དགེ་རྒན་ཆེན་མོ་གཅོད་པ་དོན་གྲུབ་ལགས་ཀྱིས་བརྩམས་པའི«གླིང་སྒྲུང་ཀློག་དེབ་བློ་གསལ་འཇུག་ངོགས»ཞེས་པའི་དཔེ་ཚོགས་པར་སྐྲུན་འགྲེམ་སྤེལ་བྱས།

       གཅིག «གླིང་སྒྲུང་ཀློག་དེབ་བློ་གསལ་འཇུག་ངོགས»ཞེས་པའི་དེབ་ཕྲེང་བཅུའི་བདག་ཉིད་ཅན་འདི་ནི་རྒྱལ་ཁབ་གསར་བ་བཙུགས་ཚུན་དུ་གེ་སར་རིག་གནས་སྐོར་གྱི་ཤེས་བྱ་ཀུན་འདུས་ཀྱི་གླེགས་བམ་ཞིག་ཡིན་པས། གེ་སར་རིག་གནས་ལ་སློབ་སྦྱོང་དང་རྒྱུས་ལོན་བྱེད་ན་གོ་བདེ་བའི་ངང་ནས་རྒྱུད་ལ་གསལ་བོར་ངེས་ཐུབ་པའི་དགེ་མཚན་ཡོད།
       གཉིས། གླིང་སྒྲུང་བྱུང་འཕེལ་གྱི་བརྒྱུད་རིམ་ཁྲོད། གེ་སར་རིག་གནས་ཞིབ་འཇུག་ཐད་དུ་ཀློག་དེབ་བཅུ་ལྷན་དུ་པར་སྐྲུན་དང་འགྲེམ་སྤེལ་གནང་བ་ཐེངས་དང་པོ་ཡིན་ལ། བོད་པའི་ལོ་རྒྱུས་ཐོག་མེད་པ་ཁ་སྐོང་བགྱིས་ཡོད་པའང་བསྙོན་དུ་མེད།
       གསུམ། དཔེ་ཚོགས་འདིའི་བརྗོད་བྱ་རྒྱ་ཆེ་ཞིང་གཏིང་ཟབ་ལ་རྗོད་བྱེད་ཚིག་བདེ་ལ་གོ་སླ་བའི་ཁྱད་ཆོས་ཡོད། གནག་རྫི་དང་གཞོན་ནུ་ཀློག་པ་པོས་བསླབ་ན་ཡིད་ལ་འབྱོར་ཐུབ་པའི་ཤེས་བྱ་ཡོད་ཅིང་གེ་སར་ཆེད་མཁས་པ་ཚོས་བཀླག་ན་ཡིད་ལ་གཏིང་ཟབ་པའི་ལྟ་བ་དང་ཤེས་བྱ་གསར་བ་སྦྱིན་ཐུབ་པའི་དགེ་མཚན་མཆིས།
       བཞི། དཔེ་ཚོགས་འདིའི་བརྗོད་དོན་གཙོ་བོ་མདོ་དབུས་ཁམས་གསུམ་ལ་ཁ་ཕྱོགས་ནས་བརྩམས་པ་ཡིན་པས་བོད་ཁམས་ཡོངས་སུ་ཁྱབ་པའི་གེ་སར་རིག་གནས་ཀྱི་ལོ་རྒྱུས་དང་གནས་བབ་ལ་རྒྱུས་ལོན་གསལ་པོ་བྱེད་ཐུབ་པས། སྐྱེས་བུ་སུ་ཞིག་གིས་རང་གི་ཡུལ་ཕྱོགས་ཀྱི་གེ་སར་ལོ་རྒྱུས་ཤེས་འདོད་ན་ཕྱོགས་ཞེན་མེད་པར་ཁྱེད་ལ་ངོ་སྤྲོད་གསལ་བོ་གནང་ཐུབ་པའི་ཁྱད་ཆོས་ཡོད།
       ལྔ། དཔེ་ཚོགས་འདིར་གེ་སར་རྒྱལ་པོ་ནི་ལོ་རྒྱུས་ནང་དངོས་སུ་བྱུང་མྱོང་བའི་དཔའ་བོ་དངོས་ཡིན་པའི་ཆ་ནས་སྔོན་བྱོན་བོད་ཀྱི་སྐྱེས་བུ་དམ་པ་ཚོའི་གསུང་སྒྲོས་གཞིར་བཟུང་ནས་བྲིས་ཡོད་པས་ན་ཡིད་རྟོན་བྱས་ཆོག་ལ། དེང་སང་མི་ཉུང་ཤས་ཙམ་གྱིས་བོད་ཀྱི་གེ་སར་ལོ་རྒྱུས་ལ་མི་མཐུན་པའི་རྙོག་བཤད་ལོག་བཤད་ལ་ལུང་དང་རིགས་པས་གང་ནུས་ཀྱིས་བསྒྲུབས་ཡོད་དོ། །
       གཞན་ཡང་དཔེ་ཚོགས་འདིའི་ནང་གི་དཔྱད་གཞིའི་རྒྱུ་ཆ་ཕལ་ཆེ་བ་རྩོམ་པ་པོ་ཁོང་ཉིད་ཀྱིས་བགྲང་བྱ་སུམ་ཅུའི་རིང་ལ་དཀའ་བ་རྒྱབ་ཏུ་བསྐྱུར་ཞིང་ངལ་བ་དང་དུ་བླངས་ནས་དངོས་སུ་གཞི་རིམ་དང་ཡུལ་དངོས་ལ་སོང་ནས་རྒྱུས་ལོན་གནང་སྟེ་མཛད་པ་ཡིན་པས་རྣམ་དག་གསལ་བོ་ཡིན་ཞིང་ཡིད་རྟོན་བྱས་ཆོག་པའི་དཔྱད་གཞི་ཁུངས་ཐུབ་ཡིན་ནོ། །