«རང་རྒྱལ་གྱི་སྐྱེ་ཁམས་དཔལ་ཡོན་འཛུགས་སྐྲུན་སྐས་རིམ་གསར་པར་སླེབས་པར་སྐུལ་འདེད་གཏོང་དགོས།»

       སྐྱེ་ཁམས་དཔལ་ཡོན་གྱི་སྒྲིག་སྲོལ་བསྒྱུར་བཅོས་དོན་མཐའ་འཁྱོལ་རྒྱུ་ནི་མགྱོགས་སུ་གཏོང་དགོས། སྐྱེ་ཁམས་དཔལ་ཡོན་གྱི་སྒྲིག་སྲོལ་བསྒྱུར་བཅོས་ནི་ཕྱོགས་ཡོངས་ནས་བསྒྱུར་བཅོས་ཟབ་སྤེལ་བྱེད་པའི་ཁྱབ་ཁོངས་གལ་ཆེན་ཡིན་པས། སྐྱེ་ཁམས་ཁོར་ཡུག་ཁྱབ་ཁོངས་ཀྱི་གནད་དོན་ཚབས་ཆེན་ཐག་གཅོད་པ་ཁྲིད་ཕྱོགས་སུ་འཛིན་པ་དང་། བསྒྱུར་བཅོས་ཀྱི་ཐབས་ཚུལ་བཏོན་ཟིན་པ་རྣམས་དོན་འཁྱོལ་ཡོང་རྒྱུ་དམ་འཛིན་ཡག་པོ་བྱས་ཏེ་དུས་ཐོག་ཏུ་བསྒྱུར་བཅོས་ཀྱི་བཅོས་གཞི་གསར་པ་གཏན་ལ་འབེབས་དགོས། སྐྱེ་ཁམས་དཔལ་ཡོན་གྱི་སྒྲིག་སྲོལ་བསྒྱུར་བཅོས་དང་འབྲེལ་བའི་ཐབས་ཚུལ་གལ་ཆེན་ཁག་ཅིག་མགྱོགས་མྱུར་ངང་གནད་དུ་འཁྱོལ་བ་དང་ནུས་པ་ཐོན་པ་བྱེད་དགོས། ཀྲུང་དབྱང་གི་ཁོར་ཡུག་སྲུང་སྐྱོབ་ལྟ་ཞིབ་ཀྱི་དབང་གྲགས་ཆེ་རུ་གཏོང་བ་དང་། སྟོབས་ཤུགས་བཀོད་སྒྲིག་ལ་ཤུགས་རྒྱག་པ། རྒྱ་ཆེ་ལ་གཏིང་ཟབ་ཏུ་འཕེལ་རྒྱས་གཏོང་བ་བཅས་བྱེད་དགོས། སྲིད་གཞུང་གིས་གཙོ་ཁྲིད་བྱེད་པ་དང་། ཁེ་ལས་དང་སྤྱི་ཚོགས་ཀྱི་ལས་རིགས་ཁག་ཐེ་ཞུགས་བྱེད་པ། ཚོང་ར་ཅན་དུ་གཉེར་སྐྱོང་བྱེད་པ། རྒྱུན་མཐུད་ཡོད་པ་བཅས་ཀྱི་སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་བྱེད་པའི་ཐབས་ལམ་འཚོལ་ཞིབ་བྱེད་དགོས་པ་དང་། ཚོད་ལྟ་བྱས་ནས་ཉམས་མྱོང་གསོག་འཇོག་བྱེད་དགོས། ཁོར་ཡུག་སྲུང་སྐྱོབ་ཀྱི་ཡིད་རྟོན་དཔྱད་འཇོག་དང་། ཆ་འཕྲིན་བཙན་ཤེད་རང་བཞིན་གྱིས་ཡོངས་བསྒྲགས་བྱེད་པ། ཉེས་ཆད་ནན་མོ་དང་དངུལ་ཆད་ལྕི་མོ་གཅོད་པ་སོགས་ཀྱི་ལམ་ལུགས་འཐུས་སྒོ་ཚང་དུ་གཏོང་དགོས།