རིམ་པར་བསམ་གཞིགས་བྱས་ཏེ་སྟངས་འཛིན་བྱེད་དགོས་པ་དང་། ཏང་ཡོངས་ཀྱི་མར་ཁེ་སིའི་རིང་ལུགས་སྤྱད་དེ་དངོས་ཡོད་ཀྱི་གནས་ཚུལ་ལ་དབྱེ་ཞིབ་དང་ཐག་གཅོད་བྱེད་ནུས་བསྟུད་མར་ཆེ་རུ་གཏོང་དགོས་ཤིང་། ཚན་རིག་དང་མཐུན་པའི་རིགས་པའི་གཞུང་ལུགས་སྤྱད་དེ་ང་ཚོར་སློབ་སྟོན་གྱིས་འགྲན་སློང་ཆེན་པོར་ཁ་གཏད་འཇལ་བ་དང་། ཉེན་ཁ་ཚབས་ཆེན་འགོག་སྲུང་བྱེད་པ། འགོག་རྐྱེན་ཚབས་ཆེན་ཁྱད་དུ་གསོད་པ། འགལ་བ་ཆེན་པོ་ཐག་གཅོད་བྱེད་པ་བཅས་ཀྱི་ནུས་པ་བསྟུད་མར་ཆེ་རུ་གཏོང་དགོས། རྒྱུན་འཁྱོངས་ལྷོད་མེད་ངང་མར་ཁེ་སིའི་རིང་ལུགས་ཀྲུང་གོ་ཅན་དུ་འགྱུར་བའི་གྲུབ་འབྲས་གསར་ཤོས་སྤྱད་དེ་བསམ་བློར་དྲག་ཆས་སྤྲས་ཤིང་བསམ་བློ་གཅིག་སྒྲིལ་བྱེད་དགོས་པ་དང་། ཏང་ཡོངས་ཀྱི་མར་ཁེ་སིའི་རིང་ལུགས་ཀྱི་དད་མོས་དང་གུང་ཁྲན་རིང་ལུགས་ཀྱི་ཕུགས་བསམ་སྲ་བརྟན་དུ་གཏོང་དགོས་ཤིང་། ཏང་ཡོངས་དང་ལྷག་པར་དུ་འགོ་ཁྲིད་ལས་བྱེད་པས་རིགས་པའི་གཞུང་ལུགས་ཀྱི་བསམ་གཞིགས་ནུས་པ་དང་བསམ་བློ་ཆབ་སྲིད་ཀྱི་ཆུ་ཚད་མུ་མཐུད་དུ་མཐོར་འདེགས་གཏོང་དགོས།