«བོད་ཀྱི་གསོ་རིག་ཀུན་བཏུས་བསྟུད་སྒྲིག་མ»པར་སྐྲུན་བྱས།

       པོད་ཉི་ཤུའི་བདག་ཉིད་ཅན་གྱི་དཔེ་ཚོགས«བོད་ཀྱི་གསོ་རིག་ཀུན་བཏུས་བསྟུད་སྒྲིག་མ»(61-80)ཞེས་པ་མི་རིགས་དཔེ་སྐྲུན་ཁང་ནས་པར་སྐྲུན་འགྲེམས་སྤེལ་བྱས། འདི་ནི་དེ་སྔར་དཔེ་སྐྲུན་བྱས་པའི«བོད་ཀྱི་གསོ་རིག་ཀུན་བཏུས»ཞེས་པའི་དཔེ་ཚོགས་ཀྱི་བརྗོད་བྱའི་ནང་དོན་སྔར་ལས་ཇེ་རྒྱས་ཇེ་ལེགས་སུ་བཏང་ནས་མིང་དོན་མཚུངས་པའི་ཀུན་འདུས་རང་བཞིན་ཅན་དང་། ཚན་རིག་རང་བཞིན་ཅན། བཀོལ་སྤྱོད་རང་བཞིན་ཅན་བཅས་ཀྱི་ཁྱད་ཆོས་ལྡན་པ་ཞིག་ཏུ་བསྐྲུན་ཆེད། མཚོ་སྔོན་ཞིང་ཆེན་བོད་ཀྱི་གསོ་རིག་ཞིབ་འཇུག་གླིང་གིས་སྔར་བཞིན་དཔེ་རྙིང་ཞིབ་འཇུག་ཚན་ཁག་གཞིར་བྱས་ཐོག་གསོ་རིག་མཁས་པ་གདན་ཞུ་དང་། ཆེད་ལས་ཞུ་དག་པ་དང་རྩོམ་སྒྲིག་མི་སྣ་སྒྲིག་འཛུགས་བྱས་ཏེ། མི་ལོ་བཅུ་ལྷག་གི་ཡུན་ལ་རྒྱལ་ཁབ་ཕྱི་ནང་དང་མདོ་དབུས་ཁམས་གསུམ་གྱི་ཡུལ་ལུང་ཁག་ཏུ་དངོས་ཤུགས་བརྒྱུད་གསུམ་གྱིས་གསོ་རིག་གི་དཔེ་རྙིང་རྩད་གཅོད་དང་འཚོལ་སྡུད་བགྱིས་ཤིང་། སྤྱི་ཚོགས་ཀྱི་ལས་རིགས་སོ་སོར་རང་བབ་ཀྱི་ལས་ལ་གཞོལ་བའི་སྐྱེས་བུ་ལྷག་བསམ་ཅན་རྣམས་ཀྱིས་ཁ་ཞེ་གཉིས་མེད་ཀྱིས་མཐུན་རྐྱེན་གང་ལེགས་སྦྱར་བ་ལ་བརྟེན་ནས་གསོ་རིག་གི་དཔེ་རྙིང་མི་འདྲ་བ་ཉིས་སྟོང་ཉིས་བརྒྱ་ལྷག་ལག་སོན་བྱུང་བ་ལས་ཡོངས་སུ་གྲགས་ཞིང་ཚད་མར་འཛིན་ལ་སྤྱོད་སྒོ་ཆེ་བ་དང་། ཞིབ་འཇུག་དང་ཉར་ཚགས་ཀྱི་རིན་ཐང་ལྡན་པའི་དཔེ་རྙིང་ཉིས་བརྒྱ་དང་གོ་གཉིས་བདམས་ཡོད།

       ས་བཅད་ཀྱི་སྒྲིག་སྟངས་ལ་སྔར་བཞིན་གསོ་རིག་ལོ་རྒྱུས་ཀྱི་སྐོར་དང་། གནའ་རབས་གསོ་རིག་གི་སྐོར། རྒྱུད་བཞི་དང་རྒྱུད་འགྲེལ་གྱི་སྐོར། ནད་ཐོག་ཉམས་ཡིག་གི་སྐོར། སྨན་ངོ་ངོས་འཛིན་གྱི་སྐོར། སྨན་སྦྱོར་ལག་ལེན་གྱི་སྐོར། སྨན་རྫས་འདུལ་སྦྱོང་གི་སྐོར། སྙིང་ཐིག་ལས་ཚོགས་ཀྱི་སྐོར་བཅས་སྤྱི་དོན་ཆེན་མོ་བརྒྱད་དུ་བསྡུས་ནས་པོད་ཉི་ཤུའི་བདག་ཉིད་ཅན་གྱི་དཔེ་ཚོགས་ངེད་མི་རིགས་དཔེ་སྐྲུན་ཁང་གིས་དངོས་སུ་དཔེ་སྐྲུན་འགྲེམས་སྤེལ་བྱས།