“སྐལ་བཟང་ཡར་བསྟོད”ཅེས་པའི་བོད་ཀྱི་བཟོ་རིག་མཛེས་རྩལ་བརྩམས་ཆོས་སྐོར་སྐྱོད་འགྲེམ་སྟོན་གྱི་མགོ་ཚུགས་པ།

       “སྐལ་བཟང་ཡར་བསྟོད”ཅེས་པའི་བོད་ཀྱི་བཟོ་རིག་མཛེས་རྩལ་བརྩམས་ཆོས་སྐོར་སྐྱོད་འགྲེམ་སྟོན་གྱི་མགོ་ཚུགས་མཛད་སྒོ་ཚེས9ཉིན་བོད་ལྗོངས་མཛེས་རྩལ་ཁང་དུ་སྤེལ་བ་རེད། ཐང་ག་དང་ལྕགས་རིགས་རྡུང་བཟོ། བོད་གདན་བསླས་འཐག བརྐོས་རིས་སོགས་བོད་ལྗོངས་ཀྱི་རྒྱལ་ཁབ་རིམ་པའི་བཟོ་རིག་མཛེས་རྩལ་གྱི་སློབ་དཔོན་ཆེན་མོ་དང་གཟུགས་འདས་རིག་གནས་ཤུལ་བཞག་རྒྱུན་འཛིན་པ། སྒྱུ་རྩལ་པ་དར་གཞོན་གྱི་སྤུས་ལེགས་བརྩམས་ཆོས100ལྷག་འགྲེམ་སྟོན་བྱས།

       ཐེངས་འདིའི་སྐོར་སྐྱོད་འགྲེམ་སྟོན་ནི་བོད་རང་སྐྱོང་ལྗོངས་བཟོ་རིག་མཛེས་རྩལ་མཐུན་ཚོགས་ཀྱིས་གཙོ་སྒྲུབ་དང་རྒྱལ་ཁབ་སྒྱུ་རྩལ་ཐེབས་རྩས་རོགས་དངུལ་བཏང་བ་ཡིན་ལ། དེའི་དམིགས་ཡུལ་ནི་བོད་ལྗོངས་ཀྱི་བཟོ་རིག་མཛེས་རྩལ་གསོན་ཉམས་རྒྱུན་འཛིན་དང་གསར་གཏོད་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ཡིན།

       བོད་རང་སྐྱོང་ལྗོངས་བཟོ་རིག་མཛེས་རྩལ་མཐུན་ཚོགས་ཀྱི་ཚོགས་གཙོ་ཉི་མ་ཚེ་རིང་གིས་བཤད་རྒྱུར། བོད་རང་སྐྱོང་ལྗོངས་དབུ་བརྙེས་ནས་ལོ་འཁོར60ལོན་པའི་རིང་གི་བོད་ལྗོངས་ཀྱི་སྲོལ་རྒྱུན་བཟོ་རིག་མཛེས་རྩལ་ལས་རིགས་འཕེལ་རྒྱས་ཀྱི་གྲུབ་འབྲས་འགྲེམ་སྟོན་དྲིལ་སྒྲོག་དང་། ཐེངས་འདིའི་སྐོར་སྐྱོད་འགྲེམ་སྟོན་རྣམ་གྲངས་སྤུས་ཚད་མཐོ་བའི་ལེགས་འགྲུབ་ཡོང་ཆེད། ང་ཚོས་དུས་མགོ་ནས་ལྗོངས་ཡོངས་ཀྱི་རྒྱལ་ཁབ་དང་རང་སྐྱོང་ལྗོངས། གྲོང་ཁྱེར(ས་ཁུལ)གྱི་རིམ་པ་གསུམ་གྱི་བཟོ་རིག་མཛེས་རྩལ་གྱི་སློབ་དཔོན་ཆེན་མོ་དང་། གཟུགས་འདས་རིག་གནས་ཤུལ་བཞག་རྒྱུན་འཛིན་པ250ལྷག་གིས་བདམས་སྐྱེལ་བྱས་པའི་བརྩམས་ཆོས468ནང་ཞིབ་འབྱེད་གདམ་གསེས་བྱས་ཏེ། མཇུག་མཐར་སྒྱུ་རྩལ་པ75ཡི་འཐུས་ཚབ་རང་བཞིན་གྱི་བརྩམས་ཆོས100འགྲེམ་སྟོན་ནང་ཞུགས་ཡོད་པས། ཐེངས་འདིའི་སྐོར་སྐྱོད་འགྲེམ་སྟོན་ནི་གནའ་དེང་ལྷན་དུ་འདྲེས་པ་དང་ཁོངས་ཡོངས་སྡུད་རུབ། ཁྱད་ཆོས་ཐུན་མོང་མ་ཡིན་པ། གྲུབ་འབྲས་གཡུར་དུ་ཟ་བའི་ཁྱད་ལྡན་གྱི་རིག་གནས་གསོལ་སྟོན་གཟབ་རྒྱས་ཞིག་ཡིན་ཞེས་བཤད་ཆོག

       གསར་འགོད་པས་ཡུལ་དངོས་ནས་མཐོང་བ་ལྟར་ན། ལྷ་སའི་ས་ཚིགས་ཀྱི་འགྲེམ་སྟོན་ནི་དུམ་ཚན3གྱི་གྲུབ་ནས་བོད་ལྗོངས་ཀྱི་སྲོལ་རྒྱུན་བཟོ་རིག་མཛེས་རྩལ་གྱི་རིགས་ཆེན་པོ9དང་བརྩམས་ཆོས་སྣ་ཁ38ཀྱི་ནང་དོན་འདུས་ཡོད་ལ། དེའི་ནང་ལོ་ངོ་སྟོང་ཕྲག་རིང་རྒྱུན་འཛིན་བྱས་པའི་སྲོལ་རྒྱུན་གྱི་ཐང་ག་ཡོད་པ་མ་ཟད། དེང་རབས་ཀྱི་མཛེས་དཔྱོད་འདྲེས་པའི་བརྩམ་གཞི་གསར་བའི་ཐང་གའང་ཡོད་པས། བོད་ལྗོངས་བཟོ་རིག་མཛེས་རྩལ་གྱི་སྣ་མང་ཡིད་དབང་འཕྲོག་ཤུགས་གཅིག་སྡུད་མངོན་ཡོད།